ירמיה 51 : 1 (ALEP)
א כה אמר יהוה הנני מעיר על בבל ואל ישבי לב קמי--רוח משחית
ירמיה 51 : 2 (ALEP)
ב ושלחתי לבבל זרים וזרוה ויבקקו את ארצה כי היו עליה מסביב ביום רעה
ירמיה 51 : 3 (ALEP)
ג אל ידרך ידרך ( ) הדרך קשתו ואל יתעל בסרינו ואל תחמלו אל בחריה--החרימו כל צבאה
ירמיה 51 : 4 (ALEP)
ד ונפלו חללים בארץ כשדים ומדקרים בחוצותיה
ירמיה 51 : 5 (ALEP)
ה כי לא אלמן ישראל ויהודה מאלהיו--מיהוה צבאות כי ארצם מלאה אשם מקדוש ישראל
ירמיה 51 : 6 (ALEP)
ו נסו מתוך בבל ומלטו איש נפשו--אל תדמו בעונה כי עת נקמה היא ליהוה--גמול הוא משלם לה
ירמיה 51 : 7 (ALEP)
ז כוס זהב בבל ביד יהוה--משכרת כל הארץ מיינה שתו גוים על כן יתהללו גוים
ירמיה 51 : 8 (ALEP)
ח פתאם נפלה בבל ותשבר הילילו עליה קחו צרי למכאובה--אולי תרפא
ירמיה 51 : 9 (ALEP)
ט רפאנו את בבל ולא נרפתה--עזבוה ונלך איש לארצו כי נגע אל השמים משפטה ונשא עד שחקים
ירמיה 51 : 10 (ALEP)
י הוציא יהוה את צדקתינו באו ונספרה בציון את מעשה יהוה אלהינו {ס}
ירמיה 51 : 11 (ALEP)
יא הברו החצים מלאו השלטים--העיר יהוה את רוח מלכי מדי כי על בבל מזמתו להשחיתה כי נקמת יהוה היא נקמת היכלו
ירמיה 51 : 12 (ALEP)
יב אל חומת בבל שאו נס החזיקו המשמר--הקימו שמרים הכינו הארבים כי גם זמם יהוה--גם עשה את אשר דבר אל ישבי בבל
ירמיה 51 : 13 (ALEP)
יג שכנתי (שכנת) על מים רבים רבת אוצרת בא קצך אמת בצעך
ירמיה 51 : 14 (ALEP)
יד נשבע יהוה צבאות בנפשו כי אם מלאתיך אדם כילק וענו עליך הידד {ס}
ירמיה 51 : 15 (ALEP)
טו עשה ארץ בכחו מכין תבל בחכמתו ובתבונתו נטה שמים
ירמיה 51 : 16 (ALEP)
טז לקול תתו המון מים בשמים ויעל נשאים מקצה ארץ ברקים למטר עשה ויוצא רוח מאצרתיו
ירמיה 51 : 17 (ALEP)
יז נבער כל אדם מדעת הביש כל צרף מפסל כי שקר נסכו ולא רוח בם
ירמיה 51 : 18 (ALEP)
יח הבל המה מעשה תעתעים בעת פקדתם יאבדו
ירמיה 51 : 19 (ALEP)
יט לא כאלה חלק יעקוב כי יוצר הכל הוא--ושבט נחלתו יהוה צבאות שמו {פ}
ירמיה 51 : 20 (ALEP)
כ מפץ אתה לי כלי מלחמה ונפצתי בך גוים והשחתי בך ממלכות
ירמיה 51 : 21 (ALEP)
כא ונפצתי בך סוס ורכבו ונפצתי בך רכב ורכבו
ירמיה 51 : 22 (ALEP)
כב ונפצתי בך איש ואשה ונפצתי בך זקן ונער ונפצתי בך בחור ובתולה
ירמיה 51 : 23 (ALEP)
כג ונפצתי בך רעה ועדרו ונפצתי בך אכר וצמדו ונפצתי בך פחות וסגנים
ירמיה 51 : 24 (ALEP)
כד ושלמתי לבבל ולכל יושבי כשדים את כל רעתם אשר עשו בציון--לעיניכם נאם יהוה {ס}
ירמיה 51 : 25 (ALEP)
כה הנני אליך הר המשחית נאם יהוה המשחית את כל הארץ ונטיתי את ידי עליך וגלגלתיך מן הסלעים ונתתיך להר שרפה
ירמיה 51 : 26 (ALEP)
כו ולא יקחו ממך אבן לפנה ואבן למוסדות כי שממות עולם תהיה נאם יהוה
ירמיה 51 : 27 (ALEP)
כז שאו נס בארץ תקעו שופר בגוים קדשו עליה גוים--השמיעו עליה ממלכות אררט מני ואשכנז פקדו עליה טפסר העלו סוס כילק סמר
ירמיה 51 : 28 (ALEP)
כח קדשו עליה גוים את מלכי מדי את פחותיה ואת כל סגניה ואת כל ארץ ממשלתו
ירמיה 51 : 29 (ALEP)
כט ותרעש הארץ ותחל כי קמה על בבל מחשבות יהוה לשום את ארץ בבל לשמה מאין יושב
ירמיה 51 : 30 (ALEP)
ל חדלו גבורי בבל להלחם ישבו במצדות--נשתה גבורתם היו לנשים הציתו משכנתיה נשברו בריחיה
ירמיה 51 : 31 (ALEP)
לא רץ לקראת רץ ירוץ ומגיד לקראת מגיד--להגיד למלך בבל כי נלכדה עירו מקצה
ירמיה 51 : 32 (ALEP)
לב והמעברות נתפשו ואת האגמים שרפו באש ואנשי המלחמה נבהלו {ס}
ירמיה 51 : 33 (ALEP)
לג כי כה אמר יהוה צבאות אלהי ישראל בת בבל כגרן עת הדריכה עוד מעט ובאה עת הקציר לה
ירמיה 51 : 34 (ALEP)
לד אכלנו (אכלני) הממנו (הממני) נבוכדראצר מלך בבל הציגנו (הציגני) כלי ריק בלענו (בלעני) כתנין מלא כרשו מעדני הדיחנו (הדיחני)
ירמיה 51 : 35 (ALEP)
לה חמסי ושארי על בבל תאמר ישבת ציון ודמי אל ישבי כשדים תאמר ירושלם {ס}
ירמיה 51 : 36 (ALEP)
לו לכן כה אמר יהוה הנני רב את ריבך ונקמתי את נקמתך והחרבתי את ימה והבשתי את מקורה
ירמיה 51 : 37 (ALEP)
לז והיתה בבל לגלים מעון תנים שמה ושרקה מאין יושב
ירמיה 51 : 38 (ALEP)
לח יחדו ככפרים ישאגו נערו כגורי אריות
ירמיה 51 : 39 (ALEP)
לט בחמם אשית את משתיהם והשכרתים למען יעלזו וישנו שנת עולם ולא יקיצו--נאם יהוה
ירמיה 51 : 40 (ALEP)
מ אורידם ככרים לטבוח--כאילים עם עתודים
ירמיה 51 : 41 (ALEP)
מא איך נלכדה ששך ותתפש תהלת כל הארץ איך היתה לשמה בבל בגוים
ירמיה 51 : 42 (ALEP)
מב עלה על בבל הים בהמון גליו נכסתה
ירמיה 51 : 43 (ALEP)
מג היו עריה לשמה ארץ ציה וערבה ארץ לא ישב בהן כל איש ולא יעבר בהן בן אדם
ירמיה 51 : 44 (ALEP)
מד ופקדתי על בל בבבל והצאתי את בלעו מפיו ולא ינהרו אליו עוד גוים גם חומת בבל נפלה
ירמיה 51 : 45 (ALEP)
מה צאו מתוכה עמי ומלטו איש את נפשו--מחרון אף יהוה
ירמיה 51 : 46 (ALEP)
מו ופן ירך לבבכם ותיראו בשמועה הנשמעת בארץ ובא בשנה השמועה ואחריו בשנה השמועה וחמס בארץ ומשל על משל
ירמיה 51 : 47 (ALEP)
מז לכן הנה ימים באים ופקדתי על פסילי בבל וכל ארצה תבוש וכל חלליה יפלו בתוכה
ירמיה 51 : 48 (ALEP)
מח ורננו על בבל שמים וארץ וכל אשר בהם כי מצפון יבוא לה השודדים נאם יהוה
ירמיה 51 : 49 (ALEP)
מט גם בבל לנפל חללי ישראל גם לבבל נפלו חללי כל הארץ
ירמיה 51 : 50 (ALEP)
נ פלטים מחרב הלכו אל תעמדו זכרו מרחוק את יהוה וירושלם תעלה על לבבכם
ירמיה 51 : 51 (ALEP)
נא בשנו כי שמענו חרפה כסתה כלמה פנינו כי באו זרים על מקדשי בית יהוה {פ}
ירמיה 51 : 52 (ALEP)
נב לכן הנה ימים באים נאם יהוה ופקדתי על פסיליה ובכל ארצה יאנק חלל
ירמיה 51 : 53 (ALEP)
נג כי תעלה בבל השמים וכי תבצר מרום עזה מאתי יבאו שדדים לה--נאם יהוה {ס}
ירמיה 51 : 54 (ALEP)
נד קול זעקה מבבל ושבר גדול מארץ כשדים
ירמיה 51 : 55 (ALEP)
נה כי שדד יהוה את בבל ואבד ממנה קול גדול והמו גליהם כמים רבים נתן שאון קולם
ירמיה 51 : 56 (ALEP)
נו כי בא עליה על בבל שודד ונלכדו גבוריה חתתה קשתותם כי אל גמלות יהוה שלם ישלם
ירמיה 51 : 57 (ALEP)
נז והשכרתי שריה וחכמיה פחותיה וסגניה וגבוריה וישנו שנת עולם ולא יקיצו נאם המלך--יהוה צבאות שמו {ס}
ירמיה 51 : 58 (ALEP)
נח כה אמר יהוה צבאות חמות בבל הרחבה ערער תתערער ושעריה הגבהים באש יצתו ויגעו עמים בדי ריק ולאמים בדי אש ויעפו {ס}
ירמיה 51 : 59 (ALEP)
נט הדבר אשר צוה ירמיהו הנביא את שריה בן נריה בן מחסיה בלכתו את צדקיהו מלך יהודה בבל בשנת הרבעית למלכו ושריה שר מנוחה
ירמיה 51 : 60 (ALEP)
ס ויכתב ירמיהו את כל הרעה אשר תבוא אל בבל--אל ספר אחד את כל הדברים האלה הכתבים אל בבל
ירמיה 51 : 61 (ALEP)
סא ויאמר ירמיהו אל שריה כבאך בבל--וראית וקראת את כל הדברים האלה
ירמיה 51 : 62 (ALEP)
סב ואמרת יהוה אתה דברת אל המקום הזה להכריתו לבלתי היות בו יושב למאדם ועד בהמה כי שממות עולם תהיה
ירמיה 51 : 63 (ALEP)
סג והיה ככלתך לקרא את הספר הזה תקשר עליו אבן והשלכתו אל תוך פרת
ירמיה 51 : 64 (ALEP)
סד ואמרת ככה תשקע בבל ולא תקום מפני הרעה אשר אנכי מביא עליה--ויעפו עד הנה דברי ירמיהו {פ}
❮
❯