ירמיה 35 : 1 (ALEP)
א הדבר אשר היה אל ירמיהו מאת יהוה בימי יהויקים בן יאשיהו מלך יהודה לאמר
ירמיה 35 : 2 (ALEP)
ב הלוך אל בית הרכבים ודברת אותם והבאותם בית יהוה אל אחת הלשכות והשקית אותם יין
ירמיה 35 : 3 (ALEP)
ג ואקח את יאזניה בן ירמיהו בן חבצניה ואת אחיו ואת כל בניו--ואת כל בית הרכבים
ירמיה 35 : 4 (ALEP)
ד ואבא אתם בית יהוה אל לשכת בני חנן בן יגדליהו איש האלהים--אשר אצל לשכת השרים אשר ממעל ללשכת מעשיהו בן שלם שמר הסף
ירמיה 35 : 5 (ALEP)
ה ואתן לפני בני בית הרכבים גבעים מלאים יין--וכסות ואמר אליהם שתו יין
ירמיה 35 : 6 (ALEP)
ו ויאמרו לא נשתה יין כי יונדב בן רכב אבינו צוה עלינו לאמר לא תשתו יין אתם ובניכם עד עולם
ירמיה 35 : 7 (ALEP)
ז ובית לא תבנו וזרע לא תזרעו וכרם לא תטעו ולא יהיה לכם כי באהלים תשבו כל ימיכם למען תחיו ימים רבים על פני האדמה אשר אתם גרים שם
ירמיה 35 : 8 (ALEP)
ח ונשמע בקול יהונדב בן רכב אבינו לכל אשר צונו לבלתי שתות יין כל ימינו--אנחנו נשינו בנינו ובנתינו
ירמיה 35 : 9 (ALEP)
ט ולבלתי בנות בתים לשבתנו וכרם ושדה וזרע לא יהיה לנו
ירמיה 35 : 10 (ALEP)
י ונשב באהלים ונשמע ונעש ככל אשר צונו יונדב אבינו
ירמיה 35 : 11 (ALEP)
יא ויהי בעלות נבוכדראצר מלך בבל אל הארץ ונאמר באו ונבוא ירושלם מפני חיל הכשדים ומפני חיל ארם ונשב בירושלם פ
ירמיה 35 : 12 (ALEP)
יב ויהי דבר יהוה אל ירמיהו לאמר
ירמיה 35 : 13 (ALEP)
יג כה אמר יהוה צבאות אלהי ישראל הלך ואמרת לאיש יהודה וליושבי ירושלם הלוא תקחו מוסר לשמע אל דברי נאם יהוה
ירמיה 35 : 14 (ALEP)
יד הוקם את דברי יהונדב בן רכב אשר צוה את בניו לבלתי שתות יין ולא שתו עד היום הזה--כי שמעו את מצות אביהם ואנכי דברתי אליכם השכם ודבר--ולא שמעתם אלי
ירמיה 35 : 15 (ALEP)
טו ואשלח אליכם את כל עבדי הנבאים השכם ושלח לאמר שבו נא איש מדרכו הרעה והיטיבו מעלליכם ואל תלכו אחרי אלהים אחרים לעבדם ושבו אל האדמה אשר נתתי לכם ולאבתיכם ולא הטיתם את אזנכם ולא שמעתם אלי
ירמיה 35 : 16 (ALEP)
טז כי הקימו בני יהונדב בן רכב את מצות אביהם אשר צום והעם הזה לא שמעו אלי
ירמיה 35 : 17 (ALEP)
יז לכן כה אמר יהוה אלהי צבאות אלהי ישראל הנני מביא אל יהודה ואל כל יושבי ירושלם את כל הרעה אשר דברתי עליהם יען דברתי אליהם ולא שמעו ואקרא להם ולא ענו
ירמיה 35 : 18 (ALEP)
יח ולבית הרכבים אמר ירמיהו כה אמר יהוה צבאות אלהי ישראל יען אשר שמעתם על מצות יהונדב אביכם ותשמרו את כל מצותיו ותעשו ככל אשר צוה אתכם
ירמיה 35 : 19 (ALEP)
יט לכן כה אמר יהוה צבאות--אלהי ישראל לא יכרת איש ליונדב בן רכב עמד לפני--כל הימים פ
❮
❯
1
2
3
4
5
6
7
8
9
10
11
12
13
14
15
16
17
18
19