ירמיה 37 : 1 (ALEP)
א וימלך מלך--צדקיהו בן יאשיהו תחת כניהו בן יהויקים אשר המליך נבוכדראצר מלך בבל בארץ יהודה
ירמיה 37 : 2 (ALEP)
ב ולא שמע הוא ועבדיו ועם הארץ אל דברי יהוה--אשר דבר ביד ירמיהו הנביא
ירמיה 37 : 3 (ALEP)
ג וישלח המלך צדקיהו את יהוכל בן שלמיה ואת צפניהו בן מעשיה הכהן אל ירמיהו הנביא לאמר התפלל נא בעדנו אל יהוה אלהינו
ירמיה 37 : 4 (ALEP)
ד וירמיהו בא ויצא בתוך העם ולא נתנו אתו בית הכליא (הכלוא)
ירמיה 37 : 5 (ALEP)
ה וחיל פרעה יצא ממצרים וישמעו הכשדים הצרים על ירושלם את שמעם ויעלו מעל ירושלם {פ}
ירמיה 37 : 6 (ALEP)
ו ויהי דבר יהוה אל ירמיהו הנביא לאמר
ירמיה 37 : 7 (ALEP)
ז כה אמר יהוה אלהי ישראל כה תאמרו אל מלך יהודה השלח אתכם אלי לדרשני הנה חיל פרעה היצא לכם לעזרה שב לארצו מצרים
ירמיה 37 : 8 (ALEP)
ח ושבו הכשדים ונלחמו על העיר הזאת ולכדה ושרפה באש {פ}
ירמיה 37 : 9 (ALEP)
ט כה אמר יהוה אל תשאו נפשתיכם לאמר הלך ילכו מעלינו הכשדים כי לא ילכו
ירמיה 37 : 10 (ALEP)
י כי אם הכיתם כל חיל כשדים הנלחמים אתכם ונשארו בם אנשים מדקרים--איש באהלו יקומו ושרפו את העיר הזאת באש
ירמיה 37 : 11 (ALEP)
יא והיה בהעלות חיל הכשדים מעל ירושלם--מפני חיל פרעה {ס}
ירמיה 37 : 12 (ALEP)
יב ויצא ירמיהו מירושלם ללכת ארץ בנימן לחלק משם בתוך העם
ירמיה 37 : 13 (ALEP)
יג ויהי הוא בשער בנימן ושם בעל פקדת ושמו יראייה בן שלמיה בן חנניה ויתפש את ירמיהו הנביא לאמר אל הכשדים אתה נפל
ירמיה 37 : 14 (ALEP)
יד ויאמר ירמיהו שקר אינני נפל על הכשדים--ולא שמע אליו ויתפש יראייה בירמיהו ויבאהו אל השרים
ירמיה 37 : 15 (ALEP)
טו ויקצפו השרים על ירמיהו והכו אתו ונתנו אותו בית האסור בית יהונתן הספר--כי אתו עשו לבית הכלא
ירמיה 37 : 16 (ALEP)
טז כי בא ירמיהו אל בית הבור ואל החניות וישב שם ירמיהו ימים רבים
ירמיה 37 : 17 (ALEP)
יז וישלח המלך צדקיהו ויקחהו וישאלהו המלך בביתו בסתר ויאמר היש דבר מאת יהוה ויאמר ירמיהו יש ויאמר ביד מלך בבל תנתן
ירמיה 37 : 18 (ALEP)
יח ויאמר ירמיהו אל המלך צדקיהו מה חטאתי לך ולעבדיך ולעם הזה כי נתתם אותי אל בית הכלא
ירמיה 37 : 19 (ALEP)
יט ואיו (ואיה) נביאיכם אשר נבאו לכם לאמר לא יבא מלך בבל עליכם ועל הארץ הזאת
ירמיה 37 : 20 (ALEP)
כ ועתה שמע נא אדני המלך תפל נא תחנתי לפניך ואל תשבני בית יהונתן הספר ולא אמות שם
ירמיה 37 : 21 (ALEP)
כא ויצוה המלך צדקיהו ויפקדו את ירמיהו בחצר המטרה ונתן לו ככר לחם ליום מחוץ האפים עד תם כל הלחם מן העיר וישב ירמיהו בחצר המטרה
❮
❯