בראשית 22 : 1 (ALEP)
א ויהי אחר הדברים האלה והאלהים נסה את אברהם ויאמר אליו אברהם ויאמר הנני
בראשית 22 : 2 (ALEP)
ב ויאמר קח נא את בנך את יחידך אשר אהבת את יצחק ולך לך אל ארץ המריה והעלהו שם לעלה על אחד ההרים אשר אמר אליך
בראשית 22 : 3 (ALEP)
ג וישכם אברהם בבקר ויחבש את חמרו ויקח את שני נעריו אתו ואת יצחק בנו ויבקע עצי עלה ויקם וילך אל המקום אשר אמר לו האלהים
בראשית 22 : 4 (ALEP)
ד ביום השלישי וישא אברהם את עיניו וירא את המקום--מרחק
בראשית 22 : 5 (ALEP)
ה ויאמר אברהם אל נעריו שבו לכם פה עם החמור ואני והנער נלכה עד כה ונשתחוה ונשובה אליכם
בראשית 22 : 6 (ALEP)
ו ויקח אברהם את עצי העלה וישם על יצחק בנו ויקח בידו את האש ואת המאכלת וילכו שניהם יחדו
בראשית 22 : 7 (ALEP)
ז ויאמר יצחק אל אברהם אביו ויאמר אבי ויאמר הנני בני ויאמר הנה האש והעצים ואיה השה לעלה
בראשית 22 : 8 (ALEP)
ח ויאמר אברהם אלהים יראה לו השה לעלה בני וילכו שניהם יחדו
בראשית 22 : 9 (ALEP)
ט ויבאו אל המקום אשר אמר לו האלהים ויבן שם אברהם את המזבח ויערך את העצים ויעקד את יצחק בנו וישם אתו על המזבח ממעל לעצים
בראשית 22 : 10 (ALEP)
י וישלח אברהם את ידו ויקח את המאכלת לשחט את בנו
בראשית 22 : 11 (ALEP)
יא ויקרא אליו מלאך יהוה מן השמים ויאמר אברהם אברהם ויאמר הנני
בראשית 22 : 12 (ALEP)
יב ויאמר אל תשלח ידך אל הנער ואל תעש לו מאומה כי עתה ידעתי כי ירא אלהים אתה ולא חשכת את בנך את יחידך ממני
בראשית 22 : 13 (ALEP)
יג וישא אברהם את עיניו וירא והנה איל אחר נאחז בסבך בקרניו וילך אברהם ויקח את האיל ויעלהו לעלה תחת בנו
בראשית 22 : 14 (ALEP)
יד ויקרא אברהם שם המקום ההוא יהוה יראה אשר יאמר היום בהר יהוה יראה
בראשית 22 : 15 (ALEP)
טו ויקרא מלאך יהוה אל אברהם שנית מן השמים
בראשית 22 : 16 (ALEP)
טז ויאמר בי נשבעתי נאם יהוה כי יען אשר עשית את הדבר הזה ולא חשכת את בנך את יחידך
בראשית 22 : 17 (ALEP)
יז כי ברך אברכך והרבה ארבה את זרעך ככוכבי השמים וכחול אשר על שפת הים וירש זרעך את שער איביו
בראשית 22 : 18 (ALEP)
יח והתברכו בזרעך כל גויי הארץ עקב אשר שמעת בקלי
בראשית 22 : 19 (ALEP)
יט וישב אברהם אל נעריו ויקמו וילכו יחדו אל באר שבע וישב אברהם בבאר שבע פ
בראשית 22 : 20 (ALEP)
כ ויהי אחרי הדברים האלה ויגד לאברהם לאמר הנה ילדה מלכה גם הוא בנים--לנחור אחיך
בראשית 22 : 21 (ALEP)
כא את עוץ בכרו ואת בוז אחיו ואת קמואל אבי ארם
בראשית 22 : 22 (ALEP)
כב ואת כשד ואת חזו ואת פלדש ואת ידלף ואת בתואל
בראשית 22 : 23 (ALEP)
כג ובתואל ילד את רבקה שמנה אלה ילדה מלכה לנחור אחי אברהם
בראשית 22 : 24 (ALEP)
כד ופילגשו ושמה ראומה ותלד גם הוא את טבח ואת גחם ואת תחש ואת מעכה פ
❮
❯