בראשית 9 : 1 (ALEP)
א ויברך אלהים את נח ואת בניו ויאמר להם פרו ורבו ומלאו את הארץ
בראשית 9 : 2 (ALEP)
ב ומוראכם וחתכם יהיה על כל חית הארץ ועל כל עוף השמים בכל אשר תרמש האדמה ובכל דגי הים בידכם נתנו
בראשית 9 : 3 (ALEP)
ג כל רמש אשר הוא חי לכם יהיה לאכלה כירק עשב נתתי לכם את כל
בראשית 9 : 4 (ALEP)
ד אך בשר בנפשו דמו לא תאכלו
בראשית 9 : 5 (ALEP)
ה ואך את דמכם לנפשתיכם אדרש מיד כל חיה אדרשנו ומיד האדם מיד איש אחיו--אדרש את נפש האדם
בראשית 9 : 6 (ALEP)
ו שפך דם האדם באדם דמו ישפך כי בצלם אלהים עשה את האדם
בראשית 9 : 7 (ALEP)
ז ואתם פרו ורבו שרצו בארץ ורבו בה ס
בראשית 9 : 8 (ALEP)
ח ויאמר אלהים אל נח ואל בניו אתו לאמר
בראשית 9 : 9 (ALEP)
ט ואני הנני מקים את בריתי אתכם ואת זרעכם אחריכם
בראשית 9 : 10 (ALEP)
י ואת כל נפש החיה אשר אתכם בעוף בבהמה ובכל חית הארץ אתכם מכל יצאי התבה לכל חית הארץ
בראשית 9 : 11 (ALEP)
יא והקמתי את בריתי אתכם ולא יכרת כל בשר עוד ממי המבול ולא יהיה עוד מבול לשחת הארץ
בראשית 9 : 12 (ALEP)
יב ויאמר אלהים זאת אות הברית אשר אני נתן ביני וביניכם ובין כל נפש חיה אשר אתכם--לדרת עולם
בראשית 9 : 13 (ALEP)
יג את קשתי נתתי בענן והיתה לאות ברית ביני ובין הארץ
בראשית 9 : 14 (ALEP)
יד והיה בענני ענן על הארץ ונראתה הקשת בענן
בראשית 9 : 15 (ALEP)
טו וזכרתי את בריתי אשר ביני וביניכם ובין כל נפש חיה בכל בשר ולא יהיה עוד המים למבול לשחת כל בשר
בראשית 9 : 16 (ALEP)
טז והיתה הקשת בענן וראיתיה לזכר ברית עולם בין אלהים ובין כל נפש חיה בכל בשר אשר על הארץ
בראשית 9 : 17 (ALEP)
יז ויאמר אלהים אל נח זאת אות הברית אשר הקמתי ביני ובין כל בשר אשר על הארץ פ
בראשית 9 : 18 (ALEP)
יח ויהיו בני נח היצאים מן התבה--שם וחם ויפת וחם הוא אבי כנען
בראשית 9 : 19 (ALEP)
יט שלשה אלה בני נח ומאלה נפצה כל הארץ
בראשית 9 : 20 (ALEP)
כ ויחל נח איש האדמה ויטע כרם
בראשית 9 : 21 (ALEP)
כא וישת מן היין וישכר ויתגל בתוך אהלה
בראשית 9 : 22 (ALEP)
כב וירא חם אבי כנען את ערות אביו ויגד לשני אחיו בחוץ
בראשית 9 : 23 (ALEP)
כג ויקח שם ויפת את השמלה וישימו על שכם שניהם וילכו אחרנית ויכסו את ערות אביהם ופניהם אחרנית וערות אביהם לא ראו
בראשית 9 : 24 (ALEP)
כד וייקץ נח מיינו וידע את אשר עשה לו בנו הקטן
בראשית 9 : 25 (ALEP)
כה ויאמר ארור כנען עבד עבדים יהיה לאחיו
בראשית 9 : 26 (ALEP)
כו ויאמר ברוך יהוה אלהי שם ויהי כנען עבד למו
בראשית 9 : 27 (ALEP)
כז יפת אלהים ליפת וישכן באהלי שם ויהי כנען עבד למו
בראשית 9 : 28 (ALEP)
כח ויחי נח אחר המבול שלש מאות שנה וחמשים שנה
בראשית 9 : 29 (ALEP)
כט ויהיו כל ימי נח תשע מאות שנה וחמשים שנה וימת פ
❮
❯