בראשית 3 : 1 (ALEP)
א והנחש היה ערום מכל חית השדה אשר עשה יהוה אלהים ויאמר אל האשה אף כי אמר אלהים לא תאכלו מכל עץ הגן
בראשית 3 : 2 (ALEP)
ב ותאמר האשה אל הנחש מפרי עץ הגן נאכל
בראשית 3 : 3 (ALEP)
ג ומפרי העץ אשר בתוך הגן--אמר אלהים לא תאכלו ממנו ולא תגעו בו פן תמתון
בראשית 3 : 4 (ALEP)
ד ויאמר הנחש אל האשה לא מות תמתון
בראשית 3 : 5 (ALEP)
ה כי ידע אלהים כי ביום אכלכם ממנו ונפקחו עיניכם והייתם כאלהים ידעי טוב ורע
בראשית 3 : 6 (ALEP)
ו ותרא האשה כי טוב העץ למאכל וכי תאוה הוא לעינים ונחמד העץ להשכיל ותקח מפריו ותאכל ותתן גם לאישה עמה ויאכל
בראשית 3 : 7 (ALEP)
ז ותפקחנה עיני שניהם וידעו כי עירמם הם ויתפרו עלה תאנה ויעשו להם חגרת
בראשית 3 : 8 (ALEP)
ח וישמעו את קול יהוה אלהים מתהלך בגן--לרוח היום ויתחבא האדם ואשתו מפני יהוה אלהים בתוך עץ הגן
בראשית 3 : 9 (ALEP)
ט ויקרא יהוה אלהים אל האדם ויאמר לו איכה
בראשית 3 : 10 (ALEP)
י ויאמר את קלך שמעתי בגן ואירא כי עירם אנכי ואחבא
בראשית 3 : 11 (ALEP)
יא ויאמר--מי הגיד לך כי עירם אתה המן העץ אשר צויתיך לבלתי אכל ממנו--אכלת
בראשית 3 : 12 (ALEP)
יב ויאמר האדם האשה אשר נתתה עמדי הוא נתנה לי מן העץ ואכל
בראשית 3 : 13 (ALEP)
יג ויאמר יהוה אלהים לאשה מה זאת עשית ותאמר האשה הנחש השיאני ואכל
בראשית 3 : 14 (ALEP)
יד ויאמר יהוה אלהים אל הנחש כי עשית זאת ארור אתה מכל הבהמה ומכל חית השדה על גחנך תלך ועפר תאכל כל ימי חייך
בראשית 3 : 15 (ALEP)
טו ואיבה אשית בינך ובין האשה ובין זרעך ובין זרעה הוא ישופך ראש ואתה תשופנו עקב {ס}
בראשית 3 : 16 (ALEP)
טז אל האשה אמר הרבה ארבה עצבונך והרנך--בעצב תלדי בנים ואל אישך תשוקתך והוא ימשל בך {ס}
בראשית 3 : 17 (ALEP)
יז ולאדם אמר כי שמעת לקול אשתך ותאכל מן העץ אשר צויתיך לאמר לא תאכל ממנו--ארורה האדמה בעבורך בעצבון תאכלנה כל ימי חייך
בראשית 3 : 18 (ALEP)
יח וקוץ ודרדר תצמיח לך ואכלת את עשב השדה
בראשית 3 : 19 (ALEP)
יט בזעת אפיך תאכל לחם עד שובך אל האדמה כי ממנה לקחת כי עפר אתה ואל עפר תשוב
בראשית 3 : 20 (ALEP)
כ ויקרא האדם שם אשתו חוה כי הוא היתה אם כל חי
בראשית 3 : 21 (ALEP)
כא ויעש יהוה אלהים לאדם ולאשתו כתנות עור--וילבשם {פ}
בראשית 3 : 22 (ALEP)
כב ויאמר יהוה אלהים הן האדם היה כאחד ממנו לדעת טוב ורע ועתה פן ישלח ידו ולקח גם מעץ החיים ואכל וחי לעלם
בראשית 3 : 23 (ALEP)
כג וישלחהו יהוה אלהים מגן עדן--לעבד את האדמה אשר לקח משם
בראשית 3 : 24 (ALEP)
כד ויגרש את האדם וישכן מקדם לגן עדן את הכרבים ואת להט החרב המתהפכת לשמר את דרך עץ החיים {ס}
❮
❯