בראשית 24 : 1 (ALEP)
א ואברהם זקן בא בימים ויהוה ברך את אברהם בכל
בראשית 24 : 2 (ALEP)
ב ויאמר אברהם אל עבדו זקן ביתו המשל בכל אשר לו שים נא ידך תחת ירכי
בראשית 24 : 3 (ALEP)
ג ואשביעך--ביהוה אלהי השמים ואלהי הארץ אשר לא תקח אשה לבני מבנות הכנעני אשר אנכי יושב בקרבו
בראשית 24 : 4 (ALEP)
ד כי אל ארצי ואל מולדתי תלך ולקחת אשה לבני ליצחק
בראשית 24 : 5 (ALEP)
ה ויאמר אליו העבד אולי לא תאבה האשה ללכת אחרי אל הארץ הזאת ההשב אשיב את בנך אל הארץ אשר יצאת משם
בראשית 24 : 6 (ALEP)
ו ויאמר אליו אברהם השמר לך פן תשיב את בני שמה
בראשית 24 : 7 (ALEP)
ז יהוה אלהי השמים אשר לקחני מבית אבי ומארץ מולדתי ואשר דבר לי ואשר נשבע לי לאמר לזרעך אתן את הארץ הזאת--הוא ישלח מלאכו לפניך ולקחת אשה לבני משם
בראשית 24 : 8 (ALEP)
ח ואם לא תאבה האשה ללכת אחריך--ונקית משבעתי זאת רק את בני לא תשב שמה
בראשית 24 : 9 (ALEP)
ט וישם העבד את ידו תחת ירך אברהם אדניו וישבע לו על הדבר הזה
בראשית 24 : 10 (ALEP)
י ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים--אל עיר נחור
בראשית 24 : 11 (ALEP)
יא ויברך הגמלים מחוץ לעיר אל באר המים לעת ערב לעת צאת השאבת
בראשית 24 : 12 (ALEP)
יב ויאמר--יהוה אלהי אדני אברהם הקרה נא לפני היום ועשה חסד עם אדני אברהם
בראשית 24 : 13 (ALEP)
יג הנה אנכי נצב על עין המים ובנות אנשי העיר יצאת לשאב מים
בראשית 24 : 14 (ALEP)
יד והיה הנער אשר אמר אליה הטי נא כדך ואשתה ואמרה שתה וגם גמליך אשקה--אתה הכחת לעבדך ליצחק ובה אדע כי עשית חסד עם אדני
בראשית 24 : 15 (ALEP)
טו ויהי הוא טרם כלה לדבר והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה
בראשית 24 : 16 (ALEP)
טז והנער טבת מראה מאד--בתולה ואיש לא ידעה ותרד העינה ותמלא כדה ותעל
בראשית 24 : 17 (ALEP)
יז וירץ העבד לקראתה ויאמר הגמיאיני נא מעט מים מכדך
בראשית 24 : 18 (ALEP)
יח ותאמר שתה אדני ותמהר ותרד כדה על ידה--ותשקהו
בראשית 24 : 19 (ALEP)
יט ותכל להשקתו ותאמר גם לגמליך אשאב עד אם כלו לשתת
בראשית 24 : 20 (ALEP)
כ ותמהר ותער כדה אל השקת ותרץ עוד אל הבאר לשאב ותשאב לכל גמליו
בראשית 24 : 21 (ALEP)
כא והאיש משתאה לה מחריש--לדעת ההצליח יהוה דרכו אם לא
בראשית 24 : 22 (ALEP)
כב ויהי כאשר כלו הגמלים לשתות ויקח האיש נזם זהב בקע משקלו--ושני צמידים על ידיה עשרה זהב משקלם
בראשית 24 : 23 (ALEP)
כג ויאמר בת מי את הגידי נא לי היש בית אביך מקום לנו ללין
בראשית 24 : 24 (ALEP)
כד ותאמר אליו בת בתואל אנכי--בן מלכה אשר ילדה לנחור
בראשית 24 : 25 (ALEP)
כה ותאמר אליו גם תבן גם מספוא רב עמנו--גם מקום ללון
בראשית 24 : 26 (ALEP)
כו ויקד האיש וישתחו ליהוה
בראשית 24 : 27 (ALEP)
כז ויאמר ברוך יהוה אלהי אדני אברהם אשר לא עזב חסדו ואמתו מעם אדני אנכי בדרך נחני יהוה בית אחי אדני
בראשית 24 : 28 (ALEP)
כח ותרץ הנער ותגד לבית אמה--כדברים האלה
בראשית 24 : 29 (ALEP)
כט ולרבקה אח ושמו לבן וירץ לבן אל האיש החוצה אל העין
בראשית 24 : 30 (ALEP)
ל ויהי כראת את הנזם ואת הצמדים על ידי אחתו וכשמעו את דברי רבקה אחתו לאמר כה דבר אלי האיש ויבא אל האיש והנה עמד על הגמלים על העין
בראשית 24 : 31 (ALEP)
לא ויאמר בוא ברוך יהוה למה תעמד בחוץ ואנכי פניתי הבית ומקום לגמלים
בראשית 24 : 32 (ALEP)
לב ויבא האיש הביתה ויפתח הגמלים ויתן תבן ומספוא לגמלים ומים לרחץ רגליו ורגלי האנשים אשר אתו
בראשית 24 : 33 (ALEP)
לג ויישם (ויושם) לפניו לאכל ויאמר לא אכל עד אם דברתי דברי ויאמר דבר
בראשית 24 : 34 (ALEP)
לד ויאמר עבד אברהם אנכי
בראשית 24 : 35 (ALEP)
לה ויהוה ברך את אדני מאד--ויגדל ויתן לו צאן ובקר וכסף וזהב ועבדם ושפחת וגמלים וחמרים
בראשית 24 : 36 (ALEP)
לו ותלד שרה אשת אדני בן לאדני אחרי זקנתה ויתן לו את כל אשר לו
בראשית 24 : 37 (ALEP)
לז וישבעני אדני לאמר לא תקח אשה לבני מבנות הכנעני אשר אנכי ישב בארצו
בראשית 24 : 38 (ALEP)
לח אם לא אל בית אבי תלך ואל משפחתי ולקחת אשה לבני
בראשית 24 : 39 (ALEP)
לט ואמר אל אדני אלי לא תלך האשה אחרי
בראשית 24 : 40 (ALEP)
מ ויאמר אלי יהוה אשר התהלכתי לפניו ישלח מלאכו אתך והצליח דרכך ולקחת אשה לבני ממשפחתי ומבית אבי
בראשית 24 : 41 (ALEP)
מא אז תנקה מאלתי כי תבוא אל משפחתי ואם לא יתנו לך והיית נקי מאלתי
בראשית 24 : 42 (ALEP)
מב ואבא היום אל העין ואמר יהוה אלהי אדני אברהם אם ישך נא מצליח דרכי אשר אנכי הלך עליה
בראשית 24 : 43 (ALEP)
מג הנה אנכי נצב על עין המים והיה העלמה היצאת לשאב ואמרתי אליה השקיני נא מעט מים מכדך
בראשית 24 : 44 (ALEP)
מד ואמרה אלי גם אתה שתה וגם לגמליך אשאב--הוא האשה אשר הכיח יהוה לבן אדני
בראשית 24 : 45 (ALEP)
מה אני טרם אכלה לדבר אל לבי והנה רבקה יצאת וכדה על שכמה ותרד העינה ותשאב ואמר אליה השקיני נא
בראשית 24 : 46 (ALEP)
מו ותמהר ותורד כדה מעליה ותאמר שתה וגם גמליך אשקה ואשת וגם הגמלים השקתה
בראשית 24 : 47 (ALEP)
מז ואשאל אתה ואמר בת מי את ותאמר בת בתואל בן נחור אשר ילדה לו מלכה ואשם הנזם על אפה והצמידים על ידיה
בראשית 24 : 48 (ALEP)
מח ואקד ואשתחוה ליהוה ואברך את יהוה אלהי אדני אברהם אשר הנחני בדרך אמת לקחת את בת אחי אדני לבנו
בראשית 24 : 49 (ALEP)
מט ועתה אם ישכם עשים חסד ואמת את אדני--הגידו לי ואם לא--הגידו לי ואפנה על ימין או על שמאל
בראשית 24 : 50 (ALEP)
נ ויען לבן ובתואל ויאמרו מיהוה יצא הדבר לא נוכל דבר אליך רע או טוב
בראשית 24 : 51 (ALEP)
נא הנה רבקה לפניך קח ולך ותהי אשה לבן אדניך כאשר דבר יהוה
בראשית 24 : 52 (ALEP)
נב ויהי כאשר שמע עבד אברהם את דבריהם וישתחו ארצה ליהוה
בראשית 24 : 53 (ALEP)
נג ויוצא העבד כלי כסף וכלי זהב ובגדים ויתן לרבקה ומגדנת--נתן לאחיה ולאמה
בראשית 24 : 54 (ALEP)
נד ויאכלו וישתו הוא והאנשים אשר עמו--וילינו ויקומו בבקר ויאמר שלחני לאדני
בראשית 24 : 55 (ALEP)
נה ויאמר אחיה ואמה תשב הנער אתנו ימים או עשור אחר תלך
בראשית 24 : 56 (ALEP)
נו ויאמר אלהם אל תאחרו אתי ויהוה הצליח דרכי שלחוני ואלכה לאדני
בראשית 24 : 57 (ALEP)
נז ויאמרו נקרא לנער ונשאלה את פיה
בראשית 24 : 58 (ALEP)
נח ויקראו לרבקה ויאמרו אליה התלכי עם האיש הזה ותאמר אלך
בראשית 24 : 59 (ALEP)
נט וישלחו את רבקה אחתם ואת מנקתה ואת עבד אברהם ואת אנשיו
בראשית 24 : 60 (ALEP)
ס ויברכו את רבקה ויאמרו לה--אחתנו את היי לאלפי רבבה ויירש זרעך את שער שנאיו
בראשית 24 : 61 (ALEP)
סא ותקם רבקה ונערתיה ותרכבנה על הגמלים ותלכנה אחרי האיש ויקח העבד את רבקה וילך
בראשית 24 : 62 (ALEP)
סב ויצחק בא מבוא באר לחי ראי והוא יושב בארץ הנגב
בראשית 24 : 63 (ALEP)
סג ויצא יצחק לשוח בשדה לפנות ערב וישא עיניו וירא והנה גמלים באים
בראשית 24 : 64 (ALEP)
סד ותשא רבקה את עיניה ותרא את יצחק ותפל מעל הגמל
בראשית 24 : 65 (ALEP)
סה ותאמר אל העבד מי האיש הלזה ההלך בשדה לקראתנו ויאמר העבד הוא אדני ותקח הצעיף ותתכס
בראשית 24 : 66 (ALEP)
סו ויספר העבד ליצחק את כל הדברים אשר עשה
בראשית 24 : 67 (ALEP)
סז ויבאה יצחק האהלה שרה אמו ויקח את רבקה ותהי לו לאשה ויאהבה וינחם יצחק אחרי אמו {פ}
❮
❯