בראשית 14 : 1 (ALEP)
א ויהי בימי אמרפל מלך שנער אריוך מלך אלסר כדרלעמר מלך עילם ותדעל מלך גוים
בראשית 14 : 2 (ALEP)
ב עשו מלחמה את ברע מלך סדם ואת ברשע מלך עמרה שנאב מלך אדמה ושמאבר מלך צביים ומלך בלע היא צער
בראשית 14 : 3 (ALEP)
ג כל אלה חברו אל עמק השדים הוא ים המלח
בראשית 14 : 4 (ALEP)
ד שתים עשרה שנה עבדו את כדרלעמר ושלש עשרה שנה מרדו
בראשית 14 : 5 (ALEP)
ה ובארבע עשרה שנה בא כדרלעמר והמלכים אשר אתו ויכו את רפאים בעשתרת קרנים ואת הזוזים בהם ואת האימים בשוה קריתים
בראשית 14 : 6 (ALEP)
ו ואת החרי בהררם שעיר עד איל פארן אשר על המדבר
בראשית 14 : 7 (ALEP)
ז וישבו ויבאו אל עין משפט הוא קדש ויכו את כל שדה העמלקי--וגם את האמרי הישב בחצצן תמר
בראשית 14 : 8 (ALEP)
ח ויצא מלך סדם ומלך עמרה ומלך אדמה ומלך צביים ומלך בלע הוא צער ויערכו אתם מלחמה בעמק השדים
בראשית 14 : 9 (ALEP)
ט את כדרלעמר מלך עילם ותדעל מלך גוים ואמרפל מלך שנער ואריוך מלך אלסר--ארבעה מלכים את החמשה
בראשית 14 : 10 (ALEP)
י ועמק השדים בארת בארת חמר וינסו מלך סדם ועמרה ויפלו שמה והנשארים הרה נסו
בראשית 14 : 11 (ALEP)
יא ויקחו את כל רכש סדם ועמרה ואת כל אכלם--וילכו
בראשית 14 : 12 (ALEP)
יב ויקחו את לוט ואת רכשו בן אחי אברם וילכו והוא ישב בסדם
בראשית 14 : 13 (ALEP)
יג ויבא הפליט ויגד לאברם העברי והוא שכן באלני ממרא האמרי אחי אשכל ואחי ענר והם בעלי ברית אברם
בראשית 14 : 14 (ALEP)
יד וישמע אברם כי נשבה אחיו וירק את חניכיו ילידי ביתו שמנה עשר ושלש מאות וירדף עד דן
בראשית 14 : 15 (ALEP)
טו ויחלק עליהם לילה הוא ועבדיו ויכם וירדפם עד חובה אשר משמאל לדמשק
בראשית 14 : 16 (ALEP)
טז וישב את כל הרכש וגם את לוט אחיו ורכשו השיב וגם את הנשים ואת העם
בראשית 14 : 17 (ALEP)
יז ויצא מלך סדם לקראתו אחרי שובו מהכות את כדרלעמר ואת המלכים אשר אתו--אל עמק שוה הוא עמק המלך
בראשית 14 : 18 (ALEP)
יח ומלכי צדק מלך שלם הוציא לחם ויין והוא כהן לאל עליון
בראשית 14 : 19 (ALEP)
יט ויברכהו ויאמר ברוך אברם לאל עליון קנה שמים וארץ
בראשית 14 : 20 (ALEP)
כ וברוך אל עליון אשר מגן צריך בידך ויתן לו מעשר מכל
בראשית 14 : 21 (ALEP)
כא ויאמר מלך סדם אל אברם תן לי הנפש והרכש קח לך
בראשית 14 : 22 (ALEP)
כב ויאמר אברם אל מלך סדם הרמתי ידי אל יהוה אל עליון קנה שמים וארץ
בראשית 14 : 23 (ALEP)
כג אם מחוט ועד שרוך נעל ואם אקח מכל אשר לך ולא תאמר אני העשרתי את אברם
בראשית 14 : 24 (ALEP)
כד בלעדי רק אשר אכלו הנערים וחלק האנשים אשר הלכו אתי ענר אשכל וממרא הם יקחו חלקם {ס}
❮
❯