ירמיה 16 : 1 (ALEP)
א ויהי דבר יהוה אלי לאמר
ירמיה 16 : 2 (ALEP)
ב לא תקח לך אשה ולא יהיו לך בנים ובנות במקום הזה ס
ירמיה 16 : 3 (ALEP)
ג כי כה אמר יהוה על הבנים ועל הבנות הילודים במקום הזה ועל אמתם הילדות אותם ועל אבותם המולדים אותם--בארץ הזאת
ירמיה 16 : 4 (ALEP)
ד ממותי תחלאים ימתו לא יספדו ולא יקברו--לדמן על פני האדמה יהיו ובחרב וברעב יכלו והיתה נבלתם למאכל לעוף השמים ולבהמת הארץ ס
ירמיה 16 : 5 (ALEP)
ה כי כה אמר יהוה אל תבוא בית מרזח ואל תלך לספוד ואל תנד להם כי אספתי את שלומי מאת העם הזה נאם יהוה--את החסד ואת הרחמים
ירמיה 16 : 6 (ALEP)
ו ומתו גדלים וקטנים בארץ הזאת לא יקברו ולא יספדו להם--ולא יתגדד ולא יקרח להם
ירמיה 16 : 7 (ALEP)
ז ולא יפרסו להם על אבל לנחמו על מת ולא ישקו אותם כוס תנחומים על אביו ועל אמו
ירמיה 16 : 8 (ALEP)
ח ובית משתה לא תבוא לשבת אותם לאכל ולשתות פ
ירמיה 16 : 9 (ALEP)
ט כי כה אמר יהוה צבאות אלהי ישראל הנני משבית מן המקום הזה לעיניכם ובימיכם--קול ששון וקול שמחה קול חתן וקול כלה
ירמיה 16 : 10 (ALEP)
י והיה כי תגיד לעם הזה את כל הדברים האלה ואמרו אליך על מה דבר יהוה עלינו את כל הרעה הגדולה הזאת ומה עוננו ומה חטאתנו אשר חטאנו ליהוה אלהינו
ירמיה 16 : 11 (ALEP)
יא ואמרת אליהם על אשר עזבו אבותיכם אותי נאם יהוה וילכו אחרי אלהים אחרים ויעבדום וישתחוו להם ואתי עזבו ואת תורתי לא שמרו
ירמיה 16 : 12 (ALEP)
יב ואתם הרעתם לעשות מאבותיכם והנכם הלכים איש אחרי שררות לבו הרע לבלתי שמע אלי
ירמיה 16 : 13 (ALEP)
יג והטלתי אתכם מעל הארץ הזאת על הארץ אשר לא ידעתם אתם ואבותיכם ועבדתם שם את אלהים אחרים יומם ולילה אשר לא אתן לכם חנינה פ
ירמיה 16 : 14 (ALEP)
יד לכן הנה ימים באים נאם יהוה ולא יאמר עוד חי יהוה אשר העלה את בני ישראל מארץ מצרים
ירמיה 16 : 15 (ALEP)
טו כי אם חי יהוה אשר העלה את בני ישראל מארץ צפון ומכל הארצות אשר הדיחם שמה והשבתים על אדמתם אשר נתתי לאבותם פ
ירמיה 16 : 16 (ALEP)
טז הנני שלח לדוגים (לדיגים) רבים נאם יהוה--ודיגום ואחרי כן אשלח לרבים צידים וצדום מעל כל הר ומעל כל גבעה ומנקיקי הסלעים
ירמיה 16 : 17 (ALEP)
יז כי עיני על כל דרכיהם לא נסתרו מלפני ולא נצפן עונם מנגד עיני
ירמיה 16 : 18 (ALEP)
יח ושלמתי ראשונה משנה עונם וחטאתם על חללם את ארצי בנבלת שקוציהם ותועבותיהם מלאו את נחלתי פ
ירמיה 16 : 19 (ALEP)
יט יהוה עזי ומעזי ומנוסי--ביום צרה אליך גוים יבאו מאפסי ארץ ויאמרו אך שקר נחלו אבותינו הבל ואין בם מועיל
ירמיה 16 : 20 (ALEP)
כ היעשה לו אדם אלהים והמה לא אלהים
ירמיה 16 : 21 (ALEP)
כא לכן הנני מודיעם בפעם הזאת אודיעם את ידי ואת גבורתי וידעו כי שמי יהוה ס
❮
❯
1
2
3
4
5
6
7
8
9
10
11
12
13
14
15
16
17
18
19
20
21