בראשית 26 : 1 (ALEP)
א ויהי רעב בארץ מלבד הרעב הראשון אשר היה בימי אברהם וילך יצחק אל אבימלך מלך פלשתים גררה
בראשית 26 : 2 (ALEP)
ב וירא אליו יהוה ויאמר אל תרד מצרימה שכן בארץ אשר אמר אליך
בראשית 26 : 3 (ALEP)
ג גור בארץ הזאת ואהיה עמך ואברכך כי לך ולזרעך אתן את כל הארצת האל והקמתי את השבעה אשר נשבעתי לאברהם אביך
בראשית 26 : 4 (ALEP)
ד והרביתי את זרעך ככוכבי השמים ונתתי לזרעך את כל הארצת האל והתברכו בזרעך כל גויי הארץ
בראשית 26 : 5 (ALEP)
ה עקב אשר שמע אברהם בקלי וישמר משמרתי מצותי חקותי ותורתי
בראשית 26 : 6 (ALEP)
ו וישב יצחק בגרר
בראשית 26 : 7 (ALEP)
ז וישאלו אנשי המקום לאשתו ויאמר אחתי הוא כי ירא לאמר אשתי פן יהרגני אנשי המקום על רבקה כי טובת מראה הוא
בראשית 26 : 8 (ALEP)
ח ויהי כי ארכו לו שם הימים וישקף אבימלך מלך פלשתים בעד החלון וירא והנה יצחק מצחק את רבקה אשתו
בראשית 26 : 9 (ALEP)
ט ויקרא אבימלך ליצחק ויאמר אך הנה אשתך הוא ואיך אמרת אחתי הוא ויאמר אליו יצחק כי אמרתי פן אמות עליה
בראשית 26 : 10 (ALEP)
י ויאמר אבימלך מה זאת עשית לנו כמעט שכב אחד העם את אשתך והבאת עלינו אשם
בראשית 26 : 11 (ALEP)
יא ויצו אבימלך את כל העם לאמר הנגע באיש הזה ובאשתו--מות יומת
בראשית 26 : 12 (ALEP)
יב ויזרע יצחק בארץ ההוא וימצא בשנה ההוא מאה שערים ויברכהו יהוה
בראשית 26 : 13 (ALEP)
יג ויגדל האיש וילך הלוך וגדל עד כי גדל מאד
בראשית 26 : 14 (ALEP)
יד ויהי לו מקנה צאן ומקנה בקר ועבדה רבה ויקנאו אתו פלשתים
בראשית 26 : 15 (ALEP)
טו וכל הבארת אשר חפרו עבדי אביו בימי אברהם אביו--סתמום פלשתים וימלאום עפר
בראשית 26 : 16 (ALEP)
טז ויאמר אבימלך אל יצחק לך מעמנו כי עצמת ממנו מאד
בראשית 26 : 17 (ALEP)
יז וילך משם יצחק ויחן בנחל גרר וישב שם
בראשית 26 : 18 (ALEP)
יח וישב יצחק ויחפר את בארת המים אשר חפרו בימי אברהם אביו ויסתמום פלשתים אחרי מות אברהם ויקרא להן שמות כשמת אשר קרא להן אביו
בראשית 26 : 19 (ALEP)
יט ויחפרו עבדי יצחק בנחל וימצאו שם--באר מים חיים
בראשית 26 : 20 (ALEP)
כ ויריבו רעי גרר עם רעי יצחק לאמר--לנו המים ויקרא שם הבאר עשק כי התעשקו עמו
בראשית 26 : 21 (ALEP)
כא ויחפרו באר אחרת ויריבו גם עליה ויקרא שמה שטנה
בראשית 26 : 22 (ALEP)
כב ויעתק משם ויחפר באר אחרת ולא רבו עליה ויקרא שמה רחבות ויאמר כי עתה הרחיב יהוה לנו ופרינו בארץ
בראשית 26 : 23 (ALEP)
כג ויעל משם באר שבע
בראשית 26 : 24 (ALEP)
כד וירא אליו יהוה בלילה ההוא ויאמר אנכי אלהי אברהם אביך אל תירא כי אתך אנכי וברכתיך והרביתי את זרעך בעבור אברהם עבדי
בראשית 26 : 25 (ALEP)
כה ויבן שם מזבח ויקרא בשם יהוה ויט שם אהלו ויכרו שם עבדי יצחק באר
בראשית 26 : 26 (ALEP)
כו ואבימלך הלך אליו מגרר ואחזת מרעהו ופיכל שר צבאו
בראשית 26 : 27 (ALEP)
כז ויאמר אלהם יצחק מדוע באתם אלי ואתם שנאתם אתי ותשלחוני מאתכם
בראשית 26 : 28 (ALEP)
כח ויאמרו ראו ראינו כי היה יהוה עמך ונאמר תהי נא אלה בינותינו בינינו ובינך ונכרתה ברית עמך
בראשית 26 : 29 (ALEP)
כט אם תעשה עמנו רעה כאשר לא נגענוך וכאשר עשינו עמך רק טוב ונשלחך בשלום אתה עתה ברוך יהוה
בראשית 26 : 30 (ALEP)
ל ויעש להם משתה ויאכלו וישתו
בראשית 26 : 31 (ALEP)
לא וישכימו בבקר וישבעו איש לאחיו וישלחם יצחק וילכו מאתו בשלום
בראשית 26 : 32 (ALEP)
לב ויהי ביום ההוא ויבאו עבדי יצחק ויגדו לו על אדות הבאר אשר חפרו ויאמרו לו מצאנו מים
בראשית 26 : 33 (ALEP)
לג ויקרא אתה שבעה על כן שם העיר באר שבע עד היום הזה {ס}
בראשית 26 : 34 (ALEP)
לד ויהי עשו בן ארבעים שנה ויקח אשה את יהודית בת בארי החתי--ואת בשמת בת אילן החתי
בראשית 26 : 35 (ALEP)
לה ותהיין מרת רוח ליצחק ולרבקה {ס}
❮
❯