בראשית 31 : 1 (ALEP)
א וישמע את דברי בני לבן לאמר לקח יעקב את כל אשר לאבינו ומאשר לאבינו--עשה את כל הכבד הזה
בראשית 31 : 2 (ALEP)
ב וירא יעקב את פני לבן והנה איננו עמו כתמול שלשום
בראשית 31 : 3 (ALEP)
ג ויאמר יהוה אל יעקב שוב אל ארץ אבותיך ולמולדתך ואהיה עמך
בראשית 31 : 4 (ALEP)
ד וישלח יעקב ויקרא לרחל וללאה השדה אל צאנו
בראשית 31 : 5 (ALEP)
ה ויאמר להן ראה אנכי את פני אביכן כי איננו אלי כתמל שלשם ואלהי אבי היה עמדי
בראשית 31 : 6 (ALEP)
ו ואתנה ידעתן כי בכל כחי עבדתי את אביכן
בראשית 31 : 7 (ALEP)
ז ואביכן התל בי והחלף את משכרתי עשרת מנים ולא נתנו אלהים להרע עמדי
בראשית 31 : 8 (ALEP)
ח אם כה יאמר נקדים יהיה שכרך--וילדו כל הצאן נקדים ואם כה יאמר עקדים יהיה שכרך--וילדו כל הצאן עקדים
בראשית 31 : 9 (ALEP)
ט ויצל אלהים את מקנה אביכם ויתן לי
בראשית 31 : 10 (ALEP)
י ויהי בעת יחם הצאן ואשא עיני וארא בחלום והנה העתדים העלים על הצאן עקדים נקדים וברדים
בראשית 31 : 11 (ALEP)
יא ויאמר אלי מלאך האלהים בחלום--יעקב ואמר הנני
בראשית 31 : 12 (ALEP)
יב ויאמר שא נא עיניך וראה כל העתדים העלים על הצאן עקדים נקדים וברדים כי ראיתי את כל אשר לבן עשה לך
בראשית 31 : 13 (ALEP)
יג אנכי האל בית אל אשר משחת שם מצבה אשר נדרת לי שם נדר עתה קום צא מן הארץ הזאת ושוב אל ארץ מולדתך
בראשית 31 : 14 (ALEP)
יד ותען רחל ולאה ותאמרנה לו העוד לנו חלק ונחלה בבית אבינו
בראשית 31 : 15 (ALEP)
טו הלוא נכריות נחשבנו לו כי מכרנו ויאכל גם אכול את כספנו
בראשית 31 : 16 (ALEP)
טז כי כל העשר אשר הציל אלהים מאבינו--לנו הוא ולבנינו ועתה כל אשר אמר אלהים אליך--עשה
בראשית 31 : 17 (ALEP)
יז ויקם יעקב וישא את בניו ואת נשיו על הגמלים
בראשית 31 : 18 (ALEP)
יח וינהג את כל מקנהו ואת כל רכשו אשר רכש--מקנה קנינו אשר רכש בפדן ארם לבוא אל יצחק אביו ארצה כנען
בראשית 31 : 19 (ALEP)
יט ולבן הלך לגזז את צאנו ותגנב רחל את התרפים אשר לאביה
בראשית 31 : 20 (ALEP)
כ ויגנב יעקב את לב לבן הארמי--על בלי הגיד לו כי ברח הוא
בראשית 31 : 21 (ALEP)
כא ויברח הוא וכל אשר לו ויקם ויעבר את הנהר וישם את פניו הר הגלעד
בראשית 31 : 22 (ALEP)
כב ויגד ללבן ביום השלישי כי ברח יעקב
בראשית 31 : 23 (ALEP)
כג ויקח את אחיו עמו וירדף אחריו דרך שבעת ימים וידבק אתו בהר הגלעד
בראשית 31 : 24 (ALEP)
כד ויבא אלהים אל לבן הארמי בחלם הלילה ויאמר לו השמר לך פן תדבר עם יעקב--מטוב עד רע
בראשית 31 : 25 (ALEP)
כה וישג לבן את יעקב ויעקב תקע את אהלו בהר ולבן תקע את אחיו בהר הגלעד
בראשית 31 : 26 (ALEP)
כו ויאמר לבן ליעקב מה עשית ותגנב את לבבי ותנהג את בנתי כשביות חרב
בראשית 31 : 27 (ALEP)
כז למה נחבאת לברח ותגנב אתי ולא הגדת לי ואשלחך בשמחה ובשרים בתף ובכנור
בראשית 31 : 28 (ALEP)
כח ולא נטשתני לנשק לבני ולבנתי עתה הסכלת עשו
בראשית 31 : 29 (ALEP)
כט יש לאל ידי לעשות עמכם רע ואלהי אביכם אמש אמר אלי לאמר השמר לך מדבר עם יעקב--מטוב עד רע
בראשית 31 : 30 (ALEP)
ל ועתה הלך הלכת כי נכסף נכספתה לבית אביך למה גנבת את אלהי
בראשית 31 : 31 (ALEP)
לא ויען יעקב ויאמר ללבן כי יראתי--כי אמרתי פן תגזל את בנותיך מעמי
בראשית 31 : 32 (ALEP)
לב עם אשר תמצא את אלהיך לא יחיה--נגד אחינו הכר לך מה עמדי וקח לך ולא ידע יעקב כי רחל גנבתם
בראשית 31 : 33 (ALEP)
לג ויבא לבן באהל יעקב ובאהל לאה ובאהל שתי האמהת--ולא מצא ויצא מאהל לאה ויבא באהל רחל
בראשית 31 : 34 (ALEP)
לד ורחל לקחה את התרפים ותשמם בכר הגמל--ותשב עליהם וימשש לבן את כל האהל ולא מצא
בראשית 31 : 35 (ALEP)
לה ותאמר אל אביה אל יחר בעיני אדני כי לוא אוכל לקום מפניך כי דרך נשים לי ויחפש ולא מצא את התרפים
בראשית 31 : 36 (ALEP)
לו ויחר ליעקב וירב בלבן ויען יעקב ויאמר ללבן מה פשעי מה חטאתי כי דלקת אחרי
בראשית 31 : 37 (ALEP)
לז כי מששת את כל כלי מה מצאת מכל כלי ביתך--שים כה נגד אחי ואחיך ויוכיחו בין שנינו
בראשית 31 : 38 (ALEP)
לח זה עשרים שנה אנכי עמך רחליך ועזיך לא שכלו ואילי צאנך לא אכלתי
בראשית 31 : 39 (ALEP)
לט טרפה לא הבאתי אליך--אנכי אחטנה מידי תבקשנה גנבתי יום וגנבתי לילה
בראשית 31 : 40 (ALEP)
מ הייתי ביום אכלני חרב וקרח בלילה ותדד שנתי מעיני
בראשית 31 : 41 (ALEP)
מא זה לי עשרים שנה בביתך עבדתיך ארבע עשרה שנה בשתי בנתיך ושש שנים בצאנך ותחלף את משכרתי עשרת מנים
בראשית 31 : 42 (ALEP)
מב לולי אלהי אבי אלהי אברהם ופחד יצחק היה לי--כי עתה ריקם שלחתני את עניי ואת יגיע כפי ראה אלהים--ויוכח אמש
בראשית 31 : 43 (ALEP)
מג ויען לבן ויאמר אל יעקב הבנות בנתי והבנים בני והצאן צאני וכל אשר אתה ראה לי הוא ולבנתי מה אעשה לאלה היום או לבניהן אשר ילדו
בראשית 31 : 44 (ALEP)
מד ועתה לכה נכרתה ברית--אני ואתה והיה לעד ביני ובינך
בראשית 31 : 45 (ALEP)
מה ויקח יעקב אבן וירימה מצבה
בראשית 31 : 46 (ALEP)
מו ויאמר יעקב לאחיו לקטו אבנים ויקחו אבנים ויעשו גל ויאכלו שם על הגל
בראשית 31 : 47 (ALEP)
מז ויקרא לו לבן יגר שהדותא ויעקב קרא לו גלעד
בראשית 31 : 48 (ALEP)
מח ויאמר לבן הגל הזה עד ביני ובינך היום על כן קרא שמו גלעד
בראשית 31 : 49 (ALEP)
מט והמצפה אשר אמר יצף יהוה ביני ובינך כי נסתר איש מרעהו
בראשית 31 : 50 (ALEP)
נ אם תענה את בנתי ואם תקח נשים על בנתי--אין איש עמנו ראה אלהים עד ביני ובינך
בראשית 31 : 51 (ALEP)
נא ויאמר לבן ליעקב הנה הגל הזה והנה המצבה אשר יריתי ביני ובינך
בראשית 31 : 52 (ALEP)
נב עד הגל הזה ועדה המצבה אם אני לא אעבר אליך את הגל הזה ואם אתה לא תעבר אלי את הגל הזה ואת המצבה הזאת לרעה
בראשית 31 : 53 (ALEP)
נג אלהי אברהם ואלהי נחור ישפטו בינינו--אלהי אביהם וישבע יעקב בפחד אביו יצחק
בראשית 31 : 54 (ALEP)
נד ויזבח יעקב זבח בהר ויקרא לאחיו לאכל לחם ויאכלו לחם וילינו בהר
❮
❯