בראשית 34 : 1 (ALEP)
א ותצא דינה בת לאה אשר ילדה ליעקב לראות בבנות הארץ
בראשית 34 : 2 (ALEP)
ב וירא אתה שכם בן חמור החוי--נשיא הארץ ויקח אתה וישכב אתה ויענה
בראשית 34 : 3 (ALEP)
ג ותדבק נפשו בדינה בת יעקב ויאהב את הנער וידבר על לב הנער
בראשית 34 : 4 (ALEP)
ד ויאמר שכם אל חמור אביו לאמר קח לי את הילדה הזאת לאשה
בראשית 34 : 5 (ALEP)
ה ויעקב שמע כי טמא את דינה בתו ובניו היו את מקנהו בשדה והחרש יעקב עד באם
בראשית 34 : 6 (ALEP)
ו ויצא חמור אבי שכם אל יעקב לדבר אתו
בראשית 34 : 7 (ALEP)
ז ובני יעקב באו מן השדה כשמעם ויתעצבו האנשים ויחר להם מאד כי נבלה עשה בישראל לשכב את בת יעקב וכן לא יעשה
בראשית 34 : 8 (ALEP)
ח וידבר חמור אתם לאמר שכם בני חשקה נפשו בבתכם--תנו נא אתה לו לאשה
בראשית 34 : 9 (ALEP)
ט והתחתנו אתנו בנתיכם תתנו לנו ואת בנתינו תקחו לכם
בראשית 34 : 10 (ALEP)
י ואתנו תשבו והארץ תהיה לפניכם--שבו וסחרוה והאחזו בה
בראשית 34 : 11 (ALEP)
יא ויאמר שכם אל אביה ואל אחיה אמצא חן בעיניכם ואשר תאמרו אלי אתן
בראשית 34 : 12 (ALEP)
יב הרבו עלי מאד מהר ומתן ואתנה כאשר תאמרו אלי ותנו לי את הנער לאשה
בראשית 34 : 13 (ALEP)
יג ויענו בני יעקב את שכם ואת חמור אביו במרמה--וידברו אשר טמא את דינה אחתם
בראשית 34 : 14 (ALEP)
יד ויאמרו אליהם לא נוכל לעשות הדבר הזה--לתת את אחתנו לאיש אשר לו ערלה כי חרפה הוא לנו
בראשית 34 : 15 (ALEP)
טו אך בזאת נאות לכם אם תהיו כמנו להמל לכם כל זכר
בראשית 34 : 16 (ALEP)
טז ונתנו את בנתינו לכם ואת בנתיכם נקח לנו וישבנו אתכם והיינו לעם אחד
בראשית 34 : 17 (ALEP)
יז ואם לא תשמעו אלינו להמול--ולקחנו את בתנו והלכנו
בראשית 34 : 18 (ALEP)
יח וייטבו דבריהם בעיני חמור ובעיני שכם בן חמור
בראשית 34 : 19 (ALEP)
יט ולא אחר הנער לעשות הדבר כי חפץ בבת יעקב והוא נכבד מכל בית אביו
בראשית 34 : 20 (ALEP)
כ ויבא חמור ושכם בנו אל שער עירם וידברו אל אנשי עירם לאמר
בראשית 34 : 21 (ALEP)
כא האנשים האלה שלמים הם אתנו וישבו בארץ ויסחרו אתה והארץ הנה רחבת ידים לפניהם את בנתם נקח לנו לנשים ואת בנתינו נתן להם
בראשית 34 : 22 (ALEP)
כב אך בזאת יאתו לנו האנשים לשבת אתנו--להיות לעם אחד בהמול לנו כל זכר כאשר הם נמלים
בראשית 34 : 23 (ALEP)
כג מקנהם וקנינם וכל בהמתם הלוא לנו הם אך נאותה להם וישבו אתנו
בראשית 34 : 24 (ALEP)
כד וישמעו אל חמור ואל שכם בנו כל יצאי שער עירו וימלו כל זכר--כל יצאי שער עירו
בראשית 34 : 25 (ALEP)
כה ויהי ביום השלישי בהיותם כאבים ויקחו שני בני יעקב שמעון ולוי אחי דינה איש חרבו ויבאו על העיר בטח ויהרגו כל זכר
בראשית 34 : 26 (ALEP)
כו ואת חמור ואת שכם בנו הרגו לפי חרב ויקחו את דינה מבית שכם ויצאו
בראשית 34 : 27 (ALEP)
כז בני יעקב באו על החללים ויבזו העיר--אשר טמאו אחותם
בראשית 34 : 28 (ALEP)
כח את צאנם ואת בקרם ואת חמריהם ואת אשר בעיר ואת אשר בשדה לקחו
בראשית 34 : 29 (ALEP)
כט ואת כל חילם ואת כל טפם ואת נשיהם שבו ויבזו ואת כל אשר בבית
בראשית 34 : 30 (ALEP)
ל ויאמר יעקב אל שמעון ואל לוי עכרתם אתי להבאישני בישב הארץ בכנעני ובפרזי ואני מתי מספר ונאספו עלי והכוני ונשמדתי אני וביתי
בראשית 34 : 31 (ALEP)
לא ויאמרו הכזונה יעשה את אחותנו {פ}
❮
❯