חגי 2 : 1 (ALEP)
א בשביעי בעשרים ואחד לחדש--היה דבר יהוה ביד חגי הנביא לאמר
חגי 2 : 2 (ALEP)
ב אמר נא אל זרבבל בן שלתיאל פחת יהודה ואל יהושע בן יהוצדק הכהן הגדול--ואל שארית העם לאמר
חגי 2 : 3 (ALEP)
ג מי בכם הנשאר אשר ראה את הבית הזה בכבודו הראשון ומה אתם ראים אתו עתה--הלוא כמהו כאין בעיניכם
חגי 2 : 4 (ALEP)
ד ועתה חזק זרבבל נאם יהוה וחזק יהושע בן יהוצדק הכהן הגדול וחזק כל עם הארץ נאם יהוה--ועשו  כי אני אתכם נאם יהוה צבאות
חגי 2 : 5 (ALEP)
ה את הדבר אשר כרתי אתכם בצאתכם ממצרים ורוחי עמדת בתוככם--אל תיראו  ס
חגי 2 : 6 (ALEP)
ו כי כה אמר יהוה צבאות עוד אחת מעט היא ואני מרעיש את השמים ואת הארץ ואת הים ואת החרבה
חגי 2 : 7 (ALEP)
ז והרעשתי את כל הגוים ובאו חמדת כל הגוים ומלאתי את הבית הזה כבוד--אמר יהוה צבאות
חגי 2 : 8 (ALEP)
ח לי הכסף ולי הזהב--נאם יהוה צבאות
חגי 2 : 9 (ALEP)
ט גדול יהיה כבוד הבית הזה האחרון מן הראשון--אמר יהוה צבאות ובמקום הזה אתן שלום נאם יהוה צבאות  פ
חגי 2 : 10 (ALEP)
י בעשרים וארבעה לתשיעי בשנת שתים לדריוש--היה דבר יהוה אל חגי הנביא לאמר
חגי 2 : 11 (ALEP)
יא כה אמר יהוה צבאות  שאל נא את הכהנים תורה לאמר
חגי 2 : 12 (ALEP)
יב הן ישא איש בשר קדש בכנף בגדו ונגע בכנפו אל הלחם ואל הנזיד ואל היין ואל שמן ואל כל מאכל--היקדש ויענו הכהנים ויאמרו לא
חגי 2 : 13 (ALEP)
יג ויאמר חגי אם יגע טמא נפש בכל אלה היטמא ויענו הכהנים ויאמרו יטמא
חגי 2 : 14 (ALEP)
יד ויען חגי ויאמר כן העם הזה וכן הגוי הזה לפני נאם יהוה וכן כל מעשה ידיהם ואשר יקריבו שם טמא הוא
חגי 2 : 15 (ALEP)
טו ועתה שימו נא לבבכם מן היום הזה ומעלה מטרם שום אבן אל אבן בהיכל יהוה
חגי 2 : 16 (ALEP)
טז מהיותם בא אל ערמת עשרים והיתה עשרה בא אל היקב לחשף חמשים פורה והיתה עשרים
חגי 2 : 17 (ALEP)
יז הכיתי אתכם בשדפון ובירקון ובברד--את כל מעשה ידיכם ואין אתכם אלי נאם יהוה
חגי 2 : 18 (ALEP)
יח שימו נא לבבכם מן היום הזה ומעלה מיום עשרים וארבעה לתשיעי למן היום אשר יסד היכל יהוה--שימו לבבכם
חגי 2 : 19 (ALEP)
יט העוד הזרע במגורה ועד הגפן והתאנה והרמון ועץ הזית לא נשא--מן היום הזה אברך  ס
חגי 2 : 20 (ALEP)
כ ויהי דבר יהוה שנית אל חגי בעשרים וארבעה לחדש לאמר
חגי 2 : 21 (ALEP)
כא אמר אל זרבבל פחת יהודה לאמר  אני מרעיש את השמים ואת הארץ
חגי 2 : 22 (ALEP)
כב והפכתי כסא ממלכות והשמדתי חזק ממלכות הגוים והפכתי מרכבה ורכביה וירדו סוסים ורכביהם איש בחרב אחיו
חגי 2 : 23 (ALEP)
כג ביום ההוא נאם יהוה צבאות אקחך זרבבל בן שאלתיאל עבדי נאם יהוה ושמתיך כחותם  כי בך בחרתי נאם יהוה צבאות  ש

1 2 3 4 5 6 7 8 9 10 11 12 13 14 15 16 17 18 19 20 21 22 23