ירמיה 15 : 1 (ALEP)
א ויאמר יהוה אלי אם יעמד משה ושמואל לפני אין נפשי אל העם הזה שלח מעל פני ויצאו
ירמיה 15 : 2 (ALEP)
ב והיה כי יאמרו אליך אנה נצא ואמרת אליהם כה אמר יהוה אשר למות למות ואשר לחרב לחרב ואשר לרעב לרעב ואשר לשבי לשבי
ירמיה 15 : 3 (ALEP)
ג ופקדתי עליהם ארבע משפחות נאם יהוה את החרב להרג ואת הכלבים לסחב ואת עוף השמים ואת בהמת הארץ לאכל ולהשחית
ירמיה 15 : 4 (ALEP)
ד ונתתים לזועה (לזעוה) לכל ממלכות הארץ--בגלל מנשה בן יחזקיהו מלך יהודה על אשר עשה בירושלם
ירמיה 15 : 5 (ALEP)
ה כי מי יחמל עליך ירושלם ומי ינוד לך ומי יסור לשאל לשלם לך
ירמיה 15 : 6 (ALEP)
ו את נטשת אתי נאם יהוה אחור תלכי ואט את ידי עליך ואשחיתך נלאיתי הנחם
ירמיה 15 : 7 (ALEP)
ז ואזרם במזרה בשערי הארץ שכלתי אבדתי את עמי מדרכיהם לוא שבו
ירמיה 15 : 8 (ALEP)
ח עצמו לי אלמנותו מחול ימים הבאתי להם על אם בחור שדד בצהרים הפלתי עליה פתאם עיר ובהלות
ירמיה 15 : 9 (ALEP)
ט אמללה ילדת השבעה נפחה נפשה באה (בא) שמשה בעד יומם--בושה וחפרה ושאריתם לחרב אתן לפני איביהם--נאם יהוה {ס}
ירמיה 15 : 10 (ALEP)
י אוי לי אמי--כי ילדתני איש ריב ואיש מדון לכל הארץ לא נשיתי ולא נשו בי כלה מקללוני {ס}
ירמיה 15 : 11 (ALEP)
יא אמר יהוה אם לא שרותך (שריתיך) לטוב אם לוא הפגעתי בך בעת רעה ובעת צרה--את האיב
ירמיה 15 : 12 (ALEP)
יב הירע ברזל ברזל מצפון ונחשת
ירמיה 15 : 13 (ALEP)
יג חילך ואוצרותיך לבז אתן לא במחיר ובכל חטאותיך ובכל גבוליך
ירמיה 15 : 14 (ALEP)
יד והעברתי את איביך בארץ לא ידעת כי אש קדחה באפי עליכם תוקד {ס}
ירמיה 15 : 15 (ALEP)
טו אתה ידעת יהוה זכרני ופקדני והנקם לי מרדפי--אל לארך אפך תקחני דע שאתי עליך חרפה
ירמיה 15 : 16 (ALEP)
טז נמצאו דבריך ואכלם ויהי דבריך (דברך) לי לששון ולשמחת לבבי כי נקרא שמך עלי יהוה אלהי צבאות {ס}
ירמיה 15 : 17 (ALEP)
יז לא ישבתי בסוד משחקים ואעלז מפני ידך בדד ישבתי כי זעם מלאתני
ירמיה 15 : 18 (ALEP)
יח למה היה כאבי נצח ומכתי אנושה מאנה הרפא--היו תהיה לי כמו אכזב מים לא נאמנו {ס}
ירמיה 15 : 19 (ALEP)
יט לכן כה אמר יהוה אם תשוב ואשיבך לפני תעמד ואם תוציא יקר מזולל כפי תהיה ישבו המה אליך ואתה לא תשוב אליהם
ירמיה 15 : 20 (ALEP)
כ ונתתיך לעם הזה לחומת נחשת בצורה ונלחמו אליך ולא יוכלו לך כי אתך אני להושיעך ולהצילך נאם יהוה
ירמיה 15 : 21 (ALEP)
כא והצלתיך מיד רעים ופדתיך מכף ערצים {ס}
❮
❯