ירמיה 8 : 1 (ALEP)
א בעת ההיא נאם יהוה ויציאו (יוציאו) את עצמות מלכי יהודה ואת עצמות שריו ואת עצמות הכהנים ואת עצמות הנביאים ואת עצמות יושבי ירושלם--מקבריהם
ירמיה 8 : 2 (ALEP)
ב ושטחום לשמש ולירח ולכל צבא השמים אשר אהבום ואשר עבדום ואשר הלכו אחריהם ואשר דרשום ואשר השתחוו להם  לא יאספו ולא יקברו לדמן על פני האדמה יהיו
ירמיה 8 : 3 (ALEP)
ג ונבחר מות מחיים לכל השארית הנשארים מן המשפחה הרעה הזאת--בכל המקמות הנשארים אשר הדחתים שם נאם יהוה צבאות  ס
ירמיה 8 : 4 (ALEP)
ד ואמרת אליהם כה אמר יהוה היפלו ולא יקומו אם ישוב ולא ישוב
ירמיה 8 : 5 (ALEP)
ה מדוע שובבה העם הזה ירושלם--משבה נצחת החזיקו בתרמת--מאנו לשוב
ירמיה 8 : 6 (ALEP)
ו הקשבתי ואשמע לוא כן ידברו--אין איש נחם על רעתו לאמר מה עשיתי כלה שב במרצותם (במרוצתם) כסוס שוטף במלחמה
ירמיה 8 : 7 (ALEP)
ז גם חסידה בשמים ידעה מועדיה ותר וסוס (וסיס) ועגור שמרו את עת באנה ועמי--לא ידעו את משפט יהוה
ירמיה 8 : 8 (ALEP)
ח איכה תאמרו חכמים אנחנו ותורת יהוה אתנו אכן הנה לשקר עשה עט שקר ספרים
ירמיה 8 : 9 (ALEP)
ט הבשו חכמים חתו וילכדו הנה בדבר יהוה מאסו וחכמת מה להם
ירמיה 8 : 10 (ALEP)
י לכן אתן את נשיהם לאחרים שדותיהם ליורשים--כי מקטן ועד גדול כלה בצע בצע  מנביא ועד כהן--כלה עשה שקר
ירמיה 8 : 11 (ALEP)
יא וירפו את שבר בת עמי על נקלה--לאמר שלום שלום ואין שלום
ירמיה 8 : 12 (ALEP)
יב הבשו כי תועבה עשו גם בוש לא יבשו והכלם לא ידעו--לכן יפלו בנפלים בעת פקדתם יכשלו אמר יהוה  פ
ירמיה 8 : 13 (ALEP)
יג אסף אסיפם נאם יהוה אין ענבים בגפן ואין תאנים בתאנה והעלה נבל--ואתן להם יעברום
ירמיה 8 : 14 (ALEP)
יד על מה אנחנו ישבים--האספו ונבוא אל ערי המבצר ונדמה שם  כי יהוה אלהינו הדמנו וישקנו מי ראש כי חטאנו ליהוה
ירמיה 8 : 15 (ALEP)
טו קוה לשלום ואין טוב לעת מרפה והנה בעתה
ירמיה 8 : 16 (ALEP)
טז מדן נשמע נחרת סוסיו--מקול מצהלות אביריו רעשה כל הארץ ויבואו ויאכלו ארץ ומלואה--עיר וישבי בה  פ
ירמיה 8 : 17 (ALEP)
יז כי הנני משלח בכם נחשים צפענים אשר אין להם לחש ונשכו אתכם נאם יהוה  ס
ירמיה 8 : 18 (ALEP)
יח מבליגיתי עלי יגון עלי לבי דוי
ירמיה 8 : 19 (ALEP)
יט הנה קול שועת בת עמי מארץ מרחקים היהוה אין בציון אם מלכה אין בה מדוע הכעסוני בפסליהם--בהבלי נכר
ירמיה 8 : 20 (ALEP)
כ עבר קציר כלה קיץ ואנחנו לוא נושענו
ירמיה 8 : 21 (ALEP)
כא על שבר בת עמי השברתי קדרתי שמה החזקתני
ירמיה 8 : 22 (ALEP)
כב הצרי אין בגלעד אם רפא אין שם  כי מדוע לא עלתה ארכת בת עמי  ס [ ( ) כג מי יתן ראשי מים ועיני מקור דמעה ואבכה יומם ולילה את חללי בת עמי  ס ]

1 2 3 4 5 6 7 8 9 10 11 12 13 14 15 16 17 18 19 20 21 22