ירמיה 46 : 1 (ALEP)
א אשר היה דבר יהוה אל ירמיהו הנביא על הגוים
ירמיה 46 : 2 (ALEP)
ב למצרים על חיל פרעה נכו מלך מצרים אשר היה על נהר פרת בכרכמש--אשר הכה נבוכדראצר מלך בבל בשנת הרביעית ליהויקים בן יאשיהו מלך יהודה
ירמיה 46 : 3 (ALEP)
ג ערכו מגן וצנה וגשו למלחמה
ירמיה 46 : 4 (ALEP)
ד אסרו הסוסים ועלו הפרשים והתיצבו בכובעים מרקו הרמחים לבשו הסרינת
ירמיה 46 : 5 (ALEP)
ה מדוע ראיתי המה חתים נסגים אחור וגבוריהם יכתו ומנוס נסו ולא הפנו--מגור מסביב נאם יהוה
ירמיה 46 : 6 (ALEP)
ו אל ינוס הקל ואל ימלט הגבור צפונה על יד נהר פרת כשלו ונפלו
ירמיה 46 : 7 (ALEP)
ז מי זה כיאר יעלה כנהרות יתגעשו מימיו
ירמיה 46 : 8 (ALEP)
ח מצרים כיאר יעלה וכנהרות יתגעשו מים ויאמר אעלה אכסה ארץ אבידה עיר וישבי בה
ירמיה 46 : 9 (ALEP)
ט עלו הסוסים והתהללו הרכב ויצאו הגבורים--כוש ופוט תפשי מגן ולודים תפשי דרכי קשת
ירמיה 46 : 10 (ALEP)
י והיום ההוא לאדני יהוה צבאות יום נקמה להנקם מצריו ואכלה חרב ושבעה ורותה מדמם כי זבח לאדני יהוה צבאות בארץ צפון--אל נהר פרת
ירמיה 46 : 11 (ALEP)
יא עלי גלעד וקחי צרי בתולת בת מצרים לשוא הרביתי (הרבית) רפאות תעלה אין לך
ירמיה 46 : 12 (ALEP)
יב שמעו גוים קלונך וצוחתך מלאה הארץ כי גבור בגבור כשלו יחדיו נפלו שניהם {פ}
ירמיה 46 : 13 (ALEP)
יג הדבר אשר דבר יהוה אל ירמיהו הנביא--לבוא נבוכדראצר מלך בבל להכות את ארץ מצרים
ירמיה 46 : 14 (ALEP)
יד הגידו במצרים והשמיעו במגדול והשמיעו בנף ובתחפנחס אמרו התיצב והכן לך--כי אכלה חרב סביביך
ירמיה 46 : 15 (ALEP)
טו מדוע נסחף אביריך לא עמד כי יהוה הדפו
ירמיה 46 : 16 (ALEP)
טז הרבה כושל גם נפל איש אל רעהו ויאמרו קומה ונשבה אל עמנו ואל ארץ מולדתנו מפני חרב היונה
ירמיה 46 : 17 (ALEP)
יז קראו שם פרעה מלך מצרים שאון העביר המועד
ירמיה 46 : 18 (ALEP)
יח חי אני נאם המלך--יהוה צבאות שמו כי כתבור בהרים וככרמל בים יבוא
ירמיה 46 : 19 (ALEP)
יט כלי גולה עשי לך יושבת בת מצרים כי נף לשמה תהיה ונצתה מאין יושב {ס}
ירמיה 46 : 20 (ALEP)
כ עגלה יפה פיה מצרים קרץ מצפון בא בא
ירמיה 46 : 21 (ALEP)
כא גם שכריה בקרבה כעגלי מרבק כי גם המה הפנו נסו יחדיו לא עמדו כי יום אידם בא עליהם עת פקדתם
ירמיה 46 : 22 (ALEP)
כב קולה כנחש ילך כי בחיל ילכו--ובקרדמות באו לה כחטבי עצים
ירמיה 46 : 23 (ALEP)
כג כרתו יערה נאם יהוה כי לא יחקר כי רבו מארבה ואין להם מספר
ירמיה 46 : 24 (ALEP)
כד הבישה בת מצרים נתנה ביד עם צפון
ירמיה 46 : 25 (ALEP)
כה אמר יהוה צבאות אלהי ישראל הנני פוקד אל אמון מנא ועל פרעה ועל מצרים ועל אלהיה ועל מלכיה ועל פרעה--ועל הבטחים בו
ירמיה 46 : 26 (ALEP)
כו ונתתים ביד מבקשי נפשם וביד נבוכדראצר מלך בבל וביד עבדיו ואחרי כן תשכן כימי קדם נאם יהוה {פ}
ירמיה 46 : 27 (ALEP)
כז ואתה אל תירא עבדי יעקב ואל תחת ישראל--כי הנני מושעך מרחוק ואת זרעך מארץ שבים ושב יעקוב ושקט ושאנן ואין מחריד
ירמיה 46 : 28 (ALEP)
כח אתה אל תירא עבדי יעקב נאם יהוה--כי אתך אני כי אעשה כלה בכל הגוים אשר הדחתיך שמה ואתך לא אעשה כלה ויסרתיך למשפט ונקה לא אנקך {פ}
❮
❯