בראשית 40 : 1 (ALEP)
א ויהי אחר הדברים האלה חטאו משקה מלך מצרים והאפה--לאדניהם למלך מצרים
בראשית 40 : 2 (ALEP)
ב ויקצף פרעה על שני סריסיו--על שר המשקים ועל שר האופים
בראשית 40 : 3 (ALEP)
ג ויתן אתם במשמר בית שר הטבחים--אל בית הסהר מקום אשר יוסף אסור שם
בראשית 40 : 4 (ALEP)
ד ויפקד שר הטבחים את יוסף אתם--וישרת אתם ויהיו ימים במשמר
בראשית 40 : 5 (ALEP)
ה ויחלמו חלום שניהם איש חלמו בלילה אחד--איש כפתרון חלמו המשקה והאפה אשר למלך מצרים אשר אסורים בבית הסהר
בראשית 40 : 6 (ALEP)
ו ויבא אליהם יוסף בבקר וירא אתם והנם זעפים
בראשית 40 : 7 (ALEP)
ז וישאל את סריסי פרעה אשר אתו במשמר בית אדניו--לאמר מדוע פניכם רעים היום
בראשית 40 : 8 (ALEP)
ח ויאמרו אליו--חלום חלמנו ופתר אין אתו ויאמר אלהם יוסף הלוא לאלהים פתרנים--ספרו נא לי
בראשית 40 : 9 (ALEP)
ט ויספר שר המשקים את חלמו ליוסף ויאמר לו--בחלומי והנה גפן לפני
בראשית 40 : 10 (ALEP)
י ובגפן שלשה שריגם והוא כפרחת עלתה נצה הבשילו אשכלתיה ענבים
בראשית 40 : 11 (ALEP)
יא וכוס פרעה בידי ואקח את הענבים ואשחט אתם אל כוס פרעה ואתן את הכוס על כף פרעה
בראשית 40 : 12 (ALEP)
יב ויאמר לו יוסף זה פתרנו שלשת השרגים--שלשת ימים הם
בראשית 40 : 13 (ALEP)
יג בעוד שלשת ימים ישא פרעה את ראשך והשיבך על כנך ונתת כוס פרעה בידו כמשפט הראשון אשר היית משקהו
בראשית 40 : 14 (ALEP)
יד כי אם זכרתני אתך כאשר ייטב לך ועשית נא עמדי חסד והזכרתני אל פרעה והוצאתני מן הבית הזה
בראשית 40 : 15 (ALEP)
טו כי גנב גנבתי מארץ העברים וגם פה לא עשיתי מאומה כי שמו אתי בבור
בראשית 40 : 16 (ALEP)
טז וירא שר האפים כי טוב פתר ויאמר אל יוסף אף אני בחלומי והנה שלשה סלי חרי על ראשי
בראשית 40 : 17 (ALEP)
יז ובסל העליון מכל מאכל פרעה--מעשה אפה והעוף אכל אתם מן הסל--מעל ראשי
בראשית 40 : 18 (ALEP)
יח ויען יוסף ויאמר זה פתרנו שלשת הסלים--שלשת ימים הם
בראשית 40 : 19 (ALEP)
יט בעוד שלשת ימים ישא פרעה את ראשך מעליך ותלה אותך על עץ ואכל העוף את בשרך מעליך
בראשית 40 : 20 (ALEP)
כ ויהי ביום השלישי יום הלדת את פרעה ויעש משתה לכל עבדיו וישא את ראש שר המשקים ואת ראש שר האפים--בתוך עבדיו
בראשית 40 : 21 (ALEP)
כא וישב את שר המשקים על משקהו ויתן הכוס על כף פרעה
בראשית 40 : 22 (ALEP)
כב ואת שר האפים תלה כאשר פתר להם יוסף
בראשית 40 : 23 (ALEP)
כג ולא זכר שר המשקים את יוסף וישכחהו {פ}
❮
❯