בראשית 48 : 1 (ALEP)
א ויהי אחרי הדברים האלה ויאמר ליוסף הנה אביך חלה ויקח את שני בניו עמו--את מנשה ואת אפרים
בראשית 48 : 2 (ALEP)
ב ויגד ליעקב--ויאמר הנה בנך יוסף בא אליך ויתחזק ישראל וישב על המטה
בראשית 48 : 3 (ALEP)
ג ויאמר יעקב אל יוסף אל שדי נראה אלי בלוז בארץ כנען ויברך אתי
בראשית 48 : 4 (ALEP)
ד ויאמר אלי הנני מפרך והרביתך ונתתיך לקהל עמים ונתתי את הארץ הזאת לזרעך אחריך--אחזת עולם
בראשית 48 : 5 (ALEP)
ה ועתה שני בניך הנולדים לך בארץ מצרים עד באי אליך מצרימה--לי הם אפרים ומנשה--כראובן ושמעון יהיו לי
בראשית 48 : 6 (ALEP)
ו ומולדתך אשר הולדת אחריהם לך יהיו על שם אחיהם יקראו בנחלתם
בראשית 48 : 7 (ALEP)
ז ואני בבאי מפדן מתה עלי רחל בארץ כנען בדרך בעוד כברת ארץ לבא אפרתה ואקברה שם בדרך אפרת הוא בית לחם
בראשית 48 : 8 (ALEP)
ח וירא ישראל את בני יוסף ויאמר מי אלה
בראשית 48 : 9 (ALEP)
ט ויאמר יוסף אל אביו בני הם אשר נתן לי אלהים בזה ויאמר קחם נא אלי ואברכם
בראשית 48 : 10 (ALEP)
י ועיני ישראל כבדו מזקן לא יוכל לראות ויגש אתם אליו וישק להם ויחבק להם
בראשית 48 : 11 (ALEP)
יא ויאמר ישראל אל יוסף ראה פניך לא פללתי והנה הראה אתי אלהים גם את זרעך
בראשית 48 : 12 (ALEP)
יב ויוצא יוסף אתם מעם ברכיו וישתחו לאפיו ארצה
בראשית 48 : 13 (ALEP)
יג ויקח יוסף את שניהם--את אפרים בימינו משמאל ישראל ואת מנשה בשמאלו מימין ישראל ויגש אליו
בראשית 48 : 14 (ALEP)
יד וישלח ישראל את ימינו וישת על ראש אפרים והוא הצעיר ואת שמאלו על ראש מנשה שכל את ידיו כי מנשה הבכור
בראשית 48 : 15 (ALEP)
טו ויברך את יוסף ויאמר האלהים אשר התהלכו אבתי לפניו אברהם ויצחק--האלהים הרעה אתי מעודי עד היום הזה
בראשית 48 : 16 (ALEP)
טז המלאך הגאל אתי מכל רע יברך את הנערים ויקרא בהם שמי ושם אבתי אברהם ויצחק וידגו לרב בקרב הארץ
בראשית 48 : 17 (ALEP)
יז וירא יוסף כי ישית אביו יד ימינו על ראש אפרים--וירע בעיניו ויתמך יד אביו להסיר אתה מעל ראש אפרים--על ראש מנשה
בראשית 48 : 18 (ALEP)
יח ויאמר יוסף אל אביו לא כן אבי כי זה הבכר שים ימינך על ראשו
בראשית 48 : 19 (ALEP)
יט וימאן אביו ויאמר ידעתי בני ידעתי--גם הוא יהיה לעם וגם הוא יגדל ואולם אחיו הקטן יגדל ממנו וזרעו יהיה מלא הגוים
בראשית 48 : 20 (ALEP)
כ ויברכם ביום ההוא לאמור בך יברך ישראל לאמר ישמך אלהים כאפרים וכמנשה וישם את אפרים לפני מנשה
בראשית 48 : 21 (ALEP)
כא ויאמר ישראל אל יוסף הנה אנכי מת והיה אלהים עמכם והשיב אתכם אל ארץ אבתיכם
בראשית 48 : 22 (ALEP)
כב ואני נתתי לך שכם אחד--על אחיך אשר לקחתי מיד האמרי בחרבי ובקשתי {פ}
❮
❯