Genesis 42 : 1 (ALEP)
א וירא יעקב כי יש שבר במצרים ויאמר יעקב לבניו למה תתראו
Genesis 42 : 2 (ALEP)
ב ויאמר--הנה שמעתי כי יש שבר במצרים רדו שמה ושברו לנו משם ונחיה ולא נמות
Genesis 42 : 3 (ALEP)
ג וירדו אחי יוסף עשרה לשבר בר ממצרים
Genesis 42 : 4 (ALEP)
ד ואת בנימין אחי יוסף לא שלח יעקב את אחיו כי אמר פן יקראנו אסון
Genesis 42 : 5 (ALEP)
ה ויבאו בני ישראל לשבר בתוך הבאים כי היה הרעב בארץ כנען
Genesis 42 : 6 (ALEP)
ו ויוסף הוא השליט על הארץ--הוא המשביר לכל עם הארץ ויבאו אחי יוסף וישתחוו לו אפים ארצה
Genesis 42 : 7 (ALEP)
ז וירא יוסף את אחיו ויכרם ויתנכר אליהם וידבר אתם קשות ויאמר אלהם מאין באתם ויאמרו מארץ כנען לשבר אכל
Genesis 42 : 8 (ALEP)
ח ויכר יוסף את אחיו והם לא הכרהו
Genesis 42 : 9 (ALEP)
ט ויזכר יוסף--את החלמות אשר חלם להם ויאמר אלהם מרגלים אתם לראות את ערות הארץ באתם
Genesis 42 : 10 (ALEP)
י ויאמרו אליו לא אדני ועבדיך באו לשבר אכל
Genesis 42 : 11 (ALEP)
יא כלנו בני איש אחד נחנו כנים אנחנו לא היו עבדיך מרגלים
Genesis 42 : 12 (ALEP)
יב ויאמר אלהם לא כי ערות הארץ באתם לראות
Genesis 42 : 13 (ALEP)
יג ויאמרו שנים עשר עבדיך אחים אנחנו בני איש אחד--בארץ כנען והנה הקטן את אבינו היום והאחד איננו
Genesis 42 : 14 (ALEP)
יד ויאמר אלהם יוסף הוא אשר דברתי אלכם לאמר--מרגלים אתם
Genesis 42 : 15 (ALEP)
טו בזאת תבחנו חי פרעה אם תצאו מזה כי אם בבוא אחיכם הקטן הנה
Genesis 42 : 16 (ALEP)
טז שלחו מכם אחד ויקח את אחיכם ואתם האסרו ויבחנו דבריכם האמת אתכם ואם לא--חי פרעה כי מרגלים אתם
Genesis 42 : 17 (ALEP)
יז ויאסף אתם אל משמר שלשת ימים
Genesis 42 : 18 (ALEP)
יח ויאמר אלהם יוסף ביום השלישי זאת עשו וחיו את האלהים אני ירא
Genesis 42 : 19 (ALEP)
יט אם כנים אתם--אחיכם אחד יאסר בבית משמרכם ואתם לכו הביאו שבר רעבון בתיכם
Genesis 42 : 20 (ALEP)
כ ואת אחיכם הקטן תביאו אלי ויאמנו דבריכם ולא תמותו ויעשו כן
Genesis 42 : 21 (ALEP)
כא ויאמרו איש אל אחיו אבל אשמים אנחנו על אחינו אשר ראינו צרת נפשו בהתחננו אלינו ולא שמענו על כן באה אלינו הצרה הזאת
Genesis 42 : 22 (ALEP)
כב ויען ראובן אתם לאמר הלוא אמרתי אליכם לאמר אל תחטאו בילד--ולא שמעתם וגם דמו הנה נדרש
Genesis 42 : 23 (ALEP)
כג והם לא ידעו כי שמע יוסף כי המליץ בינתם
Genesis 42 : 24 (ALEP)
כד ויסב מעליהם ויבך וישב אלהם וידבר אלהם ויקח מאתם את שמעון ויאסר אתו לעיניהם
Genesis 42 : 25 (ALEP)
כה ויצו יוסף וימלאו את כליהם בר ולהשיב כספיהם איש אל שקו ולתת להם צדה לדרך ויעש להם כן
Genesis 42 : 26 (ALEP)
כו וישאו את שברם על חמריהם וילכו משם
Genesis 42 : 27 (ALEP)
כז ויפתח האחד את שקו לתת מספוא לחמרו--במלון וירא את כספו והנה הוא בפי אמתחתו
Genesis 42 : 28 (ALEP)
כח ויאמר אל אחיו הושב כספי וגם הנה באמתחתי ויצא לבם ויחרדו איש אל אחיו לאמר מה זאת עשה אלהים לנו
Genesis 42 : 29 (ALEP)
כט ויבאו אל יעקב אביהם ארצה כנען ויגידו לו את כל הקרת אתם לאמר
Genesis 42 : 30 (ALEP)
ל דבר האיש אדני הארץ אתנו--קשות ויתן אתנו כמרגלים את הארץ
Genesis 42 : 31 (ALEP)
לא ונאמר אליו כנים אנחנו לא היינו מרגלים
Genesis 42 : 32 (ALEP)
לב שנים עשר אנחנו אחים בני אבינו האחד איננו והקטן היום את אבינו בארץ כנען
Genesis 42 : 33 (ALEP)
לג ויאמר אלינו האיש אדני הארץ בזאת אדע כי כנים אתם אחיכם האחד הניחו אתי ואת רעבון בתיכם קחו ולכו
Genesis 42 : 34 (ALEP)
לד והביאו את אחיכם הקטן אלי ואדעה כי לא מרגלים אתם כי כנים אתם את אחיכם אתן לכם ואת הארץ תסחרו
Genesis 42 : 35 (ALEP)
לה ויהי הם מריקים שקיהם והנה איש צרור כספו בשקו ויראו את צררות כספיהם המה ואביהם--וייראו
Genesis 42 : 36 (ALEP)
לו ויאמר אלהם יעקב אביהם אתי שכלתם יוסף איננו ושמעון איננו ואת בנימן תקחו עלי היו כלנה
Genesis 42 : 37 (ALEP)
לז ויאמר ראובן אל אביו לאמר את שני בני תמית אם לא אביאנו אליך תנה אתו על ידי ואני אשיבנו אליך
Genesis 42 : 38 (ALEP)
לח ויאמר לא ירד בני עמכם כי אחיו מת והוא לבדו נשאר וקראהו אסון בדרך אשר תלכו בה והורדתם את שיבתי ביגון שאולה
❮
❯