בראשית 28 : 1 (ALEP)
א ויקרא יצחק אל יעקב ויברך אתו ויצוהו ויאמר לו לא תקח אשה מבנות כנען
בראשית 28 : 2 (ALEP)
ב קום לך פדנה ארם ביתה בתואל אבי אמך וקח לך משם אשה מבנות לבן אחי אמך
בראשית 28 : 3 (ALEP)
ג ואל שדי יברך אתך ויפרך וירבך והיית לקהל עמים
בראשית 28 : 4 (ALEP)
ד ויתן לך את ברכת אברהם לך ולזרעך אתך--לרשתך את ארץ מגריך אשר נתן אלהים לאברהם
בראשית 28 : 5 (ALEP)
ה וישלח יצחק את יעקב וילך פדנה ארם--אל לבן בן בתואל הארמי אחי רבקה אם יעקב ועשו
בראשית 28 : 6 (ALEP)
ו וירא עשו כי ברך יצחק את יעקב ושלח אתו פדנה ארם לקחת לו משם אשה בברכו אתו--ויצו עליו לאמר לא תקח אשה מבנות כנען
בראשית 28 : 7 (ALEP)
ז וישמע יעקב אל אביו ואל אמו וילך פדנה ארם
בראשית 28 : 8 (ALEP)
ח וירא עשו כי רעות בנות כנען בעיני יצחק אביו
בראשית 28 : 9 (ALEP)
ט וילך עשו אל ישמעאל ויקח את מחלת בת ישמעאל בן אברהם אחות נביות על נשיו--לו לאשה ס
בראשית 28 : 10 (ALEP)
י ויצא יעקב מבאר שבע וילך חרנה
בראשית 28 : 11 (ALEP)
יא ויפגע במקום וילן שם כי בא השמש ויקח מאבני המקום וישם מראשתיו וישכב במקום ההוא
בראשית 28 : 12 (ALEP)
יב ויחלם והנה סלם מצב ארצה וראשו מגיע השמימה והנה מלאכי אלהים עלים וירדים בו
בראשית 28 : 13 (ALEP)
יג והנה יהוה נצב עליו ויאמר אני יהוה אלהי אברהם אביך ואלהי יצחק הארץ אשר אתה שכב עליה--לך אתננה ולזרעך
בראשית 28 : 14 (ALEP)
יד והיה זרעך כעפר הארץ ופרצת ימה וקדמה וצפנה ונגבה ונברכו בך כל משפחת האדמה ובזרעך
בראשית 28 : 15 (ALEP)
טו והנה אנכי עמך ושמרתיך בכל אשר תלך והשבתיך אל האדמה הזאת כי לא אעזבך עד אשר אם עשיתי את אשר דברתי לך
בראשית 28 : 16 (ALEP)
טז וייקץ יעקב משנתו ויאמר אכן יש יהוה במקום הזה ואנכי לא ידעתי
בראשית 28 : 17 (ALEP)
יז ויירא ויאמר מה נורא המקום הזה אין זה כי אם בית אלהים וזה שער השמים
בראשית 28 : 18 (ALEP)
יח וישכם יעקב בבקר ויקח את האבן אשר שם מראשתיו וישם אתה מצבה ויצק שמן על ראשה
בראשית 28 : 19 (ALEP)
יט ויקרא את שם המקום ההוא בית אל ואולם לוז שם העיר לראשנה
בראשית 28 : 20 (ALEP)
כ וידר יעקב נדר לאמר אם יהיה אלהים עמדי ושמרני בדרך הזה אשר אנכי הולך ונתן לי לחם לאכל ובגד ללבש
בראשית 28 : 21 (ALEP)
כא ושבתי בשלום אל בית אבי והיה יהוה לי לאלהים
בראשית 28 : 22 (ALEP)
כב והאבן הזאת אשר שמתי מצבה--יהיה בית אלהים וכל אשר תתן לי עשר אעשרנו לך
❮
❯