בראשית 21 : 1 (ALEP)
א ויהוה פקד את שרה כאשר אמר ויעש יהוה לשרה כאשר דבר
בראשית 21 : 2 (ALEP)
ב ותהר ותלד שרה לאברהם בן לזקניו למועד אשר דבר אתו אלהים
בראשית 21 : 3 (ALEP)
ג ויקרא אברהם את שם בנו הנולד לו אשר ילדה לו שרה--יצחק
בראשית 21 : 4 (ALEP)
ד וימל אברהם את יצחק בנו בן שמנת ימים כאשר צוה אתו אלהים
בראשית 21 : 5 (ALEP)
ה ואברהם בן מאת שנה בהולד לו את יצחק בנו
בראשית 21 : 6 (ALEP)
ו ותאמר שרה--צחק עשה לי אלהים כל השמע יצחק לי
בראשית 21 : 7 (ALEP)
ז ותאמר מי מלל לאברהם היניקה בנים שרה כי ילדתי בן לזקניו
בראשית 21 : 8 (ALEP)
ח ויגדל הילד ויגמל ויעש אברהם משתה גדול ביום הגמל את יצחק
בראשית 21 : 9 (ALEP)
ט ותרא שרה את בן הגר המצרית אשר ילדה לאברהם--מצחק
בראשית 21 : 10 (ALEP)
י ותאמר לאברהם גרש האמה הזאת ואת בנה כי לא יירש בן האמה הזאת עם בני עם יצחק
בראשית 21 : 11 (ALEP)
יא וירע הדבר מאד בעיני אברהם על אודת בנו
בראשית 21 : 12 (ALEP)
יב ויאמר אלהים אל אברהם אל ירע בעיניך על הנער ועל אמתך--כל אשר תאמר אליך שרה שמע בקלה כי ביצחק יקרא לך זרע
בראשית 21 : 13 (ALEP)
יג וגם את בן האמה לגוי אשימנו כי זרעך הוא
בראשית 21 : 14 (ALEP)
יד וישכם אברהם בבקר ויקח לחם וחמת מים ויתן אל הגר שם על שכמה ואת הילד--וישלחה ותלך ותתע במדבר באר שבע
בראשית 21 : 15 (ALEP)
טו ויכלו המים מן החמת ותשלך את הילד תחת אחד השיחם
בראשית 21 : 16 (ALEP)
טז ותלך ותשב לה מנגד הרחק כמטחוי קשת כי אמרה אל אראה במות הילד ותשב מנגד ותשא את קלה ותבך
בראשית 21 : 17 (ALEP)
יז וישמע אלהים את קול הנער ויקרא מלאך אלהים אל הגר מן השמים ויאמר לה מה לך הגר אל תיראי כי שמע אלהים אל קול הנער באשר הוא שם
בראשית 21 : 18 (ALEP)
יח קומי שאי את הנער והחזיקי את ידך בו כי לגוי גדול אשימנו
בראשית 21 : 19 (ALEP)
יט ויפקח אלהים את עיניה ותרא באר מים ותלך ותמלא את החמת מים ותשק את הנער
בראשית 21 : 20 (ALEP)
כ ויהי אלהים את הנער ויגדל וישב במדבר ויהי רבה קשת
בראשית 21 : 21 (ALEP)
כא וישב במדבר פארן ותקח לו אמו אשה מארץ מצרים פ
בראשית 21 : 22 (ALEP)
כב ויהי בעת ההוא ויאמר אבימלך ופיכל שר צבאו אל אברהם לאמר אלהים עמך בכל אשר אתה עשה
בראשית 21 : 23 (ALEP)
כג ועתה השבעה לי באלהים הנה אם תשקר לי ולניני ולנכדי כחסד אשר עשיתי עמך תעשה עמדי ועם הארץ אשר גרתה בה
בראשית 21 : 24 (ALEP)
כד ויאמר אברהם אנכי אשבע
בראשית 21 : 25 (ALEP)
כה והוכח אברהם את אבימלך על אדות באר המים אשר גזלו עבדי אבימלך
בראשית 21 : 26 (ALEP)
כו ויאמר אבימלך--לא ידעתי מי עשה את הדבר הזה וגם אתה לא הגדת לי וגם אנכי לא שמעתי--בלתי היום
בראשית 21 : 27 (ALEP)
כז ויקח אברהם צאן ובקר ויתן לאבימלך ויכרתו שניהם ברית
בראשית 21 : 28 (ALEP)
כח ויצב אברהם את שבע כבשת הצאן--לבדהן
בראשית 21 : 29 (ALEP)
כט ויאמר אבימלך אל אברהם מה הנה שבע כבשת האלה אשר הצבת לבדנה
בראשית 21 : 30 (ALEP)
ל ויאמר--כי את שבע כבשת תקח מידי בעבור תהיה לי לעדה כי חפרתי את הבאר הזאת
בראשית 21 : 31 (ALEP)
לא על כן קרא למקום ההוא--באר שבע כי שם נשבעו שניהם
בראשית 21 : 32 (ALEP)
לב ויכרתו ברית בבאר שבע ויקם אבימלך ופיכל שר צבאו וישבו אל ארץ פלשתים
בראשית 21 : 33 (ALEP)
לג ויטע אשל בבאר שבע ויקרא שם--בשם יהוה אל עולם
בראשית 21 : 34 (ALEP)
לד ויגר אברהם בארץ פלשתים ימים רבים פ
❮
❯