בראשית 35 : 1 (ALEP)
א ויאמר אלהים אל יעקב קום עלה בית אל ושב שם ועשה שם מזבח--לאל הנראה אליך בברחך מפני עשו אחיך
בראשית 35 : 2 (ALEP)
ב ויאמר יעקב אל ביתו ואל כל אשר עמו הסרו את אלהי הנכר אשר בתככם והטהרו והחליפו שמלתיכם
בראשית 35 : 3 (ALEP)
ג ונקומה ונעלה בית אל ואעשה שם מזבח לאל הענה אתי ביום צרתי ויהי עמדי בדרך אשר הלכתי
בראשית 35 : 4 (ALEP)
ד ויתנו אל יעקב את כל אלהי הנכר אשר בידם ואת הנזמים אשר באזניהם ויטמן אתם יעקב תחת האלה אשר עם שכם
בראשית 35 : 5 (ALEP)
ה ויסעו ויהי חתת אלהים על הערים אשר סביבותיהם ולא רדפו אחרי בני יעקב
בראשית 35 : 6 (ALEP)
ו ויבא יעקב לוזה אשר בארץ כנען--הוא בית אל הוא וכל העם אשר עמו
בראשית 35 : 7 (ALEP)
ז ויבן שם מזבח ויקרא למקום אל בית אל כי שם נגלו אליו האלהים בברחו מפני אחיו
בראשית 35 : 8 (ALEP)
ח ותמת דברה מינקת רבקה ותקבר מתחת לבית אל תחת האלון ויקרא שמו אלון בכות פ
בראשית 35 : 9 (ALEP)
ט וירא אלהים אל יעקב עוד בבאו מפדן ארם ויברך אתו
בראשית 35 : 10 (ALEP)
י ויאמר לו אלהים שמך יעקב לא יקרא שמך עוד יעקב כי אם ישראל יהיה שמך ויקרא את שמו ישראל
בראשית 35 : 11 (ALEP)
יא ויאמר לו אלהים אני אל שדי פרה ורבה--גוי וקהל גוים יהיה ממך ומלכים מחלציך יצאו
בראשית 35 : 12 (ALEP)
יב ואת הארץ אשר נתתי לאברהם וליצחק--לך אתננה ולזרעך אחריך אתן את הארץ
בראשית 35 : 13 (ALEP)
יג ויעל מעליו אלהים במקום אשר דבר אתו
בראשית 35 : 14 (ALEP)
יד ויצב יעקב מצבה במקום אשר דבר אתו--מצבת אבן ויסך עליה נסך ויצק עליה שמן
בראשית 35 : 15 (ALEP)
טו ויקרא יעקב את שם המקום אשר דבר אתו שם אלהים--בית אל
בראשית 35 : 16 (ALEP)
טז ויסעו מבית אל ויהי עוד כברת הארץ לבוא אפרתה ותלד רחל ותקש בלדתה
בראשית 35 : 17 (ALEP)
יז ויהי בהקשתה בלדתה ותאמר לה המילדת אל תיראי כי גם זה לך בן
בראשית 35 : 18 (ALEP)
יח ויהי בצאת נפשה כי מתה ותקרא שמו בן אוני ואביו קרא לו בנימין
בראשית 35 : 19 (ALEP)
יט ותמת רחל ותקבר בדרך אפרתה הוא בית לחם
בראשית 35 : 20 (ALEP)
כ ויצב יעקב מצבה על קברתה--הוא מצבת קברת רחל עד היום
בראשית 35 : 21 (ALEP)
כא ויסע ישראל ויט אהלה מהלאה למגדל עדר
בראשית 35 : 22 (ALEP)
כב ויהי בשכן ישראל בארץ ההוא וילך ראובן וישכב את בלהה פילגש אביו וישמע ישראל פ ויהיו בני יעקב שנים עשר
בראשית 35 : 23 (ALEP)
כג בני לאה בכור יעקב ראובן ושמעון ולוי ויהודה ויששכר וזבלון
בראשית 35 : 24 (ALEP)
כד בני רחל יוסף ובנימן
בראשית 35 : 25 (ALEP)
כה ובני בלהה שפחת רחל דן ונפתלי
בראשית 35 : 26 (ALEP)
כו ובני זלפה שפחת לאה גד ואשר אלה בני יעקב אשר ילד לו בפדן ארם
בראשית 35 : 27 (ALEP)
כז ויבא יעקב אל יצחק אביו ממרא קרית הארבע--הוא חברון אשר גר שם אברהם ויצחק
בראשית 35 : 28 (ALEP)
כח ויהיו ימי יצחק--מאת שנה ושמנים שנה
בראשית 35 : 29 (ALEP)
כט ויגוע יצחק וימת ויאסף אל עמיו זקן ושבע ימים ויקברו אתו עשו ויעקב בניו פ
❮
❯