בראשית 43 : 1 (ALEP)
א והרעב כבד בארץ
בראשית 43 : 2 (ALEP)
ב ויהי כאשר כלו לאכל את השבר אשר הביאו ממצרים ויאמר אליהם אביהם שבו שברו לנו מעט אכל
בראשית 43 : 3 (ALEP)
ג ויאמר אליו יהודה לאמר העד העד בנו האיש לאמר לא תראו פני בלתי אחיכם אתכם
בראשית 43 : 4 (ALEP)
ד אם ישך משלח את אחינו אתנו--נרדה ונשברה לך אכל
בראשית 43 : 5 (ALEP)
ה ואם אינך משלח לא נרד כי האיש אמר אלינו לא תראו פני בלתי אחיכם אתכם
בראשית 43 : 6 (ALEP)
ו ויאמר ישראל למה הרעתם לי--להגיד לאיש העוד לכם אח
בראשית 43 : 7 (ALEP)
ז ויאמרו שאול שאל האיש לנו ולמולדתנו לאמר העוד אביכם חי היש לכם אח ונגד לו על פי הדברים האלה הידוע נדע--כי יאמר הורידו את אחיכם
בראשית 43 : 8 (ALEP)
ח ויאמר יהודה אל ישראל אביו שלחה הנער אתי--ונקומה ונלכה ונחיה ולא נמות גם אנחנו גם אתה גם טפנו
בראשית 43 : 9 (ALEP)
ט אנכי אערבנו--מידי תבקשנו אם לא הביאתיו אליך והצגתיו לפניך וחטאתי לך כל הימים
בראשית 43 : 10 (ALEP)
י כי לולא התמהמהנו--כי עתה שבנו זה פעמים
בראשית 43 : 11 (ALEP)
יא ויאמר אלהם ישראל אביהם אם כן אפוא זאת עשו--קחו מזמרת הארץ בכליכם והורידו לאיש מנחה מעט צרי ומעט דבש נכאת ולט בטנים ושקדים
בראשית 43 : 12 (ALEP)
יב וכסף משנה קחו בידכם ואת הכסף המושב בפי אמתחתיכם תשיבו בידכם--אולי משגה הוא
בראשית 43 : 13 (ALEP)
יג ואת אחיכם קחו וקומו שובו אל האיש
בראשית 43 : 14 (ALEP)
יד ואל שדי יתן לכם רחמים לפני האיש ושלח לכם את אחיכם אחר ואת בנימין ואני כאשר שכלתי שכלתי
בראשית 43 : 15 (ALEP)
טו ויקחו האנשים את המנחה הזאת ומשנה כסף לקחו בידם ואת בנימן ויקמו וירדו מצרים ויעמדו לפני יוסף
בראשית 43 : 16 (ALEP)
טז וירא יוסף אתם את בנימין ויאמר לאשר על ביתו הבא את האנשים הביתה וטבח טבח והכן כי אתי יאכלו האנשים בצהרים
בראשית 43 : 17 (ALEP)
יז ויעש האיש כאשר אמר יוסף ויבא האיש את האנשים ביתה יוסף
בראשית 43 : 18 (ALEP)
יח וייראו האנשים כי הובאו בית יוסף ויאמרו על דבר הכסף השב באמתחתינו בתחלה אנחנו מובאים--להתגלל עלינו ולהתנפל עלינו ולקחת אתנו לעבדים ואת חמרינו
בראשית 43 : 19 (ALEP)
יט ויגשו אל האיש אשר על בית יוסף וידברו אליו פתח הבית
בראשית 43 : 20 (ALEP)
כ ויאמרו בי אדני ירד ירדנו בתחלה לשבר אכל
בראשית 43 : 21 (ALEP)
כא ויהי כי באנו אל המלון ונפתחה את אמתחתינו והנה כסף איש בפי אמתחתו כספנו במשקלו ונשב אתו בידנו
בראשית 43 : 22 (ALEP)
כב וכסף אחר הורדנו בידנו לשבר אכל לא ידענו מי שם כספנו באמתחתינו
בראשית 43 : 23 (ALEP)
כג ויאמר שלום לכם אל תיראו אלהיכם ואלהי אביכם נתן לכם מטמון באמתחתיכם--כספכם בא אלי ויוצא אלהם את שמעון
בראשית 43 : 24 (ALEP)
כד ויבא האיש את האנשים ביתה יוסף ויתן מים וירחצו רגליהם ויתן מספוא לחמריהם
בראשית 43 : 25 (ALEP)
כה ויכינו את המנחה עד בוא יוסף בצהרים כי שמעו כי שם יאכלו לחם
בראשית 43 : 26 (ALEP)
כו ויבא יוסף הביתה ויביאו לו את המנחה אשר בידם הביתה וישתחוו לו ארצה
בראשית 43 : 27 (ALEP)
כז וישאל להם לשלום ויאמר השלום אביכם הזקן אשר אמרתם--העודנו חי
בראשית 43 : 28 (ALEP)
כח ויאמרו שלום לעבדך לאבינו--עודנו חי ויקדו וישתחו (וישתחוו)
בראשית 43 : 29 (ALEP)
כט וישא עיניו וירא את בנימין אחיו בן אמו ויאמר הזה אחיכם הקטן אשר אמרתם אלי ויאמר אלהים יחנך בני
בראשית 43 : 30 (ALEP)
ל וימהר יוסף כי נכמרו רחמיו אל אחיו ויבקש לבכות ויבא החדרה ויבך שמה
בראשית 43 : 31 (ALEP)
לא וירחץ פניו ויצא ויתאפק--ויאמר שימו לחם
בראשית 43 : 32 (ALEP)
לב וישימו לו לבדו ולהם לבדם ולמצרים האכלים אתו לבדם--כי לא יוכלון המצרים לאכל את העברים לחם כי תועבה הוא למצרים
בראשית 43 : 33 (ALEP)
לג וישבו לפניו--הבכר כבכרתו והצעיר כצערתו ויתמהו האנשים איש אל רעהו
בראשית 43 : 34 (ALEP)
לד וישא משאת מאת פניו אלהם ותרב משאת בנימן ממשאת כלם חמש ידות וישתו וישכרו עמו
❮
❯