בראשית 38 : 1 (ALEP)
א ויהי בעת ההוא וירד יהודה מאת אחיו ויט עד איש עדלמי ושמו חירה
בראשית 38 : 2 (ALEP)
ב וירא שם יהודה בת איש כנעני ושמו שוע ויקחה ויבא אליה
בראשית 38 : 3 (ALEP)
ג ותהר ותלד בן ויקרא את שמו ער
בראשית 38 : 4 (ALEP)
ד ותהר עוד ותלד בן ותקרא את שמו אונן
בראשית 38 : 5 (ALEP)
ה ותסף עוד ותלד בן ותקרא את שמו שלה והיה בכזיב בלדתה אתו
בראשית 38 : 6 (ALEP)
ו ויקח יהודה אשה לער בכורו ושמה תמר
בראשית 38 : 7 (ALEP)
ז ויהי ער בכור יהודה--רע בעיני יהוה וימתהו יהוה
בראשית 38 : 8 (ALEP)
ח ויאמר יהודה לאונן בא אל אשת אחיך ויבם אתה והקם זרע לאחיך
בראשית 38 : 9 (ALEP)
ט וידע אונן כי לא לו יהיה הזרע והיה אם בא אל אשת אחיו ושחת ארצה לבלתי נתן זרע לאחיו
בראשית 38 : 10 (ALEP)
י וירע בעיני יהוה אשר עשה וימת גם אתו
בראשית 38 : 11 (ALEP)
יא ויאמר יהודה לתמר כלתו שבי אלמנה בית אביך עד יגדל שלה בני--כי אמר פן ימות גם הוא כאחיו ותלך תמר ותשב בית אביה
בראשית 38 : 12 (ALEP)
יב וירבו הימים ותמת בת שוע אשת יהודה וינחם יהודה ויעל על גזזי צאנו הוא וחירה רעהו העדלמי--תמנתה
בראשית 38 : 13 (ALEP)
יג ויגד לתמר לאמר הנה חמיך עלה תמנתה לגז צאנו
בראשית 38 : 14 (ALEP)
יד ותסר בגדי אלמנותה מעליה ותכס בצעיף ותתעלף ותשב בפתח עינים אשר על דרך תמנתה כי ראתה כי גדל שלה והוא לא נתנה לו לאשה
בראשית 38 : 15 (ALEP)
טו ויראה יהודה ויחשבה לזונה כי כסתה פניה
בראשית 38 : 16 (ALEP)
טז ויט אליה אל הדרך ויאמר הבה נא אבוא אליך כי לא ידע כי כלתו הוא ותאמר מה תתן לי כי תבוא אלי
בראשית 38 : 17 (ALEP)
יז ויאמר אנכי אשלח גדי עזים מן הצאן ותאמר אם תתן ערבון עד שלחך
בראשית 38 : 18 (ALEP)
יח ויאמר מה הערבון אשר אתן לך ותאמר חתמך ופתילך ומטך אשר בידך ויתן לה ויבא אליה ותהר לו
בראשית 38 : 19 (ALEP)
יט ותקם ותלך ותסר צעיפה מעליה ותלבש בגדי אלמנותה
בראשית 38 : 20 (ALEP)
כ וישלח יהודה את גדי העזים ביד רעהו העדלמי לקחת הערבון מיד האשה ולא מצאה
בראשית 38 : 21 (ALEP)
כא וישאל את אנשי מקמה לאמר איה הקדשה הוא בעינים על הדרך ויאמרו לא היתה בזה קדשה
בראשית 38 : 22 (ALEP)
כב וישב אל יהודה ויאמר לא מצאתיה וגם אנשי המקום אמרו לא היתה בזה קדשה
בראשית 38 : 23 (ALEP)
כג ויאמר יהודה תקח לה פן נהיה לבוז הנה שלחתי הגדי הזה ואתה לא מצאתה
בראשית 38 : 24 (ALEP)
כד ויהי כמשלש חדשים ויגד ליהודה לאמר זנתה תמר כלתך וגם הנה הרה לזנונים ויאמר יהודה הוציאוה ותשרף
בראשית 38 : 25 (ALEP)
כה הוא מוצאת והיא שלחה אל חמיה לאמר לאיש אשר אלה לו אנכי הרה ותאמר הכר נא--למי החתמת והפתילים והמטה האלה
בראשית 38 : 26 (ALEP)
כו ויכר יהודה ויאמר צדקה ממני כי על כן לא נתתיה לשלה בני ולא יסף עוד לדעתה
בראשית 38 : 27 (ALEP)
כז ויהי בעת לדתה והנה תאומים בבטנה
בראשית 38 : 28 (ALEP)
כח ויהי בלדתה ויתן יד ותקח המילדת ותקשר על ידו שני לאמר זה יצא ראשנה
בראשית 38 : 29 (ALEP)
כט ויהי כמשיב ידו והנה יצא אחיו ותאמר מה פרצת עליך פרץ ויקרא שמו פרץ
בראשית 38 : 30 (ALEP)
ל ואחר יצא אחיו אשר על ידו השני ויקרא שמו זרח ס
❮
❯