ירמיה 5 : 1 (ALEP)
א שוטטו בחוצות ירושלם וראו נא ודעו ובקשו ברחובותיה אם תמצאו איש אם יש עשה משפט מבקש אמונה--ואסלח לה
ירמיה 5 : 2 (ALEP)
ב ואם חי יהוה יאמרו לכן לשקר ישבעו
ירמיה 5 : 3 (ALEP)
ג יהוה עיניך הלוא לאמונה--הכיתה אתם ולא חלו כליתם מאנו קחת מוסר חזקו פניהם מסלע מאנו לשוב
ירמיה 5 : 4 (ALEP)
ד ואני אמרתי אך דלים הם נואלו--כי לא ידעו דרך יהוה משפט אלהיהם
ירמיה 5 : 5 (ALEP)
ה אלכה לי אל הגדלים ואדברה אותם--כי המה ידעו דרך יהוה משפט אלהיהם אך המה יחדו שברו על נתקו מוסרות
ירמיה 5 : 6 (ALEP)
ו על כן הכם אריה מיער זאב ערבות ישדדם--נמר שקד על עריהם כל היוצא מהנה יטרף כי רבו פשעיהם עצמו משבותיהם
ירמיה 5 : 7 (ALEP)
ז אי לזאת אסלוח (אסלח) לך--בניך עזבוני וישבעו בלא אלהים ואשבע אותם וינאפו ובית זונה יתגודדו
ירמיה 5 : 8 (ALEP)
ח סוסים מיזנים משכים היו איש אל אשת רעהו יצהלו
ירמיה 5 : 9 (ALEP)
ט העל אלה לוא אפקד נאם יהוה ואם בגוי אשר כזה לא תתנקם נפשי ס
ירמיה 5 : 10 (ALEP)
י עלו בשרותיה ושחתו וכלה אל תעשו הסירו נטישותיה כי לוא ליהוה המה
ירמיה 5 : 11 (ALEP)
יא כי בגוד בגדו בי בית ישראל ובית יהודה--נאם יהוה
ירמיה 5 : 12 (ALEP)
יב כחשו ביהוה ויאמרו לוא הוא ולא תבוא עלינו רעה וחרב ורעב לוא נראה
ירמיה 5 : 13 (ALEP)
יג והנביאים יהיו לרוח והדבר אין בהם כה יעשה להם ס
ירמיה 5 : 14 (ALEP)
יד לכן כה אמר יהוה אלהי צבאות יען דברכם את הדבר הזה הנני נתן דברי בפיך לאש והעם הזה עצים--ואכלתם
ירמיה 5 : 15 (ALEP)
טו הנני מביא עליכם גוי ממרחק בית ישראל נאם יהוה גוי איתן הוא גוי מעולם הוא--גוי לא תדע לשנו ולא תשמע מה ידבר
ירמיה 5 : 16 (ALEP)
טז אשפתו כקבר פתוח כלם גבורים
ירמיה 5 : 17 (ALEP)
יז ואכל קצירך ולחמך יאכלו בניך ובנותיך--יאכל צאנך ובקרך יאכל גפנך ותאנתך ירשש ערי מבצריך אשר אתה בטח בהנה--בחרב
ירמיה 5 : 18 (ALEP)
יח וגם בימים ההמה נאם יהוה לא אעשה אתכם כלה
ירמיה 5 : 19 (ALEP)
יט והיה כי תאמרו תחת מה עשה יהוה אלהינו לנו את כל אלה ואמרת אליהם כאשר עזבתם אותי ותעבדו אלהי נכר בארצכם--כן תעבדו זרים בארץ לא לכם פ
ירמיה 5 : 20 (ALEP)
כ הגידו זאת בבית יעקב והשמיעוה ביהודה לאמר
ירמיה 5 : 21 (ALEP)
כא שמעו נא זאת עם סכל ואין לב עינים להם ולא יראו אזנים להם ולא ישמעו
ירמיה 5 : 22 (ALEP)
כב האותי לא תיראו נאם יהוה אם מפני לא תחילו אשר שמתי חול גבול לים חק עולם ולא יעברנהו ויתגעשו ולא יוכלו והמו גליו ולא יעברנהו
ירמיה 5 : 23 (ALEP)
כג ולעם הזה היה לב סורר ומורה סרו וילכו
ירמיה 5 : 24 (ALEP)
כד ולוא אמרו בלבבם נירא נא את יהוה אלהינו הנתן גשם וירה (יורה) ומלקוש בעתו שבעת חקות קציר ישמר לנו
ירמיה 5 : 25 (ALEP)
כה עונותיכם הטו אלה וחטאותיכם מנעו הטוב מכם
ירמיה 5 : 26 (ALEP)
כו כי נמצאו בעמי רשעים ישור כשך יקושים הציבו משחית אנשים ילכדו
ירמיה 5 : 27 (ALEP)
כז ככלוב מלא עוף כן בתיהם מלאים מרמה על כן גדלו ויעשירו
ירמיה 5 : 28 (ALEP)
כח שמנו עשתו גם עברו דברי רע--דין לא דנו דין יתום ויצליחו ומשפט אביונים לא שפטו
ירמיה 5 : 29 (ALEP)
כט העל אלה לא אפקד נאם יהוה אם בגוי אשר כזה לא תתנקם נפשי ס
ירמיה 5 : 30 (ALEP)
ל שמה ושערורה נהיתה בארץ
ירמיה 5 : 31 (ALEP)
לא הנבאים נבאו בשקר והכהנים ירדו על ידיהם ועמי אהבו כן ומה תעשו לאחריתה
❮
❯