בראשית 4 : 1 (ALEP)
א והאדם ידע את חוה אשתו ותהר ותלד את קין ותאמר קניתי איש את יהוה
בראשית 4 : 2 (ALEP)
ב ותסף ללדת את אחיו את הבל ויהי הבל רעה צאן וקין היה עבד אדמה
בראשית 4 : 3 (ALEP)
ג ויהי מקץ ימים ויבא קין מפרי האדמה מנחה--ליהוה
בראשית 4 : 4 (ALEP)
ד והבל הביא גם הוא מבכרות צאנו ומחלבהן וישע יהוה אל הבל ואל מנחתו
בראשית 4 : 5 (ALEP)
ה ואל קין ואל מנחתו לא שעה ויחר לקין מאד ויפלו פניו
בראשית 4 : 6 (ALEP)
ו ויאמר יהוה אל קין למה חרה לך ולמה נפלו פניך
בראשית 4 : 7 (ALEP)
ז הלוא אם תיטיב שאת ואם לא תיטיב לפתח חטאת רבץ ואליך תשוקתו ואתה תמשל בו
בראשית 4 : 8 (ALEP)
ח ויאמר קין אל הבל אחיו ויהי בהיותם בשדה ויקם קין אל הבל אחיו ויהרגהו
בראשית 4 : 9 (ALEP)
ט ויאמר יהוה אל קין אי הבל אחיך ויאמר לא ידעתי השמר אחי אנכי
בראשית 4 : 10 (ALEP)
י ויאמר מה עשית קול דמי אחיך צעקים אלי מן האדמה
בראשית 4 : 11 (ALEP)
יא ועתה ארור אתה מן האדמה אשר פצתה את פיה לקחת את דמי אחיך מידך
בראשית 4 : 12 (ALEP)
יב כי תעבד את האדמה לא תסף תת כחה לך נע ונד תהיה בארץ
בראשית 4 : 13 (ALEP)
יג ויאמר קין אל יהוה גדול עוני מנשא
בראשית 4 : 14 (ALEP)
יד הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני
בראשית 4 : 15 (ALEP)
טו ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאו
בראשית 4 : 16 (ALEP)
טז ויצא קין מלפני יהוה וישב בארץ נוד קדמת עדן
בראשית 4 : 17 (ALEP)
יז וידע קין את אשתו ותהר ותלד את חנוך ויהי בנה עיר ויקרא שם העיר כשם בנו חנוך
בראשית 4 : 18 (ALEP)
יח ויולד לחנוך את עירד ועירד ילד את מחויאל ומחייאל ילד את מתושאל ומתושאל ילד את למך
בראשית 4 : 19 (ALEP)
יט ויקח לו למך שתי נשים שם האחת עדה ושם השנית צלה
בראשית 4 : 20 (ALEP)
כ ותלד עדה את יבל הוא היה--אבי ישב אהל ומקנה
בראשית 4 : 21 (ALEP)
כא ושם אחיו יובל הוא היה--אבי כל תפש כנור ועוגב
בראשית 4 : 22 (ALEP)
כב וצלה גם הוא ילדה את תובל קין--לטש כל חרש נחשת וברזל ואחות תובל קין נעמה
בראשית 4 : 23 (ALEP)
כג ויאמר למך לנשיו עדה וצלה שמען קולי--נשי למך האזנה אמרתי כי איש הרגתי לפצעי וילד לחברתי
בראשית 4 : 24 (ALEP)
כד כי שבעתים יקם קין ולמך שבעים ושבעה
בראשית 4 : 25 (ALEP)
כה וידע אדם עוד את אשתו ותלד בן ותקרא את שמו שת כי שת לי אלהים זרע אחר--תחת הבל כי הרגו קין
בראשית 4 : 26 (ALEP)
כו ולשת גם הוא ילד בן ויקרא את שמו אנוש אז הוחל לקרא בשם יהוה {ס}
❮
❯