בראשית 39 : 1 (ALEP)
א ויוסף הורד מצרימה ויקנהו פוטיפר סריס פרעה שר הטבחים איש מצרי מיד הישמעאלים אשר הורדהו שמה
בראשית 39 : 2 (ALEP)
ב ויהי יהוה את יוסף ויהי איש מצליח ויהי בבית אדניו המצרי
בראשית 39 : 3 (ALEP)
ג וירא אדניו כי יהוה אתו וכל אשר הוא עשה יהוה מצליח בידו
בראשית 39 : 4 (ALEP)
ד וימצא יוסף חן בעיניו וישרת אתו ויפקדהו על ביתו וכל יש לו נתן בידו
בראשית 39 : 5 (ALEP)
ה ויהי מאז הפקיד אתו בביתו ועל כל אשר יש לו ויברך יהוה את בית המצרי בגלל יוסף ויהי ברכת יהוה בכל אשר יש לו--בבית ובשדה
בראשית 39 : 6 (ALEP)
ו ויעזב כל אשר לו ביד יוסף ולא ידע אתו מאומה כי אם הלחם אשר הוא אוכל ויהי יוסף יפה תאר ויפה מראה
בראשית 39 : 7 (ALEP)
ז ויהי אחר הדברים האלה ותשא אשת אדניו את עיניה אל יוסף ותאמר שכבה עמי
בראשית 39 : 8 (ALEP)
ח וימאן--ויאמר אל אשת אדניו הן אדני לא ידע אתי מה בבית וכל אשר יש לו נתן בידי
בראשית 39 : 9 (ALEP)
ט איננו גדול בבית הזה ממני ולא חשך ממני מאומה כי אם אותך באשר את אשתו ואיך אעשה הרעה הגדלה הזאת וחטאתי לאלהים
בראשית 39 : 10 (ALEP)
י ויהי כדברה אל יוסף יום יום ולא שמע אליה לשכב אצלה להיות עמה
בראשית 39 : 11 (ALEP)
יא ויהי כהיום הזה ויבא הביתה לעשות מלאכתו ואין איש מאנשי הבית שם--בבית
בראשית 39 : 12 (ALEP)
יב ותתפשהו בבגדו לאמר שכבה עמי ויעזב בגדו בידה וינס ויצא החוצה
בראשית 39 : 13 (ALEP)
יג ויהי כראותה כי עזב בגדו בידה וינס החוצה
בראשית 39 : 14 (ALEP)
יד ותקרא לאנשי ביתה ותאמר להם לאמר ראו הביא לנו איש עברי לצחק בנו בא אלי לשכב עמי ואקרא בקול גדול
בראשית 39 : 15 (ALEP)
טו ויהי כשמעו כי הרימתי קולי ואקרא ויעזב בגדו אצלי וינס ויצא החוצה
בראשית 39 : 16 (ALEP)
טז ותנח בגדו אצלה עד בוא אדניו אל ביתו
בראשית 39 : 17 (ALEP)
יז ותדבר אליו כדברים האלה לאמר בא אלי העבד העברי אשר הבאת לנו--לצחק בי
בראשית 39 : 18 (ALEP)
יח ויהי כהרימי קולי ואקרא ויעזב בגדו אצלי וינס החוצה
בראשית 39 : 19 (ALEP)
יט ויהי כשמע אדניו את דברי אשתו אשר דברה אליו לאמר כדברים האלה עשה לי עבדך ויחר אפו
בראשית 39 : 20 (ALEP)
כ ויקח אדני יוסף אתו ויתנהו אל בית הסהר--מקום אשר אסורי (אסירי) המלך אסורים ויהי שם בבית הסהר
בראשית 39 : 21 (ALEP)
כא ויהי יהוה את יוסף ויט אליו חסד ויתן חנו בעיני שר בית הסהר
בראשית 39 : 22 (ALEP)
כב ויתן שר בית הסהר ביד יוסף את כל האסירם אשר בבית הסהר ואת כל אשר עשים שם הוא היה עשה
בראשית 39 : 23 (ALEP)
כג אין שר בית הסהר ראה את כל מאומה בידו באשר יהוה אתו ואשר הוא עשה יהוה מצליח {פ}
❮
❯