בראשית 25 : 1 (ALEP)
א ויסף אברהם ויקח אשה ושמה קטורה
בראשית 25 : 2 (ALEP)
ב ותלד לו את זמרן ואת יקשן ואת מדן ואת מדין--ואת ישבק ואת שוח
בראשית 25 : 3 (ALEP)
ג ויקשן ילד את שבא ואת דדן ובני דדן היו אשורם ולטושם ולאמים
בראשית 25 : 4 (ALEP)
ד ובני מדין עיפה ועפר וחנך ואבידע ואלדעה כל אלה בני קטורה
בראשית 25 : 5 (ALEP)
ה ויתן אברהם את כל אשר לו ליצחק
בראשית 25 : 6 (ALEP)
ו ולבני הפילגשים אשר לאברהם נתן אברהם מתנת וישלחם מעל יצחק בנו בעודנו חי קדמה אל ארץ קדם
בראשית 25 : 7 (ALEP)
ז ואלה ימי שני חיי אברהם--אשר חי מאת שנה ושבעים שנה וחמש שנים
בראשית 25 : 8 (ALEP)
ח ויגוע וימת אברהם בשיבה טובה זקן ושבע ויאסף אל עמיו
בראשית 25 : 9 (ALEP)
ט ויקברו אתו יצחק וישמעאל בניו אל מערת המכפלה אל שדה עפרן בן צחר החתי אשר על פני ממרא
בראשית 25 : 10 (ALEP)
י השדה אשר קנה אברהם מאת בני חת--שמה קבר אברהם ושרה אשתו
בראשית 25 : 11 (ALEP)
יא ויהי אחרי מות אברהם ויברך אלהים את יצחק בנו וישב יצחק עם באר לחי ראי פ
בראשית 25 : 12 (ALEP)
יב ואלה תלדת ישמעאל בן אברהם אשר ילדה הגר המצרית שפחת שרה--לאברהם
בראשית 25 : 13 (ALEP)
יג ואלה שמות בני ישמעאל בשמתם לתולדתם בכר ישמעאל נבית וקדר ואדבאל ומבשם
בראשית 25 : 14 (ALEP)
יד ומשמע ודומה ומשא
בראשית 25 : 15 (ALEP)
טו חדד ותימא יטור נפיש וקדמה
בראשית 25 : 16 (ALEP)
טז אלה הם בני ישמעאל ואלה שמתם בחצריהם ובטירתם--שנים עשר נשיאם לאמתם
בראשית 25 : 17 (ALEP)
יז ואלה שני חיי ישמעאל--מאת שנה ושלשים שנה ושבע שנים ויגוע וימת ויאסף אל עמיו
בראשית 25 : 18 (ALEP)
יח וישכנו מחוילה עד שור אשר על פני מצרים באכה אשורה על פני כל אחיו נפל פ
בראשית 25 : 19 (ALEP)
יט ואלה תולדת יצחק בן אברהם אברהם הוליד את יצחק
בראשית 25 : 20 (ALEP)
כ ויהי יצחק בן ארבעים שנה בקחתו את רבקה בת בתואל הארמי מפדן ארם--אחות לבן הארמי לו לאשה
בראשית 25 : 21 (ALEP)
כא ויעתר יצחק ליהוה לנכח אשתו כי עקרה הוא ויעתר לו יהוה ותהר רבקה אשתו
בראשית 25 : 22 (ALEP)
כב ויתרצצו הבנים בקרבה ותאמר אם כן למה זה אנכי ותלך לדרש את יהוה
בראשית 25 : 23 (ALEP)
כג ויאמר יהוה לה שני גיים (גוים) בבטנך ושני לאמים ממעיך יפרדו ולאם מלאם יאמץ ורב יעבד צעיר
בראשית 25 : 24 (ALEP)
כד וימלאו ימיה ללדת והנה תומם בבטנה
בראשית 25 : 25 (ALEP)
כה ויצא הראשון אדמוני כלו כאדרת שער ויקראו שמו עשו
בראשית 25 : 26 (ALEP)
כו ואחרי כן יצא אחיו וידו אחזת בעקב עשו ויקרא שמו יעקב ויצחק בן ששים שנה בלדת אתם
בראשית 25 : 27 (ALEP)
כז ויגדלו הנערים ויהי עשו איש ידע ציד איש שדה ויעקב איש תם ישב אהלים
בראשית 25 : 28 (ALEP)
כח ויאהב יצחק את עשו כי ציד בפיו ורבקה אהבת את יעקב
בראשית 25 : 29 (ALEP)
כט ויזד יעקב נזיד ויבא עשו מן השדה והוא עיף
בראשית 25 : 30 (ALEP)
ל ויאמר עשו אל יעקב הלעיטני נא מן האדם האדם הזה--כי עיף אנכי על כן קרא שמו אדום
בראשית 25 : 31 (ALEP)
לא ויאמר יעקב מכרה כיום את בכרתך לי
בראשית 25 : 32 (ALEP)
לב ויאמר עשו הנה אנכי הולך למות ולמה זה לי בכרה
בראשית 25 : 33 (ALEP)
לג ויאמר יעקב השבעה לי כיום וישבע לו וימכר את בכרתו ליעקב
בראשית 25 : 34 (ALEP)
לד ויעקב נתן לעשו לחם ונזיד עדשים ויאכל וישת ויקם וילך ויבז עשו את הבכרה פ
❮
❯