ירמיה 11 : 1 (ALEP)
א הדבר אשר היה אל ירמיהו מאת יהוה לאמר
ירמיה 11 : 2 (ALEP)
ב שמעו את דברי הברית הזאת ודברתם אל איש יהודה ועל ישבי ירושלם
ירמיה 11 : 3 (ALEP)
ג ואמרת אליהם כה אמר יהוה אלהי ישראל ארור האיש--אשר לא ישמע את דברי הברית הזאת
ירמיה 11 : 4 (ALEP)
ד אשר צויתי את אבותיכם ביום הוציאי אותם מארץ מצרים מכור הברזל לאמר שמעו בקולי ועשיתם אותם ככל אשר אצוה אתכם והייתם לי לעם ואנכי אהיה לכם לאלהים
ירמיה 11 : 5 (ALEP)
ה למען הקים את השבועה אשר נשבעתי לאבותיכם לתת להם ארץ זבת חלב ודבש--כיום הזה ואען ואמר אמן יהוה {פ}
ירמיה 11 : 6 (ALEP)
ו ויאמר יהוה אלי קרא את כל הדברים האלה בערי יהודה ובחצות ירושלם לאמר שמעו את דברי הברית הזאת ועשיתם אותם
ירמיה 11 : 7 (ALEP)
ז כי העד העדתי באבותיכם ביום העלותי אותם מארץ מצרים ועד היום הזה השכם והעד לאמר שמעו בקולי
ירמיה 11 : 8 (ALEP)
ח ולא שמעו ולא הטו את אזנם וילכו איש בשרירות לבם הרע ואביא עליהם את כל דברי הברית הזאת אשר צויתי לעשות--ולא עשו {ס}
ירמיה 11 : 9 (ALEP)
ט ויאמר יהוה אלי נמצא קשר באיש יהודה ובישבי ירושלם
ירמיה 11 : 10 (ALEP)
י שבו על עונת אבותם הראשנים אשר מאנו לשמוע את דברי והמה הלכו אחרי אלהים אחרים לעבדם הפרו בית ישראל ובית יהודה את בריתי אשר כרתי את אבותם {ס}
ירמיה 11 : 11 (ALEP)
יא לכן כה אמר יהוה הנני מביא אליהם רעה אשר לא יוכלו לצאת ממנה וזעקו אלי ולא אשמע אליהם
ירמיה 11 : 12 (ALEP)
יב והלכו ערי יהודה וישבי ירושלם וזעקו אל האלהים אשר הם מקטרים להם והושע לא יושיעו להם בעת רעתם
ירמיה 11 : 13 (ALEP)
יג כי מספר עריך היו אלהיך יהודה ומספר חצות ירושלם שמתם מזבחות לבשת--מזבחות לקטר לבעל {ס}
ירמיה 11 : 14 (ALEP)
יד ואתה אל תתפלל בעד העם הזה ואל תשא בעדם רנה ותפלה כי אינני שמע בעת קראם אלי--בעד רעתם {ס}
ירמיה 11 : 15 (ALEP)
טו מה לידידי בביתי עשותה המזמתה הרבים ובשר קדש יעברו מעליך כי רעתכי אז תעלזי
ירמיה 11 : 16 (ALEP)
טז זית רענן יפה פרי תאר קרא יהוה שמך--לקול המולה גדלה הצית אש עליה ורעו דליותיו
ירמיה 11 : 17 (ALEP)
יז ויהוה צבאות הנוטע אותך דבר עליך רעה בגלל רעת בית ישראל ובית יהודה אשר עשו להם להכעסני--לקטר לבעל {פ}
ירמיה 11 : 18 (ALEP)
יח ויהוה הודיעני ואדעה אז הראיתני מעלליהם
ירמיה 11 : 19 (ALEP)
יט ואני ככבש אלוף יובל לטבוח ולא ידעתי כי עלי חשבו מחשבות נשחיתה עץ בלחמו ונכרתנו מארץ חיים--ושמו לא יזכר עוד
ירמיה 11 : 20 (ALEP)
כ ויהוה צבאות שפט צדק בחן כליות ולב אראה נקמתך מהם כי אליך גליתי את ריבי {ס}
ירמיה 11 : 21 (ALEP)
כא לכן כה אמר יהוה על אנשי ענתות המבקשים את נפשך לאמר לא תנבא בשם יהוה ולא תמות בידנו {פ}
ירמיה 11 : 22 (ALEP)
כב לכן כה אמר יהוה צבאות הנני פקד עליהם הבחורים ימתו בחרב בניהם ובנותיהם ימתו ברעב
ירמיה 11 : 23 (ALEP)
כג ושארית לא תהיה להם כי אביא רעה אל אנשי ענתות שנת פקדתם {ס}
❮
❯