ירמיה 52 : 1 (ALEP)
א בן עשרים ואחת שנה צדקיהו במלכו ואחת עשרה שנה מלך בירושלם ושם אמו חמיטל (חמוטל) בת ירמיהו מלבנה
ירמיה 52 : 2 (ALEP)
ב ויעש הרע בעיני יהוה ככל אשר עשה יהויקם
ירמיה 52 : 3 (ALEP)
ג כי על אף יהוה היתה בירושלם ויהודה עד השליכו אותם מעל פניו וימרד צדקיהו במלך בבל
ירמיה 52 : 4 (ALEP)
ד ויהי בשנה התשעית למלכו בחדש העשירי בעשור לחדש בא נבוכדראצר מלך בבל הוא וכל חילו על ירושלם ויחנו עליה ויבנו עליה דיק סביב
ירמיה 52 : 5 (ALEP)
ה ותבא העיר במצור עד עשתי עשרה שנה למלך צדקיהו
ירמיה 52 : 6 (ALEP)
ו בחדש הרביעי בתשעה לחדש ויחזק הרעב בעיר ולא היה לחם לעם הארץ
ירמיה 52 : 7 (ALEP)
ז ותבקע העיר וכל אנשי המלחמה יברחו ויצאו מהעיר לילה דרך שער בין החמתים אשר על גן המלך וכשדים על העיר סביב וילכו דרך הערבה
ירמיה 52 : 8 (ALEP)
ח וירדפו חיל כשדים אחרי המלך וישיגו את צדקיהו בערבת ירחו וכל חילו--נפצו מעליו
ירמיה 52 : 9 (ALEP)
ט ויתפשו את המלך ויעלו אתו אל מלך בבל רבלתה בארץ חמת וידבר אתו משפטים
ירמיה 52 : 10 (ALEP)
י וישחט מלך בבל את בני צדקיהו לעיניו וגם את כל שרי יהודה שחט ברבלתה
ירמיה 52 : 11 (ALEP)
יא ואת עיני צדקיהו עור ויאסרהו בנחשתים ויבאהו מלך בבל בבלה ויתנהו בבית (בית) הפקדת עד יום מותו
ירמיה 52 : 12 (ALEP)
יב ובחדש החמישי בעשור לחדש היא שנת תשע עשרה שנה למלך נבוכדראצר מלך בבל--בא נבוזראדן רב טבחים עמד לפני מלך בבל בירושלם
ירמיה 52 : 13 (ALEP)
יג וישרף את בית יהוה ואת בית המלך ואת כל בתי ירושלם ואת כל בית הגדול שרף באש
ירמיה 52 : 14 (ALEP)
יד ואת כל חמות ירושלם סביב נתצו כל חיל כשדים אשר את רב טבחים
ירמיה 52 : 15 (ALEP)
טו ומדלות העם ואת יתר העם הנשארים בעיר ואת הנפלים אשר נפלו אל מלך בבל ואת יתר האמון--הגלה נבוזראדן רב טבחים
ירמיה 52 : 16 (ALEP)
טז ומדלות הארץ--השאיר נבוזראדן רב טבחים לכרמים וליגבים
ירמיה 52 : 17 (ALEP)
יז ואת עמודי הנחשת אשר לבית יהוה ואת המכנות ואת ים הנחשת אשר בבית יהוה--שברו כשדים וישאו את כל נחשתם בבלה
ירמיה 52 : 18 (ALEP)
יח ואת הסרות ואת היעים ואת המזמרות ואת המזרקת ואת הכפות ואת כל כלי הנחשת אשר ישרתו בהם--לקחו
ירמיה 52 : 19 (ALEP)
יט ואת הספים ואת המחתות ואת המזרקות ואת הסירות ואת המנרות ואת הכפות ואת המנקיות אשר זהב זהב ואשר כסף כסף--לקח רב טבחים
ירמיה 52 : 20 (ALEP)
כ העמודים שנים הים אחד והבקר שנים עשר נחשת אשר תחת המכנות אשר עשה המלך שלמה לבית יהוה--לא היה משקל לנחשתם כל הכלים האלה
ירמיה 52 : 21 (ALEP)
כא והעמודים שמנה עשרה אמה קומה (קומת) העמד האחד וחוט שתים עשרה אמה יסבנו ועביו ארבע אצבעות נבוב
ירמיה 52 : 22 (ALEP)
כב וכתרת עליו נחשת וקומת הכתרת האחת חמש אמות ושבכה ורמונים על הכותרת סביב הכל נחשת וכאלה לעמוד השני ורמונים
ירמיה 52 : 23 (ALEP)
כג ויהיו הרמנים--תשעים וששה רוחה כל הרמונים מאה על השבכה סביב ס
ירמיה 52 : 24 (ALEP)
כד ויקח רב טבחים את שריה כהן הראש ואת צפניה כהן המשנה--ואת שלשת שמרי הסף
ירמיה 52 : 25 (ALEP)
כה ומן העיר לקח סריס אחד אשר היה פקיד על אנשי המלחמה ושבעה אנשים מראי פני המלך אשר נמצאו בעיר ואת ספר שר הצבא המצבא את עם הארץ וששים איש מעם הארץ הנמצאים בתוך העיר
ירמיה 52 : 26 (ALEP)
כו ויקח אותם נבוזראדן רב טבחים וילך אותם אל מלך בבל רבלתה
ירמיה 52 : 27 (ALEP)
כז ויכה אותם מלך בבל וימתם ברבלה בארץ חמת ויגל יהודה מעל אדמתו ס
ירמיה 52 : 28 (ALEP)
כח זה העם אשר הגלה נבוכדראצר בשנת שבע--יהודים שלשת אלפים ועשרים ושלשה
ירמיה 52 : 29 (ALEP)
כט בשנת שמונה עשרה לנבוכדראצר מירושלם--נפש שמנה מאות שלשים ושנים
ירמיה 52 : 30 (ALEP)
ל בשנת שלש ועשרים לנבוכדראצר הגלה נבוזראדן רב טבחים יהודים נפש שבע מאות ארבעים וחמשה כל נפש ארבעת אלפים ושש מאות ס
ירמיה 52 : 31 (ALEP)
לא ויהי בשלשים ושבע שנה לגלות יהויכן מלך יהודה בשנים עשר חדש בעשרים וחמשה לחדש נשא אויל מרדך מלך בבל בשנת מלכתו את ראש יהויכין מלך יהודה ויצא אתו מבית הכליא (הכלוא)
ירמיה 52 : 32 (ALEP)
לב וידבר אתו טבות ויתן את כסאו ממעל לכסא מלכים (המלכים) אשר אתו בבבל
ירמיה 52 : 33 (ALEP)
לג ושנה את בגדי כלאו ואכל לחם לפניו תמיד כל ימי חיו
ירמיה 52 : 34 (ALEP)
לד וארחתו ארחת תמיד נתנה לו מאת מלך בבל דבר יום ביומו--עד יום מותו כל ימי חייו ש
❮
❯