בראשית 6 : 1 (ALEP)
א ויהי כי החל האדם לרב על פני האדמה ובנות ילדו להם
בראשית 6 : 2 (ALEP)
ב ויראו בני האלהים את בנות האדם כי טבת הנה ויקחו להם נשים מכל אשר בחרו
בראשית 6 : 3 (ALEP)
ג ויאמר יהוה לא ידון רוחי באדם לעלם בשגם הוא בשר והיו ימיו מאה ועשרים שנה
בראשית 6 : 4 (ALEP)
ד הנפלים היו בארץ בימים ההם וגם אחרי כן אשר יבאו בני האלהים אל בנות האדם וילדו להם המה הגברים אשר מעולם אנשי השם {פ}
בראשית 6 : 5 (ALEP)
ה וירא יהוה כי רבה רעת האדם בארץ וכל יצר מחשבת לבו רק רע כל היום
בראשית 6 : 6 (ALEP)
ו וינחם יהוה כי עשה את האדם בארץ ויתעצב אל לבו
בראשית 6 : 7 (ALEP)
ז ויאמר יהוה אמחה את האדם אשר בראתי מעל פני האדמה מאדם עד בהמה עד רמש ועד עוף השמים כי נחמתי כי עשיתם
בראשית 6 : 8 (ALEP)
ח ונח מצא חן בעיני יהוה {פ}
בראשית 6 : 9 (ALEP)
ט אלה תולדת נח--נח איש צדיק תמים היה בדרתיו את האלהים התהלך נח
בראשית 6 : 10 (ALEP)
י ויולד נח שלשה בנים--את שם את חם ואת יפת
בראשית 6 : 11 (ALEP)
יא ותשחת הארץ לפני האלהים ותמלא הארץ חמס
בראשית 6 : 12 (ALEP)
יב וירא אלהים את הארץ והנה נשחתה כי השחית כל בשר את דרכו על הארץ {ס}
בראשית 6 : 13 (ALEP)
יג ויאמר אלהים לנח קץ כל בשר בא לפני--כי מלאה הארץ חמס מפניהם והנני משחיתם את הארץ
בראשית 6 : 14 (ALEP)
יד עשה לך תבת עצי גפר קנים תעשה את התבה וכפרת אתה מבית ומחוץ בכפר
בראשית 6 : 15 (ALEP)
טו וזה אשר תעשה אתה שלש מאות אמה ארך התבה חמשים אמה רחבה ושלשים אמה קומתה
בראשית 6 : 16 (ALEP)
טז צהר תעשה לתבה ואל אמה תכלנה מלמעלה ופתח התבה בצדה תשים תחתים שנים ושלשים תעשה
בראשית 6 : 17 (ALEP)
יז ואני הנני מביא את המבול מים על הארץ לשחת כל בשר אשר בו רוח חיים מתחת השמים כל אשר בארץ יגוע
בראשית 6 : 18 (ALEP)
יח והקמתי את בריתי אתך ובאת אל התבה--אתה ובניך ואשתך ונשי בניך אתך
בראשית 6 : 19 (ALEP)
יט ומכל החי מכל בשר שנים מכל תביא אל התבה--להחית אתך זכר ונקבה יהיו
בראשית 6 : 20 (ALEP)
כ מהעוף למינהו ומן הבהמה למינה מכל רמש האדמה למינהו--שנים מכל יבאו אליך להחיות
בראשית 6 : 21 (ALEP)
כא ואתה קח לך מכל מאכל אשר יאכל ואספת אליך והיה לך ולהם לאכלה
בראשית 6 : 22 (ALEP)
כב ויעש נח ככל אשר צוה אתו אלהים--כן עשה
❮
❯