בראשית 44 : 1 (ALEP)
א ויצו את אשר על ביתו לאמר מלא את אמתחת האנשים אכל כאשר יוכלון שאת ושים כסף איש בפי אמתחתו
בראשית 44 : 2 (ALEP)
ב ואת גביעי גביע הכסף תשים בפי אמתחת הקטן ואת כסף שברו ויעש כדבר יוסף אשר דבר
בראשית 44 : 3 (ALEP)
ג הבקר אור והאנשים שלחו המה וחמריהם
בראשית 44 : 4 (ALEP)
ד הם יצאו את העיר לא הרחיקו ויוסף אמר לאשר על ביתו קום רדף אחרי האנשים והשגתם ואמרת אלהם למה שלמתם רעה תחת טובה
בראשית 44 : 5 (ALEP)
ה הלוא זה אשר ישתה אדני בו והוא נחש ינחש בו הרעתם אשר עשיתם
בראשית 44 : 6 (ALEP)
ו וישגם וידבר אלהם את הדברים האלה
בראשית 44 : 7 (ALEP)
ז ויאמרו אליו--למה ידבר אדני כדברים האלה חלילה לעבדיך מעשות כדבר הזה
בראשית 44 : 8 (ALEP)
ח הן כסף אשר מצאנו בפי אמתחתינו--השיבנו אליך מארץ כנען ואיך נגנב מבית אדניך כסף או זהב
בראשית 44 : 9 (ALEP)
ט אשר ימצא אתו מעבדיך ומת וגם אנחנו נהיה לאדני לעבדים
בראשית 44 : 10 (ALEP)
י ויאמר גם עתה כדבריכם כן הוא אשר ימצא אתו יהיה לי עבד ואתם תהיו נקים
בראשית 44 : 11 (ALEP)
יא וימהרו ויורדו איש את אמתחתו--ארצה ויפתחו איש אמתחתו
בראשית 44 : 12 (ALEP)
יב ויחפש--בגדול החל ובקטן כלה וימצא הגביע באמתחת בנימן
בראשית 44 : 13 (ALEP)
יג ויקרעו שמלתם ויעמס איש על חמרו וישבו העירה
בראשית 44 : 14 (ALEP)
יד ויבא יהודה ואחיו ביתה יוסף והוא עודנו שם ויפלו לפניו ארצה
בראשית 44 : 15 (ALEP)
טו ויאמר להם יוסף מה המעשה הזה אשר עשיתם הלוא ידעתם כי נחש ינחש איש אשר כמני
בראשית 44 : 16 (ALEP)
טז ויאמר יהודה מה נאמר לאדני מה נדבר ומה נצטדק האלהים מצא את עון עבדיך--הננו עבדים לאדני גם אנחנו גם אשר נמצא הגביע בידו
בראשית 44 : 17 (ALEP)
יז ויאמר--חלילה לי מעשות זאת האיש אשר נמצא הגביע בידו הוא יהיה לי עבד ואתם עלו לשלום אל אביכם ס
בראשית 44 : 18 (ALEP)
יח ויגש אליו יהודה ויאמר בי אדני ידבר נא עבדך דבר באזני אדני ואל יחר אפך בעבדך כי כמוך כפרעה
בראשית 44 : 19 (ALEP)
יט אדני שאל את עבדיו לאמר היש לכם אב או אח
בראשית 44 : 20 (ALEP)
כ ונאמר אל אדני יש לנו אב זקן וילד זקנים קטן ואחיו מת ויותר הוא לבדו לאמו ואביו אהבו
בראשית 44 : 21 (ALEP)
כא ותאמר אל עבדיך הורדהו אלי ואשימה עיני עליו
בראשית 44 : 22 (ALEP)
כב ונאמר אל אדני לא יוכל הנער לעזב את אביו ועזב את אביו ומת
בראשית 44 : 23 (ALEP)
כג ותאמר אל עבדיך אם לא ירד אחיכם הקטן אתכם--לא תספון לראות פני
בראשית 44 : 24 (ALEP)
כד ויהי כי עלינו אל עבדך אבי ונגד לו--את דברי אדני
בראשית 44 : 25 (ALEP)
כה ויאמר אבינו שבו שברו לנו מעט אכל
בראשית 44 : 26 (ALEP)
כו ונאמר לא נוכל לרדת אם יש אחינו הקטן אתנו וירדנו--כי לא נוכל לראות פני האיש ואחינו הקטן איננו אתנו
בראשית 44 : 27 (ALEP)
כז ויאמר עבדך אבי אלינו אתם ידעתם כי שנים ילדה לי אשתי
בראשית 44 : 28 (ALEP)
כח ויצא האחד מאתי ואמר אך טרף טרף ולא ראיתיו עד הנה
בראשית 44 : 29 (ALEP)
כט ולקחתם גם את זה מעם פני וקרהו אסון--והורדתם את שיבתי ברעה שאלה
בראשית 44 : 30 (ALEP)
ל ועתה כבאי אל עבדך אבי והנער איננו אתנו ונפשו קשורה בנפשו
בראשית 44 : 31 (ALEP)
לא והיה כראותו כי אין הנער--ומת והורידו עבדיך את שיבת עבדך אבינו ביגון--שאלה
בראשית 44 : 32 (ALEP)
לב כי עבדך ערב את הנער מעם אבי לאמר אם לא אביאנו אליך וחטאתי לאבי כל הימים
בראשית 44 : 33 (ALEP)
לג ועתה ישב נא עבדך תחת הנער--עבד לאדני והנער יעל עם אחיו
בראשית 44 : 34 (ALEP)
לד כי איך אעלה אל אבי והנער איננו אתי פן אראה ברע אשר ימצא את אבי
❮
❯