בראשית 50 : 1 (ALEP)
א ויפל יוסף על פני אביו ויבך עליו וישק לו
בראשית 50 : 2 (ALEP)
ב ויצו יוסף את עבדיו את הרפאים לחנט את אביו ויחנטו הרפאים את ישראל
בראשית 50 : 3 (ALEP)
ג וימלאו לו ארבעים יום כי כן ימלאו ימי החנטים ויבכו אתו מצרים שבעים יום
בראשית 50 : 4 (ALEP)
ד ויעברו ימי בכיתו וידבר יוסף אל בית פרעה לאמר אם נא מצאתי חן בעיניכם--דברו נא באזני פרעה לאמר
בראשית 50 : 5 (ALEP)
ה אבי השביעני לאמר הנה אנכי מת--בקברי אשר כריתי לי בארץ כנען שמה תקברני ועתה אעלה נא ואקברה את אבי--ואשובה
בראשית 50 : 6 (ALEP)
ו ויאמר פרעה עלה וקבר את אביך כאשר השביעך
בראשית 50 : 7 (ALEP)
ז ויעל יוסף לקבר את אביו ויעלו אתו כל עבדי פרעה זקני ביתו וכל זקני ארץ מצרים
בראשית 50 : 8 (ALEP)
ח וכל בית יוסף ואחיו ובית אביו רק טפם וצאנם ובקרם--עזבו בארץ גשן
בראשית 50 : 9 (ALEP)
ט ויעל עמו גם רכב גם פרשים ויהי המחנה כבד מאד
בראשית 50 : 10 (ALEP)
י ויבאו עד גרן האטד אשר בעבר הירדן ויספדו שם מספד גדול וכבד מאד ויעש לאביו אבל שבעת ימים
בראשית 50 : 11 (ALEP)
יא וירא יושב הארץ הכנעני את האבל בגרן האטד ויאמרו אבל כבד זה למצרים על כן קרא שמה אבל מצרים אשר בעבר הירדן
בראשית 50 : 12 (ALEP)
יב ויעשו בניו לו--כן כאשר צום
בראשית 50 : 13 (ALEP)
יג וישאו אתו בניו ארצה כנען ויקברו אתו במערת שדה המכפלה אשר קנה אברהם את השדה לאחזת קבר מאת עפרן החתי--על פני ממרא
בראשית 50 : 14 (ALEP)
יד וישב יוסף מצרימה הוא ואחיו וכל העלים אתו לקבר את אביו אחרי קברו את אביו
בראשית 50 : 15 (ALEP)
טו ויראו אחי יוסף כי מת אביהם ויאמרו לו ישטמנו יוסף והשב ישיב לנו את כל הרעה אשר גמלנו אתו
בראשית 50 : 16 (ALEP)
טז ויצוו אל יוסף לאמר אביך צוה לפני מותו לאמר
בראשית 50 : 17 (ALEP)
יז כה תאמרו ליוסף אנא שא נא פשע אחיך וחטאתם כי רעה גמלוך ועתה שא נא לפשע עבדי אלהי אביך ויבך יוסף בדברם אליו
בראשית 50 : 18 (ALEP)
יח וילכו גם אחיו ויפלו לפניו ויאמרו הננו לך לעבדים
בראשית 50 : 19 (ALEP)
יט ויאמר אלהם יוסף אל תיראו כי התחת אלהים אני
בראשית 50 : 20 (ALEP)
כ ואתם חשבתם עלי רעה אלהים חשבה לטבה למען עשה כיום הזה להחית עם רב
בראשית 50 : 21 (ALEP)
כא ועתה אל תיראו--אנכי אכלכל אתכם ואת טפכם וינחם אותם וידבר על לבם
בראשית 50 : 22 (ALEP)
כב וישב יוסף במצרים הוא ובית אביו ויחי יוסף מאה ועשר שנים
בראשית 50 : 23 (ALEP)
כג וירא יוסף לאפרים בני שלשים גם בני מכיר בן מנשה--ילדו על ברכי יוסף
בראשית 50 : 24 (ALEP)
כד ויאמר יוסף אל אחיו אנכי מת ואלהים פקד יפקד אתכם והעלה אתכם מן הארץ הזאת אל הארץ אשר נשבע לאברהם ליצחק וליעקב
בראשית 50 : 25 (ALEP)
כה וישבע יוסף את בני ישראל לאמר פקד יפקד אלהים אתכם והעלתם את עצמתי מזה
בראשית 50 : 26 (ALEP)
כו וימת יוסף בן מאה ועשר שנים ויחנטו אתו ויישם בארון במצרים {ש}
❮
❯