ישעיה 50 : 1 (ALEP)
א כה אמר יהוה אי זה ספר כריתות אמכם אשר שלחתיה או מי מנושי אשר מכרתי אתכם לו הן בעונתיכם נמכרתם ובפשעיכם שלחה אמכם
ישעיה 50 : 2 (ALEP)
ב מדוע באתי ואין איש קראתי ואין עונה--הקצור קצרה ידי מפדות ואם אין בי כח להציל הן בגערתי אחריב ים אשים נהרות מדבר תבאש דגתם מאין מים ותמת בצמא
ישעיה 50 : 3 (ALEP)
ג אלביש שמים קדרות ושק אשים כסותם פ
ישעיה 50 : 4 (ALEP)
ד אדני יהוה נתן לי לשון למודים לדעת לעות את יעף דבר יעיר בבקר בבקר יעיר לי אזן לשמע כלמודים
ישעיה 50 : 5 (ALEP)
ה אדני יהוה פתח לי אזן ואנכי לא מריתי אחור לא נסוגתי
ישעיה 50 : 6 (ALEP)
ו גוי נתתי למכים ולחיי למרטים פני לא הסתרתי מכלמות ורק
ישעיה 50 : 7 (ALEP)
ז ואדני יהוה יעזר לי על כן לא נכלמתי על כן שמתי פני כחלמיש ואדע כי לא אבוש
ישעיה 50 : 8 (ALEP)
ח קרוב מצדיקי--מי יריב אתי נעמדה יחד מי בעל משפטי יגש אלי
ישעיה 50 : 9 (ALEP)
ט הן אדני יהוה יעזר לי מי הוא ירשיעני הן כלם כבגד יבלו עש יאכלם ס
ישעיה 50 : 10 (ALEP)
י מי בכם ירא יהוה שמע בקול עבדו--אשר הלך חשכים ואין נגה לו יבטח בשם יהוה וישען באלהיו ס
ישעיה 50 : 11 (ALEP)
יא הן כלכם קדחי אש מאזרי זיקות לכו באור אשכם ובזיקות בערתם--מידי היתה זאת לכם למעצבה תשכבון ס
❮
❯