בראשית 17 : 1 (ALEP)
א ויהי אברם בן תשעים שנה ותשע שנים וירא יהוה אל אברם ויאמר אליו אני אל שדי--התהלך לפני והיה תמים
בראשית 17 : 2 (ALEP)
ב ואתנה בריתי ביני ובינך וארבה אותך במאד מאד
בראשית 17 : 3 (ALEP)
ג ויפל אברם על פניו וידבר אתו אלהים לאמר
בראשית 17 : 4 (ALEP)
ד אני הנה בריתי אתך והיית לאב המון גוים
בראשית 17 : 5 (ALEP)
ה ולא יקרא עוד את שמך אברם והיה שמך אברהם כי אב המון גוים נתתיך
בראשית 17 : 6 (ALEP)
ו והפרתי אתך במאד מאד ונתתיך לגוים ומלכים ממך יצאו
בראשית 17 : 7 (ALEP)
ז והקמתי את בריתי ביני ובינך ובין זרעך אחריך לדרתם--לברית עולם להיות לך לאלהים ולזרעך אחריך
בראשית 17 : 8 (ALEP)
ח ונתתי לך ולזרעך אחריך את ארץ מגריך את כל ארץ כנען לאחזת עולם והייתי להם לאלהים
בראשית 17 : 9 (ALEP)
ט ויאמר אלהים אל אברהם ואתה את בריתי תשמר--אתה וזרעך אחריך לדרתם
בראשית 17 : 10 (ALEP)
י זאת בריתי אשר תשמרו ביני וביניכם ובין זרעך אחריך המול לכם כל זכר
בראשית 17 : 11 (ALEP)
יא ונמלתם את בשר ערלתכם והיה לאות ברית ביני וביניכם
בראשית 17 : 12 (ALEP)
יב ובן שמנת ימים ימול לכם כל זכר--לדרתיכם יליד בית--ומקנת כסף מכל בן נכר אשר לא מזרעך הוא
בראשית 17 : 13 (ALEP)
יג המול ימול יליד ביתך ומקנת כספך והיתה בריתי בבשרכם לברית עולם
בראשית 17 : 14 (ALEP)
יד וערל זכר אשר לא ימול את בשר ערלתו--ונכרתה הנפש ההוא מעמיה את בריתי הפר {ס}
בראשית 17 : 15 (ALEP)
טו ויאמר אלהים אל אברהם שרי אשתך לא תקרא את שמה שרי כי שרה שמה
בראשית 17 : 16 (ALEP)
טז וברכתי אתה וגם נתתי ממנה לך בן וברכתיה והיתה לגוים מלכי עמים ממנה יהיו
בראשית 17 : 17 (ALEP)
יז ויפל אברהם על פניו ויצחק ויאמר בלבו הלבן מאה שנה יולד ואם שרה הבת תשעים שנה תלד
בראשית 17 : 18 (ALEP)
יח ויאמר אברהם אל האלהים לו ישמעאל יחיה לפניך
בראשית 17 : 19 (ALEP)
יט ויאמר אלהים אבל שרה אשתך ילדת לך בן וקראת את שמו יצחק והקמתי את בריתי אתו לברית עולם לזרעו אחריו
בראשית 17 : 20 (ALEP)
כ ולישמעאל שמעתיך--הנה ברכתי אתו והפריתי אתו והרביתי אתו במאד מאד שנים עשר נשיאם יוליד ונתתיו לגוי גדול
בראשית 17 : 21 (ALEP)
כא ואת בריתי אקים את יצחק אשר תלד לך שרה למועד הזה בשנה האחרת
בראשית 17 : 22 (ALEP)
כב ויכל לדבר אתו ויעל אלהים מעל אברהם
בראשית 17 : 23 (ALEP)
כג ויקח אברהם את ישמעאל בנו ואת כל ילידי ביתו ואת כל מקנת כספו--כל זכר באנשי בית אברהם וימל את בשר ערלתם בעצם היום הזה כאשר דבר אתו אלהים
בראשית 17 : 24 (ALEP)
כד ואברהם--בן תשעים ותשע שנה בהמלו בשר ערלתו
בראשית 17 : 25 (ALEP)
כה וישמעאל בנו בן שלש עשרה שנה בהמלו--את בשר ערלתו
בראשית 17 : 26 (ALEP)
כו בעצם היום הזה נמול אברהם וישמעאל בנו
בראשית 17 : 27 (ALEP)
כז וכל אנשי ביתו יליד בית ומקנת כסף מאת בן נכר--נמלו אתו {פ}
❮
❯