ישעיה 14 : 1 (ALEP)
א כי ירחם יהוה את יעקב ובחר עוד בישראל והניחם על אדמתם ונלוה הגר עליהם ונספחו על בית יעקב
ישעיה 14 : 2 (ALEP)
ב ולקחום עמים והביאום אל מקומם והתנחלום בית ישראל על אדמת יהוה לעבדים ולשפחות והיו שבים לשביהם ורדו בנגשיהם ס
ישעיה 14 : 3 (ALEP)
ג והיה ביום הניח יהוה לך מעצבך ומרגזך--ומן העבדה הקשה אשר עבד בך
ישעיה 14 : 4 (ALEP)
ד ונשאת המשל הזה על מלך בבל--ואמרת איך שבת נגש שבתה מדהבה
ישעיה 14 : 5 (ALEP)
ה שבר יהוה מטה רשעים--שבט משלים
ישעיה 14 : 6 (ALEP)
ו מכה עמים בעברה מכת בלתי סרה רדה באף גוים מרדף בלי חשך
ישעיה 14 : 7 (ALEP)
ז נחה שקטה כל הארץ פצחו רנה
ישעיה 14 : 8 (ALEP)
ח גם ברושים שמחו לך ארזי לבנון מאז שכבת לא יעלה הכרת עלינו
ישעיה 14 : 9 (ALEP)
ט שאול מתחת רגזה לך--לקראת בואך עורר לך רפאים כל עתודי ארץ--הקים מכסאותם כל מלכי גוים
ישעיה 14 : 10 (ALEP)
י כלם יענו ויאמרו אליך גם אתה חלית כמונו אלינו נמשלת
ישעיה 14 : 11 (ALEP)
יא הורד שאול גאונך המית נבליך תחתיך יצע רמה ומכסיך תולעה
ישעיה 14 : 12 (ALEP)
יב איך נפלת משמים הילל בן שחר נגדעת לארץ חולש על גוים
ישעיה 14 : 13 (ALEP)
יג ואתה אמרת בלבבך השמים אעלה--ממעל לכוכבי אל ארים כסאי ואשב בהר מועד בירכתי צפון
ישעיה 14 : 14 (ALEP)
יד אעלה על במתי עב אדמה לעליון
ישעיה 14 : 15 (ALEP)
טו אך אל שאול תורד אל ירכתי בור
ישעיה 14 : 16 (ALEP)
טז ראיך אליך ישגיחו אליך יתבוננו הזה האיש מרגיז הארץ מרעיש ממלכות
ישעיה 14 : 17 (ALEP)
יז שם תבל כמדבר ועריו הרס אסיריו לא פתח ביתה
ישעיה 14 : 18 (ALEP)
יח כל מלכי גוים כלם--שכבו בכבוד איש בביתו
ישעיה 14 : 19 (ALEP)
יט ואתה השלכת מקברך כנצר נתעב--לבש הרגים מטעני חרב יורדי אל אבני בור כפגר מובס
ישעיה 14 : 20 (ALEP)
כ לא תחד אתם בקבורה כי ארצך שחת עמך הרגת לא יקרא לעולם זרע מרעים
ישעיה 14 : 21 (ALEP)
כא הכינו לבניו מטבח בעון אבותם בל יקמו וירשו ארץ ומלאו פני תבל ערים
ישעיה 14 : 22 (ALEP)
כב וקמתי עליהם נאם יהוה צבאות והכרתי לבבל שם ושאר ונין ונכד--נאם יהוה
ישעיה 14 : 23 (ALEP)
כג ושמתיה למורש קפד ואגמי מים וטאטאתיה במטאטא השמד נאם יהוה צבאות ס
ישעיה 14 : 24 (ALEP)
כד נשבע יהוה צבאות לאמר אם לא כאשר דמיתי כן היתה וכאשר יעצתי היא תקום
ישעיה 14 : 25 (ALEP)
כה לשבר אשור בארצי ועל הרי אבוסנו וסר מעליהם עלו וסבלו מעל שכמו יסור
ישעיה 14 : 26 (ALEP)
כו זאת העצה היעוצה על כל הארץ וזאת היד הנטויה על כל הגוים
ישעיה 14 : 27 (ALEP)
כז כי יהוה צבאות יעץ ומי יפר וידו הנטויה ומי ישיבנה פ
ישעיה 14 : 28 (ALEP)
כח בשנת מות המלך אחז היה המשא הזה
ישעיה 14 : 29 (ALEP)
כט אל תשמחי פלשת כלך כי נשבר שבט מכך כי משרש נחש יצא צפע ופריו שרף מעופף
ישעיה 14 : 30 (ALEP)
ל ורעו בכורי דלים ואביונים לבטח ירבצו והמתי ברעב שרשך ושאריתך יהרג
ישעיה 14 : 31 (ALEP)
לא הילילי שער זעקי עיר נמוג פלשת כלך כי מצפון עשן בא ואין בודד במועדיו
ישעיה 14 : 32 (ALEP)
לב ומה יענה מלאכי גוי כי יהוה יסד ציון ובה יחסו עניי עמו פ
❮
❯