ירמיה 31 : 1 (ALEP)
א כה אמר יהוה מצא חן במדבר עם שרידי חרב הלוך להרגיעו ישראל
ירמיה 31 : 2 (ALEP)
ב מרחוק יהוה נראה לי ואהבת עולם אהבתיך על כן משכתיך חסד
ירמיה 31 : 3 (ALEP)
ג עוד אבנך ונבנית בתולת ישראל עוד תעדי תפיך ויצאת במחול משחקים
ירמיה 31 : 4 (ALEP)
ד עוד תטעי כרמים בהרי שמרון נטעו נטעים וחללו
ירמיה 31 : 5 (ALEP)
ה כי יש יום קראו נצרים בהר אפרים קומו ונעלה ציון אל יהוה אלהינו פ
ירמיה 31 : 6 (ALEP)
ו כי כה אמר יהוה רנו ליעקב שמחה וצהלו בראש הגוים השמיעו הללו ואמרו הושע יהוה את עמך את שארית ישראל
ירמיה 31 : 7 (ALEP)
ז הנני מביא אותם מארץ צפון וקבצתים מירכתי ארץ--בם עור ופסח הרה וילדת יחדו קהל גדול ישובו הנה
ירמיה 31 : 8 (ALEP)
ח בבכי יבאו ובתחנונים אובילם--אוליכם אל נחלי מים בדרך ישר לא יכשלו בה כי הייתי לישראל לאב ואפרים בכרי הוא ס
ירמיה 31 : 9 (ALEP)
ט שמעו דבר יהוה גוים והגידו באיים ממרחק ואמרו מזרה ישראל יקבצנו ושמרו כרעה עדרו
ירמיה 31 : 10 (ALEP)
י כי פדה יהוה את יעקב וגאלו מיד חזק ממנו
ירמיה 31 : 11 (ALEP)
יא ובאו ורננו במרום ציון ונהרו אל טוב יהוה על דגן ועל תירש ועל יצהר ועל בני צאן ובקר והיתה נפשם כגן רוה ולא יוסיפו לדאבה עוד
ירמיה 31 : 12 (ALEP)
יב אז תשמח בתולה במחול ובחרים וזקנים יחדו והפכתי אבלם לששון ונחמתים ושמחתים מיגונם
ירמיה 31 : 13 (ALEP)
יג ורויתי נפש הכהנים דשן ועמי את טובי ישבעו נאם יהוה ס
ירמיה 31 : 14 (ALEP)
יד כה אמר יהוה קול ברמה נשמע נהי בכי תמרורים--רחל מבכה על בניה מאנה להנחם על בניה כי איננו ס
ירמיה 31 : 15 (ALEP)
טו כה אמר יהוה מנעי קולך מבכי ועיניך מדמעה כי יש שכר לפעלתך נאם יהוה ושבו מארץ אויב
ירמיה 31 : 16 (ALEP)
טז ויש תקוה לאחריתך נאם יהוה ושבו בנים לגבולם ס
ירמיה 31 : 17 (ALEP)
יז שמוע שמעתי אפרים מתנודד יסרתני ואוסר כעגל לא למד השבני ואשובה כי אתה יהוה אלהי
ירמיה 31 : 18 (ALEP)
יח כי אחרי שובי נחמתי ואחרי הודעי ספקתי על ירך בשתי וגם נכלמתי כי נשאתי חרפת נעורי
ירמיה 31 : 19 (ALEP)
יט הבן יקיר לי אפרים אם ילד שעשעים--כי מדי דברי בו זכר אזכרנו עוד על כן המו מעי לו--רחם ארחמנו נאם יהוה ס
ירמיה 31 : 20 (ALEP)
כ הציבי לך צינים שמי לך תמרורים--שתי לבך למסלה דרך הלכתי (הלכת) שובי בתולת ישראל שבי אל עריך אלה
ירמיה 31 : 21 (ALEP)
כא עד מתי תתחמקין הבת השובבה כי ברא יהוה חדשה בארץ נקבה תסובב גבר ס
ירמיה 31 : 22 (ALEP)
כב כה אמר יהוה צבאות אלהי ישראל עוד יאמרו את הדבר הזה בארץ יהודה ובעריו בשובי את שבותם יברכך יהוה נוה צדק הר הקדש
ירמיה 31 : 23 (ALEP)
כג וישבו בה יהודה וכל עריו יחדו אכרים ונסעו בעדר
ירמיה 31 : 24 (ALEP)
כד כי הרויתי נפש עיפה וכל נפש דאבה מלאתי
ירמיה 31 : 25 (ALEP)
כה על זאת הקיצתי ואראה ושנתי ערבה לי ס
ירמיה 31 : 26 (ALEP)
כו הנה ימים באים נאם יהוה וזרעתי את בית ישראל ואת בית יהודה זרע אדם וזרע בהמה
ירמיה 31 : 27 (ALEP)
כז והיה כאשר שקדתי עליהם לנתוש ולנתוץ ולהרס--ולהאביד ולהרע כן אשקד עליהם לבנות ולנטוע נאם יהוה
ירמיה 31 : 28 (ALEP)
כח בימים ההם--לא יאמרו עוד אבות אכלו בסר ושני בנים תקהינה
ירמיה 31 : 29 (ALEP)
כט כי אם איש בעונו ימות כל האדם האכל הבסר תקהינה שניו ס
ירמיה 31 : 30 (ALEP)
ל הנה ימים באים נאם יהוה וכרתי את בית ישראל ואת בית יהודה--ברית חדשה
ירמיה 31 : 31 (ALEP)
לא לא כברית אשר כרתי את אבותם ביום החזיקי בידם להוציאם מארץ מצרים אשר המה הפרו את בריתי ואנכי בעלתי בם--נאם יהוה
ירמיה 31 : 32 (ALEP)
לב כי זאת הברית אשר אכרת את בית ישראל אחרי הימים ההם נאם יהוה נתתי את תורתי בקרבם ועל לבם אכתבנה והייתי להם לאלהים והמה יהיו לי לעם
ירמיה 31 : 33 (ALEP)
לג ולא ילמדו עוד איש את רעהו ואיש את אחיו לאמר דעו את יהוה כי כולם ידעו אותי למקטנם ועד גדולם נאם יהוה--כי אסלח לעונם ולחטאתם לא אזכר עוד ס
ירמיה 31 : 34 (ALEP)
לד כה אמר יהוה נתן שמש לאור יומם חקת ירח וכוכבים לאור לילה רגע הים ויהמו גליו יהוה צבאות שמו
ירמיה 31 : 35 (ALEP)
לה אם ימשו החקים האלה מלפני--נאם יהוה גם זרע ישראל ישבתו מהיות גוי לפני--כל הימים ס
ירמיה 31 : 36 (ALEP)
לו כה אמר יהוה אם ימדו שמים מלמעלה ויחקרו מוסדי ארץ למטה גם אני אמאס בכל זרע ישראל על כל אשר עשו--נאם יהוה ס
ירמיה 31 : 37 (ALEP)
לז הנה ימים (באים) נאם יהוה ונבנתה העיר ליהוה ממגדל חננאל שער הפנה
ירמיה 31 : 38 (ALEP)
לח ויצא עוד קוה (קו) המדה נגדו על גבעת גרב ונסב געתה
ירמיה 31 : 39 (ALEP)
לט וכל העמק הפגרים והדשן וכל השרמות (השדמות) עד נחל קדרון עד פנת שער הסוסים מזרחה--קדש ליהוה לא ינתש ולא יהרס עוד לעולם פ
❮
❯