בראשית 29 : 1 (ALEP)
א וישא יעקב רגליו וילך ארצה בני קדם
בראשית 29 : 2 (ALEP)
ב וירא והנה באר בשדה והנה שם שלשה עדרי צאן רבצים עליה--כי מן הבאר ההוא ישקו העדרים והאבן גדלה על פי הבאר
בראשית 29 : 3 (ALEP)
ג ונאספו שמה כל העדרים וגללו את האבן מעל פי הבאר והשקו את הצאן והשיבו את האבן על פי הבאר למקמה
בראשית 29 : 4 (ALEP)
ד ויאמר להם יעקב אחי מאין אתם ויאמרו מחרן אנחנו
בראשית 29 : 5 (ALEP)
ה ויאמר להם הידעתם את לבן בן נחור ויאמרו ידענו
בראשית 29 : 6 (ALEP)
ו ויאמר להם השלום לו ויאמרו שלום--והנה רחל בתו באה עם הצאן
בראשית 29 : 7 (ALEP)
ז ויאמר הן עוד היום גדול--לא עת האסף המקנה השקו הצאן ולכו רעו
בראשית 29 : 8 (ALEP)
ח ויאמרו לא נוכל עד אשר יאספו כל העדרים וגללו את האבן מעל פי הבאר והשקינו הצאן
בראשית 29 : 9 (ALEP)
ט עודנו מדבר עמם ורחל באה עם הצאן אשר לאביה--כי רעה הוא
בראשית 29 : 10 (ALEP)
י ויהי כאשר ראה יעקב את רחל בת לבן אחי אמו ואת צאן לבן אחי אמו ויגש יעקב ויגל את האבן מעל פי הבאר וישק את צאן לבן אחי אמו
בראשית 29 : 11 (ALEP)
יא וישק יעקב לרחל וישא את קלו ויבך
בראשית 29 : 12 (ALEP)
יב ויגד יעקב לרחל כי אחי אביה הוא וכי בן רבקה הוא ותרץ ותגד לאביה
בראשית 29 : 13 (ALEP)
יג ויהי כשמע לבן את שמע יעקב בן אחתו וירץ לקראתו ויחבק לו וינשק לו ויביאהו אל ביתו ויספר ללבן את כל הדברים האלה
בראשית 29 : 14 (ALEP)
יד ויאמר לו לבן אך עצמי ובשרי אתה וישב עמו חדש ימים
בראשית 29 : 15 (ALEP)
טו ויאמר לבן ליעקב הכי אחי אתה ועבדתני חנם הגידה לי מה משכרתך
בראשית 29 : 16 (ALEP)
טז וללבן שתי בנות שם הגדלה לאה ושם הקטנה רחל
בראשית 29 : 17 (ALEP)
יז ועיני לאה רכות ורחל היתה יפת תאר ויפת מראה
בראשית 29 : 18 (ALEP)
יח ויאהב יעקב את רחל ויאמר אעבדך שבע שנים ברחל בתך הקטנה
בראשית 29 : 19 (ALEP)
יט ויאמר לבן טוב תתי אתה לך מתתי אתה לאיש אחר שבה עמדי
בראשית 29 : 20 (ALEP)
כ ויעבד יעקב ברחל שבע שנים ויהיו בעיניו כימים אחדים באהבתו אתה
בראשית 29 : 21 (ALEP)
כא ויאמר יעקב אל לבן הבה את אשתי כי מלאו ימי ואבואה אליה
בראשית 29 : 22 (ALEP)
כב ויאסף לבן את כל אנשי המקום ויעש משתה
בראשית 29 : 23 (ALEP)
כג ויהי בערב--ויקח את לאה בתו ויבא אתה אליו ויבא אליה
בראשית 29 : 24 (ALEP)
כד ויתן לבן לה את זלפה שפחתו--ללאה בתו שפחה
בראשית 29 : 25 (ALEP)
כה ויהי בבקר והנה הוא לאה ויאמר אל לבן מה זאת עשית לי--הלא ברחל עבדתי עמך ולמה רמיתני
בראשית 29 : 26 (ALEP)
כו ויאמר לבן לא יעשה כן במקומנו--לתת הצעירה לפני הבכירה
בראשית 29 : 27 (ALEP)
כז מלא שבע זאת ונתנה לך גם את זאת בעבדה אשר תעבד עמדי עוד שבע שנים אחרות
בראשית 29 : 28 (ALEP)
כח ויעש יעקב כן וימלא שבע זאת ויתן לו את רחל בתו לו לאשה
בראשית 29 : 29 (ALEP)
כט ויתן לבן לרחל בתו את בלהה שפחתו--לה לשפחה
בראשית 29 : 30 (ALEP)
ל ויבא גם אל רחל ויאהב גם את רחל מלאה ויעבד עמו עוד שבע שנים אחרות
בראשית 29 : 31 (ALEP)
לא וירא יהוה כי שנואה לאה ויפתח את רחמה ורחל עקרה
בראשית 29 : 32 (ALEP)
לב ותהר לאה ותלד בן ותקרא שמו ראובן כי אמרה כי ראה יהוה בעניי--כי עתה יאהבני אישי
בראשית 29 : 33 (ALEP)
לג ותהר עוד ותלד בן ותאמר כי שמע יהוה כי שנואה אנכי ויתן לי גם את זה ותקרא שמו שמעון
בראשית 29 : 34 (ALEP)
לד ותהר עוד ותלד בן ותאמר עתה הפעם ילוה אישי אלי כי ילדתי לו שלשה בנים על כן קרא שמו לוי
בראשית 29 : 35 (ALEP)
לה ותהר עוד ותלד בן ותאמר הפעם אודה את יהוה--על כן קראה שמו יהודה ותעמד מלדת
❮
❯