בראשית 30 : 1 (ALEP)
א ותרא רחל כי לא ילדה ליעקב ותקנא רחל באחתה ותאמר אל יעקב הבה לי בנים ואם אין מתה אנכי
בראשית 30 : 2 (ALEP)
ב ויחר אף יעקב ברחל ויאמר התחת אלהים אנכי אשר מנע ממך פרי בטן
בראשית 30 : 3 (ALEP)
ג ותאמר הנה אמתי בלהה בא אליה ותלד על ברכי ואבנה גם אנכי ממנה
בראשית 30 : 4 (ALEP)
ד ותתן לו את בלהה שפחתה לאשה ויבא אליה יעקב
בראשית 30 : 5 (ALEP)
ה ותהר בלהה ותלד ליעקב בן
בראשית 30 : 6 (ALEP)
ו ותאמר רחל דנני אלהים וגם שמע בקלי ויתן לי בן על כן קראה שמו דן
בראשית 30 : 7 (ALEP)
ז ותהר עוד--ותלד בלהה שפחת רחל בן שני ליעקב
בראשית 30 : 8 (ALEP)
ח ותאמר רחל נפתולי אלהים נפתלתי עם אחתי--גם יכלתי ותקרא שמו נפתלי
בראשית 30 : 9 (ALEP)
ט ותרא לאה כי עמדה מלדת ותקח את זלפה שפחתה ותתן אתה ליעקב לאשה
בראשית 30 : 10 (ALEP)
י ותלד זלפה שפחת לאה--ליעקב בן
בראשית 30 : 11 (ALEP)
יא ותאמר לאה בגד (בא גד) ותקרא את שמו גד
בראשית 30 : 12 (ALEP)
יב ותלד זלפה שפחת לאה בן שני ליעקב
בראשית 30 : 13 (ALEP)
יג ותאמר לאה--באשרי כי אשרוני בנות ותקרא את שמו אשר
בראשית 30 : 14 (ALEP)
יד וילך ראובן בימי קציר חטים וימצא דודאים בשדה ויבא אתם אל לאה אמו ותאמר רחל אל לאה תני נא לי מדודאי בנך
בראשית 30 : 15 (ALEP)
טו ותאמר לה המעט קחתך את אישי ולקחת גם את דודאי בני ותאמר רחל לכן ישכב עמך הלילה תחת דודאי בנך
בראשית 30 : 16 (ALEP)
טז ויבא יעקב מן השדה בערב ותצא לאה לקראתו ותאמר אלי תבוא כי שכר שכרתיך בדודאי בני וישכב עמה בלילה הוא
בראשית 30 : 17 (ALEP)
יז וישמע אלהים אל לאה ותהר ותלד ליעקב בן חמישי
בראשית 30 : 18 (ALEP)
יח ותאמר לאה נתן אלהים שכרי אשר נתתי שפחתי לאישי ותקרא שמו יששכר
בראשית 30 : 19 (ALEP)
יט ותהר עוד לאה ותלד בן ששי ליעקב
בראשית 30 : 20 (ALEP)
כ ותאמר לאה זבדני אלהים אתי זבד טוב--הפעם יזבלני אישי כי ילדתי לו ששה בנים ותקרא את שמו זבלון
בראשית 30 : 21 (ALEP)
כא ואחר ילדה בת ותקרא את שמה דינה
בראשית 30 : 22 (ALEP)
כב ויזכר אלהים את רחל וישמע אליה אלהים ויפתח את רחמה
בראשית 30 : 23 (ALEP)
כג ותהר ותלד בן ותאמר אסף אלהים את חרפתי
בראשית 30 : 24 (ALEP)
כד ותקרא את שמו יוסף לאמר יסף יהוה לי בן אחר
בראשית 30 : 25 (ALEP)
כה ויהי כאשר ילדה רחל את יוסף ויאמר יעקב אל לבן שלחני ואלכה אל מקומי ולארצי
בראשית 30 : 26 (ALEP)
כו תנה את נשי ואת ילדי אשר עבדתי אתך בהן--ואלכה כי אתה ידעת את עבדתי אשר עבדתיך
בראשית 30 : 27 (ALEP)
כז ויאמר אליו לבן אם נא מצאתי חן בעיניך נחשתי ויברכני יהוה בגללך
בראשית 30 : 28 (ALEP)
כח ויאמר נקבה שכרך עלי ואתנה
בראשית 30 : 29 (ALEP)
כט ויאמר אליו--אתה ידעת את אשר עבדתיך ואת אשר היה מקנך אתי
בראשית 30 : 30 (ALEP)
ל כי מעט אשר היה לך לפני ויפרץ לרב ויברך יהוה אתך לרגלי ועתה מתי אעשה גם אנכי--לביתי
בראשית 30 : 31 (ALEP)
לא ויאמר מה אתן לך ויאמר יעקב לא תתן לי מאומה--אם תעשה לי הדבר הזה אשובה ארעה צאנך אשמר
בראשית 30 : 32 (ALEP)
לב אעבר בכל צאנך היום הסר משם כל שה נקד וטלוא וכל שה חום בכשבים וטלוא ונקד בעזים והיה שכרי
בראשית 30 : 33 (ALEP)
לג וענתה בי צדקתי ביום מחר כי תבוא על שכרי לפניך כל אשר איננו נקד וטלוא בעזים וחום בכשבים--גנוב הוא אתי
בראשית 30 : 34 (ALEP)
לד ויאמר לבן הן לו יהי כדברך
בראשית 30 : 35 (ALEP)
לה ויסר ביום ההוא את התישים העקדים והטלאים ואת כל העזים הנקדות והטלאת כל אשר לבן בו וכל חום בכשבים ויתן ביד בניו
בראשית 30 : 36 (ALEP)
לו וישם דרך שלשת ימים בינו ובין יעקב ויעקב רעה את צאן לבן--הנותרת
בראשית 30 : 37 (ALEP)
לז ויקח לו יעקב מקל לבנה לח--ולוז וערמון ויפצל בהן פצלות לבנות--מחשף הלבן אשר על המקלות
בראשית 30 : 38 (ALEP)
לח ויצג את המקלות אשר פצל ברהטים בשקתות המים--אשר תבאן הצאן לשתות לנכח הצאן ויחמנה בבאן לשתות
בראשית 30 : 39 (ALEP)
לט ויחמו הצאן אל המקלות ותלדן הצאן עקדים נקדים וטלאים
בראשית 30 : 40 (ALEP)
מ והכשבים הפריד יעקב ויתן פני הצאן אל עקד וכל חום בצאן לבן וישת לו עדרים לבדו ולא שתם על צאן לבן
בראשית 30 : 41 (ALEP)
מא והיה בכל יחם הצאן המקשרות ושם יעקב את המקלות לעיני הצאן ברהטים--ליחמנה במקלות
בראשית 30 : 42 (ALEP)
מב ובהעטיף הצאן לא ישים והיה העטפים ללבן והקשרים ליעקב
בראשית 30 : 43 (ALEP)
מג ויפרץ האיש מאד מאד ויהי לו צאן רבות ושפחות ועבדים וגמלים וחמרים
❮
❯