בראשית 19 : 1 (ALEP)
א ויבאו שני המלאכים סדמה בערב ולוט ישב בשער סדם וירא לוט ויקם לקראתם וישתחו אפים ארצה
בראשית 19 : 2 (ALEP)
ב ויאמר הנה נא אדני סורו נא אל בית עבדכם ולינו ורחצו רגליכם והשכמתם והלכתם לדרככם ויאמרו לא כי ברחוב נלין
בראשית 19 : 3 (ALEP)
ג ויפצר בם מאד--ויסרו אליו ויבאו אל ביתו ויעש להם משתה ומצות אפה ויאכלו
בראשית 19 : 4 (ALEP)
ד טרם ישכבו ואנשי העיר אנשי סדם נסבו על הבית מנער ועד זקן כל העם מקצה
בראשית 19 : 5 (ALEP)
ה ויקראו אל לוט ויאמרו לו איה האנשים אשר באו אליך הלילה הוציאם אלינו ונדעה אתם
בראשית 19 : 6 (ALEP)
ו ויצא אלהם לוט הפתחה והדלת סגר אחריו
בראשית 19 : 7 (ALEP)
ז ויאמר אל נא אחי תרעו
בראשית 19 : 8 (ALEP)
ח הנה נא לי שתי בנות אשר לא ידעו איש--אוציאה נא אתהן אליכם ועשו להן כטוב בעיניכם רק לאנשים האל אל תעשו דבר כי על כן באו בצל קרתי
בראשית 19 : 9 (ALEP)
ט ויאמרו גש הלאה ויאמרו האחד בא לגור וישפט שפוט--עתה נרע לך מהם ויפצרו באיש בלוט מאד ויגשו לשבר הדלת
בראשית 19 : 10 (ALEP)
י וישלחו האנשים את ידם ויביאו את לוט אליהם הביתה ואת הדלת סגרו
בראשית 19 : 11 (ALEP)
יא ואת האנשים אשר פתח הבית הכו בסנורים מקטן ועד גדול וילאו למצא הפתח
בראשית 19 : 12 (ALEP)
יב ויאמרו האנשים אל לוט עד מי לך פה--חתן ובניך ובנתיך וכל אשר לך בעיר הוצא מן המקום
בראשית 19 : 13 (ALEP)
יג כי משחתים אנחנו את המקום הזה כי גדלה צעקתם את פני יהוה וישלחנו יהוה לשחתה
בראשית 19 : 14 (ALEP)
יד ויצא לוט וידבר אל חתניו לקחי בנתיו ויאמר קומו צאו מן המקום הזה כי משחית יהוה את העיר ויהי כמצחק בעיני חתניו
בראשית 19 : 15 (ALEP)
טו וכמו השחר עלה ויאיצו המלאכים בלוט לאמר קום קח את אשתך ואת שתי בנתיך הנמצאת--פן תספה בעון העיר
בראשית 19 : 16 (ALEP)
טז ויתמהמה--ויחזיקו האנשים בידו וביד אשתו וביד שתי בנתיו בחמלת יהוה עליו ויצאהו וינחהו מחוץ לעיר
בראשית 19 : 17 (ALEP)
יז ויהי כהוציאם אתם החוצה ויאמר המלט על נפשך--אל תביט אחריך ואל תעמד בכל הככר ההרה המלט פן תספה
בראשית 19 : 18 (ALEP)
יח ויאמר לוט אלהם אל נא אדני
בראשית 19 : 19 (ALEP)
יט הנה נא מצא עבדך חן בעיניך ותגדל חסדך אשר עשית עמדי להחיות את נפשי ואנכי לא אוכל להמלט ההרה--פן תדבקני הרעה ומתי
בראשית 19 : 20 (ALEP)
כ הנה נא העיר הזאת קרבה לנוס שמה--והוא מצער אמלטה נא שמה הלא מצער הוא--ותחי נפשי
בראשית 19 : 21 (ALEP)
כא ויאמר אליו--הנה נשאתי פניך גם לדבר הזה לבלתי הפכי את העיר אשר דברת
בראשית 19 : 22 (ALEP)
כב מהר המלט שמה כי לא אוכל לעשות דבר עד באך שמה על כן קרא שם העיר צוער
בראשית 19 : 23 (ALEP)
כג השמש יצא על הארץ ולוט בא צערה
בראשית 19 : 24 (ALEP)
כד ויהוה המטיר על סדם ועל עמרה--גפרית ואש מאת יהוה מן השמים
בראשית 19 : 25 (ALEP)
כה ויהפך את הערים האל ואת כל הככר ואת כל ישבי הערים וצמח האדמה
בראשית 19 : 26 (ALEP)
כו ותבט אשתו מאחריו ותהי נציב מלח
בראשית 19 : 27 (ALEP)
כז וישכם אברהם בבקר אל המקום--אשר עמד שם את פני יהוה
בראשית 19 : 28 (ALEP)
כח וישקף על פני סדם ועמרה ועל כל פני ארץ הככר וירא והנה עלה קיטר הארץ כקיטר הכבשן
בראשית 19 : 29 (ALEP)
כט ויהי בשחת אלהים את ערי הככר ויזכר אלהים את אברהם וישלח את לוט מתוך ההפכה בהפך את הערים אשר ישב בהן לוט
בראשית 19 : 30 (ALEP)
ל ויעל לוט מצוער וישב בהר ושתי בנתיו עמו כי ירא לשבת בצוער וישב במערה--הוא ושתי בנתיו
בראשית 19 : 31 (ALEP)
לא ותאמר הבכירה אל הצעירה אבינו זקן ואיש אין בארץ לבוא עלינו כדרך כל הארץ
בראשית 19 : 32 (ALEP)
לב לכה נשקה את אבינו יין ונשכבה עמו ונחיה מאבינו זרע
בראשית 19 : 33 (ALEP)
לג ותשקין את אביהן יין בלילה הוא ותבא הבכירה ותשכב את אביה ולא ידע בשכבה ובקומה
בראשית 19 : 34 (ALEP)
לד ויהי ממחרת ותאמר הבכירה אל הצעירה הן שכבתי אמש את אבי נשקנו יין גם הלילה ובאי שכבי עמו ונחיה מאבינו זרע
בראשית 19 : 35 (ALEP)
לה ותשקין גם בלילה ההוא את אביהן--יין ותקם הצעירה ותשכב עמו ולא ידע בשכבה ובקמה
בראשית 19 : 36 (ALEP)
לו ותהרין שתי בנות לוט מאביהן
בראשית 19 : 37 (ALEP)
לז ותלד הבכירה בן ותקרא שמו מואב הוא אבי מואב עד היום
בראשית 19 : 38 (ALEP)
לח והצעירה גם הוא ילדה בן ותקרא שמו בן עמי הוא אבי בני עמון עד היום {ס}
❮
❯