ירמיה 3 : 1 (ALEP)
א לאמר הן ישלח איש את אשתו והלכה מאתו והיתה לאיש אחר הישוב אליה עוד--הלוא חנוף תחנף הארץ ההיא ואת זנית רעים רבים--ושוב אלי נאם יהוה
ירמיה 3 : 2 (ALEP)
ב שאי עיניך על שפים וראי איפה לא שגלת (שכבת)--על דרכים ישבת להם כערבי במדבר ותחניפי ארץ בזנותיך וברעתך
ירמיה 3 : 3 (ALEP)
ג וימנעו רבבים ומלקוש לוא היה ומצח אשה זונה היה לך מאנת הכלם
ירמיה 3 : 4 (ALEP)
ד הלוא מעתה קראתי (קראת) לי אבי אלוף נערי אתה
ירמיה 3 : 5 (ALEP)
ה הינטר לעולם אם ישמר לנצח הנה דברת ותעשי הרעות ותוכל פ
ירמיה 3 : 6 (ALEP)
ו ויאמר יהוה אלי בימי יאשיהו המלך הראית אשר עשתה משבה ישראל הלכה היא על כל הר גבה ואל תחת כל עץ רענן--ותזני שם
ירמיה 3 : 7 (ALEP)
ז ואמר אחרי עשותה את כל אלה אלי תשוב--ולא שבה ותראה (ותרא) בגודה אחותה יהודה
ירמיה 3 : 8 (ALEP)
ח וארא כי על כל אדות אשר נאפה משבה ישראל שלחתיה ואתן את ספר כריתתיה אליה ולא יראה בגדה יהודה אחותה--ותלך ותזן גם היא
ירמיה 3 : 9 (ALEP)
ט והיה מקל זנותה ותחנף את הארץ ותנאף את האבן ואת העץ
ירמיה 3 : 10 (ALEP)
י וגם בכל זאת לא שבה אלי בגודה אחותה יהודה--בכל לבה כי אם בשקר נאם יהוה ס
ירמיה 3 : 11 (ALEP)
יא ויאמר יהוה אלי צדקה נפשה משבה ישראל מבגדה יהודה
ירמיה 3 : 12 (ALEP)
יב הלך וקראת את הדברים האלה צפונה ואמרת שובה משבה ישראל נאם יהוה--לוא אפיל פני בכם כי חסיד אני נאם יהוה לא אטור לעולם
ירמיה 3 : 13 (ALEP)
יג אך דעי עונך כי ביהוה אלהיך פשעת ותפזרי את דרכיך לזרים תחת כל עץ רענן ובקולי לא שמעתם נאם יהוה
ירמיה 3 : 14 (ALEP)
יד שובו בנים שובבים נאם יהוה כי אנכי בעלתי בכם ולקחתי אתכם אחד מעיר ושנים ממשפחה והבאתי אתכם ציון
ירמיה 3 : 15 (ALEP)
טו ונתתי לכם רעים כלבי ורעו אתכם דעה והשכיל
ירמיה 3 : 16 (ALEP)
טז והיה כי תרבו ופריתם בארץ בימים ההמה נאם יהוה--לא יאמרו עוד ארון ברית יהוה ולא יעלה על לב ולא יזכרו בו ולא יפקדו ולא יעשה עוד
ירמיה 3 : 17 (ALEP)
יז בעת ההיא יקראו לירושלם כסא יהוה ונקוו אליה כל הגוים לשם יהוה לירושלם ולא ילכו עוד--אחרי שררות לבם הרע ס
ירמיה 3 : 18 (ALEP)
יח בימים ההמה ילכו בית יהודה על בית ישראל ויבאו יחדו מארץ צפון על הארץ אשר הנחלתי את אבותיכם
ירמיה 3 : 19 (ALEP)
יט ואנכי אמרתי איך אשיתך בבנים ואתן לך ארץ חמדה נחלת צבי צבאות גוים ואמר אבי תקראו (תקראי) לי ומאחרי לא תשובו (תשובי)
ירמיה 3 : 20 (ALEP)
כ אכן בגדה אשה מרעה כן בגדתם בי בית ישראל נאם יהוה
ירמיה 3 : 21 (ALEP)
כא קול על שפיים נשמע בכי תחנוני בני ישראל כי העוו את דרכם שכחו את יהוה אלהיהם
ירמיה 3 : 22 (ALEP)
כב שובו בנים שובבים ארפה משובתיכם הננו אתנו לך כי אתה יהוה אלהינו
ירמיה 3 : 23 (ALEP)
כג אכן לשקר מגבעות המון הרים אכן ביהוה אלהינו תשועת ישראל
ירמיה 3 : 24 (ALEP)
כד והבשת אכלה את יגיע אבותינו--מנעורינו את צאנם ואת בקרם את בניהם ואת בנותיהם
ירמיה 3 : 25 (ALEP)
כה נשכבה בבשתנו ותכסנו כלמתנו--כי ליהוה אלהינו חטאנו אנחנו ואבותינו מנעורינו ועד היום הזה ולא שמענו בקול יהוה אלהינו ס
❮
❯