ישעיה 60 : 1 (ALEP)
א קומי אורי כי בא אורך וכבוד יהוה עליך זרח
ישעיה 60 : 2 (ALEP)
ב כי הנה החשך יכסה ארץ וערפל לאמים ועליך יזרח יהוה וכבודו עליך יראה
ישעיה 60 : 3 (ALEP)
ג והלכו גוים לאורך ומלכים לנגה זרחך
ישעיה 60 : 4 (ALEP)
ד שאי סביב עיניך וראי--כלם נקבצו באו לך בניך מרחוק יבאו ובנותיך על צד תאמנה
ישעיה 60 : 5 (ALEP)
ה אז תראי ונהרת ופחד ורחב לבבך כי יהפך עליך המון ים חיל גוים יבאו לך
ישעיה 60 : 6 (ALEP)
ו שפעת גמלים תכסך בכרי מדין ועיפה--כלם משבא יבאו זהב ולבונה ישאו ותהלת יהוה יבשרו
ישעיה 60 : 7 (ALEP)
ז כל צאן קדר יקבצו לך אילי נביות ישרתונך יעלו על רצון מזבחי ובית תפארתי אפאר
ישעיה 60 : 8 (ALEP)
ח מי אלה כעב תעופינה וכיונים אל ארבתיהם
ישעיה 60 : 9 (ALEP)
ט כי לי איים יקוו ואניות תרשיש בראשנה להביא בניך מרחוק כספם וזהבם אתם--לשם יהוה אלהיך ולקדוש ישראל כי פארך
ישעיה 60 : 10 (ALEP)
י ובנו בני נכר חמתיך ומלכיהם ישרתונך כי בקצפי הכיתיך וברצוני רחמתיך
ישעיה 60 : 11 (ALEP)
יא ופתחו שעריך תמיד יומם ולילה לא יסגרו להביא אליך חיל גוים ומלכיהם נהוגים
ישעיה 60 : 12 (ALEP)
יב כי הגוי והממלכה אשר לא יעבדוך יאבדו והגוים חרב יחרבו
ישעיה 60 : 13 (ALEP)
יג כבוד הלבנון אליך יבוא ברוש תדהר ותאשור יחדו--לפאר מקום מקדשי ומקום רגלי אכבד
ישעיה 60 : 14 (ALEP)
יד והלכו אליך שחוח בני מעניך והשתחוו על כפות רגליך כל מנאציך וקראו לך עיר יהוה ציון קדוש ישראל
ישעיה 60 : 15 (ALEP)
טו תחת היותך עזובה ושנואה ואין עובר ושמתיך לגאון עולם משוש דור ודור
ישעיה 60 : 16 (ALEP)
טז וינקת חלב גוים ושד מלכים תינקי וידעת כי אני יהוה מושיעך וגאלך אביר יעקב
ישעיה 60 : 17 (ALEP)
יז תחת הנחשת אביא זהב ותחת הברזל אביא כסף ותחת העצים נחשת ותחת האבנים ברזל ושמתי פקדתך שלום ונגשיך צדקה
ישעיה 60 : 18 (ALEP)
יח לא ישמע עוד חמס בארצך שד ושבר בגבוליך וקראת ישועה חומתיך ושעריך תהלה
ישעיה 60 : 19 (ALEP)
יט לא יהיה לך עוד השמש לאור יומם ולנגה הירח לא יאיר לך והיה לך יהוה לאור עולם ואלהיך לתפארתך
ישעיה 60 : 20 (ALEP)
כ לא יבוא עוד שמשך וירחך לא יאסף כי יהוה יהיה לך לאור עולם ושלמו ימי אבלך
ישעיה 60 : 21 (ALEP)
כא ועמך כלם צדיקים לעולם יירשו ארץ נצר מטעו (מטעי) מעשה ידי להתפאר
ישעיה 60 : 22 (ALEP)
כב הקטן יהיה לאלף והצעיר לגוי עצום אני יהוה בעתה אחישנה ס
❮
❯