בראשית 7 : 1 (ALEP)
א ויאמר יהוה לנח בא אתה וכל ביתך אל התבה כי אתך ראיתי צדיק לפני בדור הזה
בראשית 7 : 2 (ALEP)
ב מכל הבהמה הטהורה תקח לך שבעה שבעה--איש ואשתו ומן הבהמה אשר לא טהרה הוא שנים--איש ואשתו
בראשית 7 : 3 (ALEP)
ג גם מעוף השמים שבעה שבעה זכר ונקבה לחיות זרע על פני כל הארץ
בראשית 7 : 4 (ALEP)
ד כי לימים עוד שבעה אנכי ממטיר על הארץ ארבעים יום וארבעים לילה ומחיתי את כל היקום אשר עשיתי מעל פני האדמה
בראשית 7 : 5 (ALEP)
ה ויעש נח ככל אשר צוהו יהוה
בראשית 7 : 6 (ALEP)
ו ונח בן שש מאות שנה והמבול היה מים על הארץ
בראשית 7 : 7 (ALEP)
ז ויבא נח ובניו ואשתו ונשי בניו אתו--אל התבה מפני מי המבול
בראשית 7 : 8 (ALEP)
ח מן הבהמה הטהורה ומן הבהמה אשר איננה טהרה ומן העוף--וכל אשר רמש על האדמה
בראשית 7 : 9 (ALEP)
ט שנים שנים באו אל נח אל התבה--זכר ונקבה כאשר צוה אלהים את נח
בראשית 7 : 10 (ALEP)
י ויהי לשבעת הימים ומי המבול היו על הארץ
בראשית 7 : 11 (ALEP)
יא בשנת שש מאות שנה לחיי נח בחדש השני בשבעה עשר יום לחדש--ביום הזה נבקעו כל מעינת תהום רבה וארבת השמים נפתחו
בראשית 7 : 12 (ALEP)
יב ויהי הגשם על הארץ ארבעים יום וארבעים לילה
בראשית 7 : 13 (ALEP)
יג בעצם היום הזה בא נח ושם וחם ויפת בני נח ואשת נח ושלשת נשי בניו אתם--אל התבה
בראשית 7 : 14 (ALEP)
יד המה וכל החיה למינה וכל הבהמה למינה וכל הרמש הרמש על הארץ למינהו וכל העוף למינהו כל צפור כל כנף
בראשית 7 : 15 (ALEP)
טו ויבאו אל נח אל התבה שנים שנים מכל הבשר אשר בו רוח חיים
בראשית 7 : 16 (ALEP)
טז והבאים זכר ונקבה מכל בשר באו כאשר צוה אתו אלהים ויסגר יהוה בעדו
בראשית 7 : 17 (ALEP)
יז ויהי המבול ארבעים יום על הארץ וירבו המים וישאו את התבה ותרם מעל הארץ
בראשית 7 : 18 (ALEP)
יח ויגברו המים וירבו מאד על הארץ ותלך התבה על פני המים
בראשית 7 : 19 (ALEP)
יט והמים גברו מאד מאד--על הארץ ויכסו כל ההרים הגבהים אשר תחת כל השמים
בראשית 7 : 20 (ALEP)
כ חמש עשרה אמה מלמעלה גברו המים ויכסו ההרים
בראשית 7 : 21 (ALEP)
כא ויגוע כל בשר הרמש על הארץ בעוף ובבהמה ובחיה ובכל השרץ השרץ על הארץ--וכל האדם
בראשית 7 : 22 (ALEP)
כב כל אשר נשמת רוח חיים באפיו מכל אשר בחרבה--מתו
בראשית 7 : 23 (ALEP)
כג וימח את כל היקום אשר על פני האדמה מאדם עד בהמה עד רמש ועד עוף השמים וימחו מן הארץ וישאר אך נח ואשר אתו בתבה
בראשית 7 : 24 (ALEP)
כד ויגברו המים על הארץ חמשים ומאת יום
❮
❯