בראשית 45 : 1 (ALEP)
א ולא יכל יוסף להתאפק לכל הנצבים עליו ויקרא הוציאו כל איש מעלי ולא עמד איש אתו בהתודע יוסף אל אחיו
בראשית 45 : 2 (ALEP)
ב ויתן את קלו בבכי וישמעו מצרים וישמע בית פרעה
בראשית 45 : 3 (ALEP)
ג ויאמר יוסף אל אחיו אני יוסף העוד אבי חי ולא יכלו אחיו לענות אתו כי נבהלו מפניו
בראשית 45 : 4 (ALEP)
ד ויאמר יוסף אל אחיו גשו נא אלי ויגשו ויאמר אני יוסף אחיכם אשר מכרתם אתי מצרימה
בראשית 45 : 5 (ALEP)
ה ועתה אל תעצבו ואל יחר בעיניכם כי מכרתם אתי הנה כי למחיה שלחני אלהים לפניכם
בראשית 45 : 6 (ALEP)
ו כי זה שנתים הרעב בקרב הארץ ועוד חמש שנים אשר אין חריש וקציר
בראשית 45 : 7 (ALEP)
ז וישלחני אלהים לפניכם לשום לכם שארית בארץ ולהחיות לכם לפליטה גדלה
בראשית 45 : 8 (ALEP)
ח ועתה לא אתם שלחתם אתי הנה כי האלהים וישימני לאב לפרעה ולאדון לכל ביתו ומשל בכל ארץ מצרים
בראשית 45 : 9 (ALEP)
ט מהרו ועלו אל אבי ואמרתם אליו כה אמר בנך יוסף שמני אלהים לאדון לכל מצרים רדה אלי אל תעמד
בראשית 45 : 10 (ALEP)
י וישבת בארץ גשן והיית קרוב אלי--אתה ובניך ובני בניך וצאנך ובקרך וכל אשר לך
בראשית 45 : 11 (ALEP)
יא וכלכלתי אתך שם כי עוד חמש שנים רעב פן תורש אתה וביתך וכל אשר לך
בראשית 45 : 12 (ALEP)
יב והנה עיניכם ראות ועיני אחי בנימין כי פי המדבר אליכם
בראשית 45 : 13 (ALEP)
יג והגדתם לאבי את כל כבודי במצרים ואת כל אשר ראיתם ומהרתם והורדתם את אבי הנה
בראשית 45 : 14 (ALEP)
יד ויפל על צוארי בנימן אחיו ויבך ובנימן--בכה על צואריו
בראשית 45 : 15 (ALEP)
טו וינשק לכל אחיו ויבך עלהם ואחרי כן דברו אחיו אתו
בראשית 45 : 16 (ALEP)
טז והקל נשמע בית פרעה לאמר באו אחי יוסף וייטב בעיני פרעה ובעיני עבדיו
בראשית 45 : 17 (ALEP)
יז ויאמר פרעה אל יוסף אמר אל אחיך זאת עשו טענו את בעירכם ולכו באו ארצה כנען
בראשית 45 : 18 (ALEP)
יח וקחו את אביכם ואת בתיכם ובאו אלי ואתנה לכם את טוב ארץ מצרים ואכלו את חלב הארץ
בראשית 45 : 19 (ALEP)
יט ואתה צויתה זאת עשו קחו לכם מארץ מצרים עגלות לטפכם ולנשיכם ונשאתם את אביכם ובאתם
בראשית 45 : 20 (ALEP)
כ ועינכם אל תחס על כליכם כי טוב כל ארץ מצרים לכם הוא
בראשית 45 : 21 (ALEP)
כא ויעשו כן בני ישראל ויתן להם יוסף עגלות על פי פרעה ויתן להם צדה לדרך
בראשית 45 : 22 (ALEP)
כב לכלם נתן לאיש חלפות שמלת ולבנימן נתן שלש מאות כסף וחמש חלפת שמלת
בראשית 45 : 23 (ALEP)
כג ולאביו שלח כזאת עשרה חמרים נשאים מטוב מצרים ועשר אתנת נשאת בר ולחם ומזון לאביו--לדרך
בראשית 45 : 24 (ALEP)
כד וישלח את אחיו וילכו ויאמר אלהם אל תרגזו בדרך
בראשית 45 : 25 (ALEP)
כה ויעלו ממצרים ויבאו ארץ כנען אל יעקב אביהם
בראשית 45 : 26 (ALEP)
כו ויגדו לו לאמר עוד יוסף חי וכי הוא משל בכל ארץ מצרים ויפג לבו כי לא האמין להם
בראשית 45 : 27 (ALEP)
כז וידברו אליו את כל דברי יוסף אשר דבר אלהם וירא את העגלות אשר שלח יוסף לשאת אתו ותחי רוח יעקב אביהם
בראשית 45 : 28 (ALEP)
כח ויאמר ישראל רב עוד יוסף בני חי אלכה ואראנו בטרם אמות
❮
❯