ירמיה 22 : 1 (ALEP)
א כה אמר יהוה רד בית מלך יהודה ודברת שם את הדבר הזה
ירמיה 22 : 2 (ALEP)
ב ואמרת שמע דבר יהוה מלך יהודה הישב על כסא דוד אתה ועבדיך ועמך הבאים בשערים האלה
ירמיה 22 : 3 (ALEP)
ג כה אמר יהוה עשו משפט וצדקה והצילו גזול מיד עשוק וגר יתום ואלמנה אל תנו אל תחמסו ודם נקי אל תשפכו במקום הזה
ירמיה 22 : 4 (ALEP)
ד כי אם עשו תעשו את הדבר הזה--ובאו בשערי הבית הזה מלכים ישבים לדוד על כסאו רכבים ברכב ובסוסים הוא ועבדו ועמו
ירמיה 22 : 5 (ALEP)
ה ואם לא תשמעו את הדברים האלה--בי נשבעתי נאם יהוה כי לחרבה יהיה הבית הזה {פ}
ירמיה 22 : 6 (ALEP)
ו כי כה אמר יהוה על בית מלך יהודה גלעד אתה לי ראש הלבנון אם לא אשיתך מדבר ערים לא נושבה (נושבו)
ירמיה 22 : 7 (ALEP)
ז וקדשתי עליך משחתים איש וכליו וכרתו מבחר ארזיך והפילו על האש
ירמיה 22 : 8 (ALEP)
ח ועברו גוים רבים על העיר הזאת ואמרו איש אל רעהו על מה עשה יהוה ככה לעיר הגדולה הזאת
ירמיה 22 : 9 (ALEP)
ט ואמרו--על אשר עזבו את ברית יהוה אלהיהם וישתחוו לאלהים אחרים ויעבדום {ס}
ירמיה 22 : 10 (ALEP)
י אל תבכו למת ואל תנדו לו בכו בכו להלך--כי לא ישוב עוד וראה את ארץ מולדתו
ירמיה 22 : 11 (ALEP)
יא כי כה אמר יהוה אל שלם בן יאשיהו מלך יהודה המלך תחת יאשיהו אביו אשר יצא מן המקום הזה לא ישוב שם עוד
ירמיה 22 : 12 (ALEP)
יב כי במקום אשר הגלו אתו--שם ימות ואת הארץ הזאת לא יראה עוד {ס}
ירמיה 22 : 13 (ALEP)
יג הוי בנה ביתו בלא צדק ועליותיו בלא משפט ברעהו יעבד חנם ופעלו לא יתן לו
ירמיה 22 : 14 (ALEP)
יד האמר אבנה לי בית מדות ועליות מרוחים וקרע לו חלוני וספון בארז ומשוח בששר
ירמיה 22 : 15 (ALEP)
טו התמלך כי אתה מתחרה בארז אביך הלוא אכל ושתה ועשה משפט וצדקה--אז טוב לו
ירמיה 22 : 16 (ALEP)
טז דן דין עני ואביון אז טוב הלוא היא הדעת אתי נאם יהוה
ירמיה 22 : 17 (ALEP)
יז כי אין עיניך ולבך כי אם על בצעך ועל דם הנקי לשפוך ועל העשק ועל המרוצה לעשות {ס}
ירמיה 22 : 18 (ALEP)
יח לכן כה אמר יהוה אל יהויקים בן יאשיהו מלך יהודה לא יספדו לו הוי אחי והוי אחות לא יספדו לו הוי אדון והוי הדה
ירמיה 22 : 19 (ALEP)
יט קבורת חמור יקבר סחוב והשלך מהלאה לשערי ירושלם {ס}
ירמיה 22 : 20 (ALEP)
כ עלי הלבנון וצעקי ובבשן תני קולך וצעקי מעברים כי נשברו כל מאהביך
ירמיה 22 : 21 (ALEP)
כא דברתי אליך בשלותיך אמרת לא אשמע זה דרכך מנעוריך כי לא שמעת בקולי
ירמיה 22 : 22 (ALEP)
כב כל רעיך תרעה רוח ומאהביך בשבי ילכו כי אז תבשי ונכלמת מכל רעתך
ירמיה 22 : 23 (ALEP)
כג ישבתי (ישבת) בלבנון מקננתי (מקננת) בארזים מה נחנת בבא לך חבלים חיל כילדה
ירמיה 22 : 24 (ALEP)
כד חי אני נאם יהוה כי אם יהיה כניהו בן יהויקים מלך יהודה חותם על יד ימיני כי משם אתקנך
ירמיה 22 : 25 (ALEP)
כה ונתתיך ביד מבקשי נפשך וביד אשר אתה יגור מפניהם--וביד נבוכדראצר מלך בבל וביד הכשדים
ירמיה 22 : 26 (ALEP)
כו והטלתי אתך ואת אמך אשר ילדתך על הארץ אחרת אשר לא ילדתם שם ושם תמותו
ירמיה 22 : 27 (ALEP)
כז ועל הארץ אשר הם מנשאים את נפשם--לשוב שם שמה לא ישובו {פ}
ירמיה 22 : 28 (ALEP)
כח העצב נבזה נפוץ האיש הזה כניהו אם כלי אין חפץ בו מדוע הוטלו הוא וזרעו והשלכו על הארץ אשר לא ידעו
ירמיה 22 : 29 (ALEP)
כט ארץ ארץ ארץ--שמעי דבר יהוה
ירמיה 22 : 30 (ALEP)
ל כה אמר יהוה כתבו את האיש הזה ערירי--גבר לא יצלח בימיו כי לא יצלח מזרעו איש ישב על כסא דוד ומשל עוד ביהודה {פ}
❮
❯