ירמיה 4 : 1 (ALEP)
א אם תשוב ישראל נאם יהוה אלי תשוב ואם תסיר שקוציך מפני ולא תנוד
ירמיה 4 : 2 (ALEP)
ב ונשבעת חי יהוה באמת במשפט ובצדקה והתברכו בו גוים ובו יתהללו ס
ירמיה 4 : 3 (ALEP)
ג כי כה אמר יהוה לאיש יהודה ולירושלם נירו לכם ניר ואל תזרעו אל קצים
ירמיה 4 : 4 (ALEP)
ד המלו ליהוה והסרו ערלות לבבכם איש יהודה וישבי ירושלם פן תצא כאש חמתי ובערה ואין מכבה--מפני רע מעלליכם
ירמיה 4 : 5 (ALEP)
ה הגידו ביהודה ובירושלם השמיעו ואמרו ותקעו (תקעו) שופר בארץ קראו מלאו ואמרו האספו ונבואה אל ערי המבצר
ירמיה 4 : 6 (ALEP)
ו שאו נס ציונה העיזו אל תעמדו כי רעה אנכי מביא מצפון--ושבר גדול
ירמיה 4 : 7 (ALEP)
ז עלה אריה מסבכו ומשחית גוים נסע יצא ממקמו--לשום ארצך לשמה עריך תצינה מאין יושב
ירמיה 4 : 8 (ALEP)
ח על זאת חגרו שקים ספדו והילילו כי לא שב חרון אף יהוה ממנו פ
ירמיה 4 : 9 (ALEP)
ט והיה ביום ההוא נאם יהוה יאבד לב המלך ולב השרים ונשמו הכהנים והנבאים יתמהו ס
ירמיה 4 : 10 (ALEP)
י ואמר אהה אדני יהוה אכן השא השאת לעם הזה ולירושלם לאמר שלום יהיה לכם ונגעה חרב עד הנפש
ירמיה 4 : 11 (ALEP)
יא בעת ההיא יאמר לעם הזה ולירושלם רוח צח שפים במדבר דרך בת עמי--לוא לזרות ולוא להבר
ירמיה 4 : 12 (ALEP)
יב רוח מלא מאלה יבוא לי עתה גם אני אדבר משפטים אותם
ירמיה 4 : 13 (ALEP)
יג הנה כעננים יעלה וכסופה מרכבותיו--קלו מנשרים סוסיו אוי לנו כי שדדנו
ירמיה 4 : 14 (ALEP)
יד כבסי מרעה לבך ירושלם למען תושעי עד מתי תלין בקרבך מחשבות אונך
ירמיה 4 : 15 (ALEP)
טו כי קול מגיד מדן ומשמיע און מהר אפרים
ירמיה 4 : 16 (ALEP)
טז הזכירו לגוים הנה השמיעו על ירושלם נצרים באים מארץ המרחק ויתנו על ערי יהודה קולם
ירמיה 4 : 17 (ALEP)
יז כשמרי שדי היו עליה מסביב כי אתי מרתה נאם יהוה
ירמיה 4 : 18 (ALEP)
יח דרכך ומעלליך עשו אלה לך זאת רעתך כי מר כי נגע עד לבך פ
ירמיה 4 : 19 (ALEP)
יט מעי מעי אחולה (אחילה) קירות לבי המה לי לבי--לא אחרש כי קול שופר שמעתי (שמעת) נפשי תרועת מלחמה
ירמיה 4 : 20 (ALEP)
כ שבר על שבר נקרא כי שדדה כל הארץ פתאם שדדו אהלי רגע יריעתי
ירמיה 4 : 21 (ALEP)
כא עד מתי אראה נס--אשמעה קול שופר פ
ירמיה 4 : 22 (ALEP)
כב כי אויל עמי אותי לא ידעו--בנים סכלים המה ולא נבונים המה חכמים המה להרע ולהיטיב לא ידעו
ירמיה 4 : 23 (ALEP)
כג ראיתי את הארץ והנה תהו ובהו ואל השמים ואין אורם
ירמיה 4 : 24 (ALEP)
כד ראיתי ההרים והנה רעשים וכל הגבעות התקלקלו
ירמיה 4 : 25 (ALEP)
כה ראיתי והנה אין האדם וכל עוף השמים נדדו
ירמיה 4 : 26 (ALEP)
כו ראיתי והנה הכרמל המדבר וכל עריו נתצו מפני יהוה--מפני חרון אפו ס
ירמיה 4 : 27 (ALEP)
כז כי כה אמר יהוה שממה תהיה כל הארץ וכלה לא אעשה
ירמיה 4 : 28 (ALEP)
כח על זאת תאבל הארץ וקדרו השמים ממעל--על כי דברתי זמתי ולא נחמתי ולא אשוב ממנה
ירמיה 4 : 29 (ALEP)
כט מקול פרש ורמה קשת ברחת כל העיר--באו בעבים ובכפים עלו כל העיר עזובה ואין יושב בהן איש
ירמיה 4 : 30 (ALEP)
ל ואתי (ואת) שדוד מה תעשי כי תלבשי שני כי תעדי עדי זהב כי תקרעי בפוך עיניך--לשוא תתיפי מאסו בך עגבים נפשך יבקשו
ירמיה 4 : 31 (ALEP)
לא כי קול כחולה שמעתי צרה כמבכירה--קול בת ציון תתיפח תפרש כפיה אוי נא לי כי עיפה נפשי להרגים פ
❮
❯