ירמיה 7 : 1 (ALEP)
א הדבר אשר היה אל ירמיהו מאת יהוה לאמר
ירמיה 7 : 2 (ALEP)
ב עמד בשער בית יהוה וקראת שם את הדבר הזה ואמרת שמעו דבר יהוה כל יהודה הבאים בשערים האלה להשתחות ליהוה {ס}
ירמיה 7 : 3 (ALEP)
ג כה אמר יהוה צבאות אלהי ישראל היטיבו דרכיכם ומעלליכם ואשכנה אתכם במקום הזה
ירמיה 7 : 4 (ALEP)
ד אל תבטחו לכם אל דברי השקר לאמר היכל יהוה היכל יהוה היכל יהוה המה
ירמיה 7 : 5 (ALEP)
ה כי אם היטיב תיטיבו את דרכיכם ואת מעלליכם אם עשו תעשו משפט בין איש ובין רעהו
ירמיה 7 : 6 (ALEP)
ו גר יתום ואלמנה לא תעשקו ודם נקי אל תשפכו במקום הזה ואחרי אלהים אחרים לא תלכו לרע לכם
ירמיה 7 : 7 (ALEP)
ז ושכנתי אתכם במקום הזה--בארץ אשר נתתי לאבותיכם למן עולם ועד עולם
ירמיה 7 : 8 (ALEP)
ח הנה אתם בטחים לכם על דברי השקר--לבלתי הועיל
ירמיה 7 : 9 (ALEP)
ט הגנב רצח ונאף והשבע לשקר וקטר לבעל והלך אחרי אלהים אחרים--אשר לא ידעתם
ירמיה 7 : 10 (ALEP)
י ובאתם ועמדתם לפני בבית הזה אשר נקרא שמי עליו ואמרתם נצלנו--למען עשות את כל התועבות האלה
ירמיה 7 : 11 (ALEP)
יא המערת פרצים היה הבית הזה אשר נקרא שמי עליו--בעיניכם גם אנכי הנה ראיתי נאם יהוה
ירמיה 7 : 12 (ALEP)
יב כי לכו נא אל מקומי אשר בשילו אשר שכנתי שמי שם בראשונה וראו את אשר עשיתי לו מפני רעת עמי ישראל
ירמיה 7 : 13 (ALEP)
יג ועתה יען עשותכם את כל המעשים האלה--נאם יהוה ואדבר אליכם השכם ודבר ולא שמעתם ואקרא אתכם ולא עניתם
ירמיה 7 : 14 (ALEP)
יד ועשיתי לבית אשר נקרא שמי עליו אשר אתם בטחים בו ולמקום אשר נתתי לכם ולאבותיכם--כאשר עשיתי לשלו
ירמיה 7 : 15 (ALEP)
טו והשלכתי אתכם מעל פני כאשר השלכתי את כל אחיכם את כל זרע אפרים {פ}
ירמיה 7 : 16 (ALEP)
טז ואתה אל תתפלל בעד העם הזה ואל תשא בעדם רנה ותפלה--ואל תפגע בי כי אינני שמע אתך
ירמיה 7 : 17 (ALEP)
יז האינך ראה מה המה עשים בערי יהודה ובחצות ירושלם
ירמיה 7 : 18 (ALEP)
יח הבנים מלקטים עצים והאבות מבערים את האש והנשים לשות בצק לעשות כונים למלכת השמים והסך נסכים לאלהים אחרים--למען הכעסני
ירמיה 7 : 19 (ALEP)
יט האתי הם מכעסים נאם יהוה הלוא אתם למען בשת פניהם
ירמיה 7 : 20 (ALEP)
כ לכן כה אמר אדני יהוה הנה אפי וחמתי נתכת אל המקום הזה על האדם ועל הבהמה ועל עץ השדה ועל פרי האדמה ובערה ולא תכבה {פ}
ירמיה 7 : 21 (ALEP)
כא כה אמר יהוה צבאות אלהי ישראל עלותיכם ספו על זבחיכם ואכלו בשר
ירמיה 7 : 22 (ALEP)
כב כי לא דברתי את אבותיכם ולא צויתים ביום הוציא (הוציאי) אותם מארץ מצרים--על דברי עולה וזבח
ירמיה 7 : 23 (ALEP)
כג כי אם את הדבר הזה צויתי אותם לאמר שמעו בקולי--והייתי לכם לאלהים ואתם תהיו לי לעם והלכתם בכל הדרך אשר אצוה אתכם למען ייטב לכם
ירמיה 7 : 24 (ALEP)
כד ולא שמעו ולא הטו את אזנם וילכו במעצות בשררות לבם הרע ויהיו לאחור ולא לפנים
ירמיה 7 : 25 (ALEP)
כה למן היום אשר יצאו אבותיכם מארץ מצרים עד היום הזה--ואשלח אליכם את כל עבדי הנביאים יום השכם ושלח
ירמיה 7 : 26 (ALEP)
כו ולוא שמעו אלי ולא הטו את אזנם ויקשו את ערפם--הרעו מאבותם
ירמיה 7 : 27 (ALEP)
כז ודברת אליהם את כל הדברים האלה ולא ישמעו אליך וקראת אליהם ולא יענוכה
ירמיה 7 : 28 (ALEP)
כח ואמרת אליהם זה הגוי אשר לוא שמעו בקול יהוה אלהיו ולא לקחו מוסר אבדה האמונה ונכרתה מפיהם {ס}
ירמיה 7 : 29 (ALEP)
כט גזי נזרך והשליכי ושאי על שפים קינה כי מאס יהוה ויטש את דור עברתו
ירמיה 7 : 30 (ALEP)
ל כי עשו בני יהודה הרע בעיני נאם יהוה שמו שקוציהם בבית אשר נקרא שמי עליו--לטמאו
ירמיה 7 : 31 (ALEP)
לא ובנו במות התפת אשר בגיא בן הנם לשרף את בניהם ואת בנתיהם באש--אשר לא צויתי ולא עלתה על לבי {פ}
ירמיה 7 : 32 (ALEP)
לב לכן הנה ימים באים נאם יהוה ולא יאמר עוד התפת וגיא בן הנם כי אם גיא ההרגה וקברו בתפת מאין מקום
ירמיה 7 : 33 (ALEP)
לג והיתה נבלת העם הזה למאכל לעוף השמים ולבהמת הארץ ואין מחריד
ירמיה 7 : 34 (ALEP)
לד והשבתי מערי יהודה ומחצות ירושלם קול ששון וקול שמחה קול חתן וקול כלה כי לחרבה תהיה הארץ
❮
❯