בראשית 8 : 1 (ALEP)
א ויזכר אלהים את נח ואת כל החיה ואת כל הבהמה אשר אתו בתבה ויעבר אלהים רוח על הארץ וישכו המים
בראשית 8 : 2 (ALEP)
ב ויסכרו מעינת תהום וארבת השמים ויכלא הגשם מן השמים
בראשית 8 : 3 (ALEP)
ג וישבו המים מעל הארץ הלוך ושוב ויחסרו המים--מקצה חמשים ומאת יום
בראשית 8 : 4 (ALEP)
ד ותנח התבה בחדש השביעי בשבעה עשר יום לחדש על הרי אררט
בראשית 8 : 5 (ALEP)
ה והמים היו הלוך וחסור עד החדש העשירי בעשירי באחד לחדש נראו ראשי ההרים
בראשית 8 : 6 (ALEP)
ו ויהי מקץ ארבעים יום ויפתח נח את חלון התבה אשר עשה
בראשית 8 : 7 (ALEP)
ז וישלח את הערב ויצא יצוא ושוב עד יבשת המים מעל הארץ
בראשית 8 : 8 (ALEP)
ח וישלח את היונה מאתו--לראות הקלו המים מעל פני האדמה
בראשית 8 : 9 (ALEP)
ט ולא מצאה היונה מנוח לכף רגלה ותשב אליו אל התבה--כי מים על פני כל הארץ וישלח ידו ויקחה ויבא אתה אליו אל התבה
בראשית 8 : 10 (ALEP)
י ויחל עוד שבעת ימים אחרים ויסף שלח את היונה מן התבה
בראשית 8 : 11 (ALEP)
יא ותבא אליו היונה לעת ערב והנה עלה זית טרף בפיה וידע נח כי קלו המים מעל הארץ
בראשית 8 : 12 (ALEP)
יב וייחל עוד שבעת ימים אחרים וישלח את היונה ולא יספה שוב אליו עוד
בראשית 8 : 13 (ALEP)
יג ויהי באחת ושש מאות שנה בראשון באחד לחדש חרבו המים מעל הארץ ויסר נח את מכסה התבה וירא והנה חרבו פני האדמה
בראשית 8 : 14 (ALEP)
יד ובחדש השני בשבעה ועשרים יום לחדש--יבשה הארץ {ס}
בראשית 8 : 15 (ALEP)
טו וידבר אלהים אל נח לאמר
בראשית 8 : 16 (ALEP)
טז צא מן התבה--אתה ואשתך ובניך ונשי בניך אתך
בראשית 8 : 17 (ALEP)
יז כל החיה אשר אתך מכל בשר בעוף ובבהמה ובכל הרמש הרמש על הארץ--הוצא (היצא) אתך ושרצו בארץ ופרו ורבו על הארץ
בראשית 8 : 18 (ALEP)
יח ויצא נח ובניו ואשתו ונשי בניו אתו
בראשית 8 : 19 (ALEP)
יט כל החיה כל הרמש וכל העוף כל רומש על הארץ--למשפחתיהם יצאו מן התבה
בראשית 8 : 20 (ALEP)
כ ויבן נח מזבח ליהוה ויקח מכל הבהמה הטהרה ומכל העוף הטהור ויעל עלת במזבח
בראשית 8 : 21 (ALEP)
כא וירח יהוה את ריח הניחח ויאמר יהוה אל לבו לא אסף לקלל עוד את האדמה בעבור האדם כי יצר לב האדם רע מנעריו ולא אסף עוד להכות את כל חי כאשר עשיתי
בראשית 8 : 22 (ALEP)
כב עד כל ימי הארץ זרע וקציר וקר וחם וקיץ וחרף ויום ולילה--לא ישבתו
❮
❯