בראשית 27 : 1 (ALEP)
א ויהי כי זקן יצחק ותכהין עיניו מראת ויקרא את עשו בנו הגדל ויאמר אליו בני ויאמר אליו הנני
בראשית 27 : 2 (ALEP)
ב ויאמר הנה נא זקנתי לא ידעתי יום מותי
בראשית 27 : 3 (ALEP)
ג ועתה שא נא כליך תליך וקשתך וצא השדה וצודה לי צידה (ציד)
בראשית 27 : 4 (ALEP)
ד ועשה לי מטעמים כאשר אהבתי והביאה לי--ואכלה בעבור תברכך נפשי בטרם אמות
בראשית 27 : 5 (ALEP)
ה ורבקה שמעת--בדבר יצחק אל עשו בנו וילך עשו השדה לצוד ציד להביא
בראשית 27 : 6 (ALEP)
ו ורבקה אמרה אל יעקב בנה לאמר הנה שמעתי את אביך מדבר אל עשו אחיך לאמר
בראשית 27 : 7 (ALEP)
ז הביאה לי ציד ועשה לי מטעמים ואכלה ואברככה לפני יהוה לפני מותי
בראשית 27 : 8 (ALEP)
ח ועתה בני שמע בקלי--לאשר אני מצוה אתך
בראשית 27 : 9 (ALEP)
ט לך נא אל הצאן וקח לי משם שני גדיי עזים טבים ואעשה אתם מטעמים לאביך כאשר אהב
בראשית 27 : 10 (ALEP)
י והבאת לאביך ואכל בעבר אשר יברכך לפני מותו
בראשית 27 : 11 (ALEP)
יא ויאמר יעקב אל רבקה אמו הן עשו אחי איש שער ואנכי איש חלק
בראשית 27 : 12 (ALEP)
יב אולי ימשני אבי והייתי בעיניו כמתעתע והבאתי עלי קללה ולא ברכה
בראשית 27 : 13 (ALEP)
יג ותאמר לו אמו עלי קללתך בני אך שמע בקלי ולך קח לי
בראשית 27 : 14 (ALEP)
יד וילך ויקח ויבא לאמו ותעש אמו מטעמים כאשר אהב אביו
בראשית 27 : 15 (ALEP)
טו ותקח רבקה את בגדי עשו בנה הגדל החמדת אשר אתה בבית ותלבש את יעקב בנה הקטן
בראשית 27 : 16 (ALEP)
טז ואת ערת גדיי העזים הלבישה על ידיו--ועל חלקת צואריו
בראשית 27 : 17 (ALEP)
יז ותתן את המטעמים ואת הלחם אשר עשתה ביד יעקב בנה
בראשית 27 : 18 (ALEP)
יח ויבא אל אביו ויאמר אבי ויאמר הנני מי אתה בני
בראשית 27 : 19 (ALEP)
יט ויאמר יעקב אל אביו אנכי עשו בכרך--עשיתי כאשר דברת אלי קום נא שבה ואכלה מצידי--בעבור תברכני נפשך
בראשית 27 : 20 (ALEP)
כ ויאמר יצחק אל בנו מה זה מהרת למצא בני ויאמר כי הקרה יהוה אלהיך לפני
בראשית 27 : 21 (ALEP)
כא ויאמר יצחק אל יעקב גשה נא ואמשך בני האתה זה בני עשו אם לא
בראשית 27 : 22 (ALEP)
כב ויגש יעקב אל יצחק אביו וימשהו ויאמר הקל קול יעקב והידים ידי עשו
בראשית 27 : 23 (ALEP)
כג ולא הכירו--כי היו ידיו כידי עשו אחיו שערת ויברכהו
בראשית 27 : 24 (ALEP)
כד ויאמר אתה זה בני עשו ויאמר אני
בראשית 27 : 25 (ALEP)
כה ויאמר הגשה לי ואכלה מציד בני--למען תברכך נפשי ויגש לו ויאכל ויבא לו יין וישת
בראשית 27 : 26 (ALEP)
כו ויאמר אליו יצחק אביו גשה נא ושקה לי בני
בראשית 27 : 27 (ALEP)
כז ויגש וישק לו וירח את ריח בגדיו ויברכהו ויאמר ראה ריח בני כריח שדה אשר ברכו יהוה
בראשית 27 : 28 (ALEP)
כח ויתן לך האלהים מטל השמים ומשמני הארץ--ורב דגן ותירש
בראשית 27 : 29 (ALEP)
כט יעבדוך עמים וישתחו (וישתחוו) לך לאמים--הוה גביר לאחיך וישתחוו לך בני אמך ארריך ארור ומברכיך ברוך
בראשית 27 : 30 (ALEP)
ל ויהי כאשר כלה יצחק לברך את יעקב ויהי אך יצא יצא יעקב מאת פני יצחק אביו ועשו אחיו בא מצידו
בראשית 27 : 31 (ALEP)
לא ויעש גם הוא מטעמים ויבא לאביו ויאמר לאביו יקם אבי ויאכל מציד בנו--בעבר תברכני נפשך
בראשית 27 : 32 (ALEP)
לב ויאמר לו יצחק אביו מי אתה ויאמר אני בנך בכרך עשו
בראשית 27 : 33 (ALEP)
לג ויחרד יצחק חרדה גדלה עד מאד ויאמר מי אפוא הוא הצד ציד ויבא לי ואכל מכל בטרם תבוא ואברכהו גם ברוך יהיה
בראשית 27 : 34 (ALEP)
לד כשמע עשו את דברי אביו ויצעק צעקה גדלה ומרה עד מאד ויאמר לאביו ברכני גם אני אבי
בראשית 27 : 35 (ALEP)
לה ויאמר בא אחיך במרמה ויקח ברכתך
בראשית 27 : 36 (ALEP)
לו ויאמר הכי קרא שמו יעקב ויעקבני זה פעמים--את בכרתי לקח והנה עתה לקח ברכתי ויאמר הלא אצלת לי ברכה
בראשית 27 : 37 (ALEP)
לז ויען יצחק ויאמר לעשו הן גביר שמתיו לך ואת כל אחיו נתתי לו לעבדים ודגן ותירש סמכתיו ולכה אפוא מה אעשה בני
בראשית 27 : 38 (ALEP)
לח ויאמר עשו אל אביו הברכה אחת הוא לך אבי--ברכני גם אני אבי וישא עשו קלו ויבך
בראשית 27 : 39 (ALEP)
לט ויען יצחק אביו ויאמר אליו הנה משמני הארץ יהיה מושבך ומטל השמים מעל
בראשית 27 : 40 (ALEP)
מ ועל חרבך תחיה ואת אחיך תעבד והיה כאשר תריד ופרקת עלו מעל צוארך
בראשית 27 : 41 (ALEP)
מא וישטם עשו את יעקב על הברכה אשר ברכו אביו ויאמר עשו בלבו יקרבו ימי אבל אבי ואהרגה את יעקב אחי
בראשית 27 : 42 (ALEP)
מב ויגד לרבקה את דברי עשו בנה הגדל ותשלח ותקרא ליעקב בנה הקטן ותאמר אליו הנה עשו אחיך מתנחם לך להרגך
בראשית 27 : 43 (ALEP)
מג ועתה בני שמע בקלי וקום ברח לך אל לבן אחי חרנה
בראשית 27 : 44 (ALEP)
מד וישבת עמו ימים אחדים--עד אשר תשוב חמת אחיך
בראשית 27 : 45 (ALEP)
מה עד שוב אף אחיך ממך ושכח את אשר עשית לו ושלחתי ולקחתיך משם למה אשכל גם שניכם יום אחד
בראשית 27 : 46 (ALEP)
מו ותאמר רבקה אל יצחק ק צתי בחיי מפני בנות חת אם לקח יעקב אשה מבנות חת כאלה מבנות הארץ--למה לי חיים
❮
❯