בראשית 11 : 1 (ALEP)
א ויהי כל הארץ שפה אחת ודברים אחדים
בראשית 11 : 2 (ALEP)
ב ויהי בנסעם מקדם וימצאו בקעה בארץ שנער וישבו שם
בראשית 11 : 3 (ALEP)
ג ויאמרו איש אל רעהו הבה נלבנה לבנים ונשרפה לשרפה ותהי להם הלבנה לאבן והחמר היה להם לחמר
בראשית 11 : 4 (ALEP)
ד ויאמרו הבה נבנה לנו עיר ומגדל וראשו בשמים ונעשה לנו שם פן נפוץ על פני כל הארץ
בראשית 11 : 5 (ALEP)
ה וירד יהוה לראת את העיר ואת המגדל אשר בנו בני האדם
בראשית 11 : 6 (ALEP)
ו ויאמר יהוה הן עם אחד ושפה אחת לכלם וזה החלם לעשות ועתה לא יבצר מהם כל אשר יזמו לעשות
בראשית 11 : 7 (ALEP)
ז הבה נרדה ונבלה שם שפתם--אשר לא ישמעו איש שפת רעהו
בראשית 11 : 8 (ALEP)
ח ויפץ יהוה אתם משם על פני כל הארץ ויחדלו לבנת העיר
בראשית 11 : 9 (ALEP)
ט על כן קרא שמה בבל כי שם בלל יהוה שפת כל הארץ ומשם הפיצם יהוה על פני כל הארץ פ
בראשית 11 : 10 (ALEP)
י אלה תולדת שם--שם בן מאת שנה ויולד את ארפכשד שנתים אחר המבול
בראשית 11 : 11 (ALEP)
יא ויחי שם אחרי הולידו את ארפכשד חמש מאות שנה ויולד בנים ובנות ס
בראשית 11 : 12 (ALEP)
יב וארפכשד חי חמש ושלשים שנה ויולד את שלח
בראשית 11 : 13 (ALEP)
יג ויחי ארפכשד אחרי הולידו את שלח שלש שנים וארבע מאות שנה ויולד בנים ובנות ס
בראשית 11 : 14 (ALEP)
יד ושלח חי שלשים שנה ויולד את עבר
בראשית 11 : 15 (ALEP)
טו ויחי שלח אחרי הולידו את עבר שלש שנים וארבע מאות שנה ויולד בנים ובנות ס
בראשית 11 : 16 (ALEP)
טז ויחי עבר ארבע ושלשים שנה ויולד את פלג
בראשית 11 : 17 (ALEP)
יז ויחי עבר אחרי הולידו את פלג שלשים שנה וארבע מאות שנה ויולד בנים ובנות ס
בראשית 11 : 18 (ALEP)
יח ויחי פלג שלשים שנה ויולד את רעו
בראשית 11 : 19 (ALEP)
יט ויחי פלג אחרי הולידו את רעו תשע שנים ומאתים שנה ויולד בנים ובנות ס
בראשית 11 : 20 (ALEP)
כ ויחי רעו שתים ושלשים שנה ויולד את שרוג
בראשית 11 : 21 (ALEP)
כא ויחי רעו אחרי הולידו את שרוג שבע שנים ומאתים שנה ויולד בנים ובנות ס
בראשית 11 : 22 (ALEP)
כב ויחי שרוג שלשים שנה ויולד את נחור
בראשית 11 : 23 (ALEP)
כג ויחי שרוג אחרי הולידו את נחור--מאתים שנה ויולד בנים ובנות ס
בראשית 11 : 24 (ALEP)
כד ויחי נחור תשע ועשרים שנה ויולד את תרח
בראשית 11 : 25 (ALEP)
כה ויחי נחור אחרי הולידו את תרח תשע עשרה שנה ומאת שנה ויולד בנים ובנות ס
בראשית 11 : 26 (ALEP)
כו ויחי תרח שבעים שנה ויולד את אברם את נחור ואת הרן
בראשית 11 : 27 (ALEP)
כז ואלה תולדת תרח--תרח הוליד את אברם את נחור ואת הרן והרן הוליד את לוט
בראשית 11 : 28 (ALEP)
כח וימת הרן על פני תרח אביו בארץ מולדתו באור כשדים
בראשית 11 : 29 (ALEP)
כט ויקח אברם ונחור להם נשים שם אשת אברם שרי ושם אשת נחור מלכה בת הרן אבי מלכה ואבי יסכה
בראשית 11 : 30 (ALEP)
ל ותהי שרי עקרה אין לה ולד
בראשית 11 : 31 (ALEP)
לא ויקח תרח את אברם בנו ואת לוט בן הרן בן בנו ואת שרי כלתו אשת אברם בנו ויצאו אתם מאור כשדים ללכת ארצה כנען ויבאו עד חרן וישבו שם
בראשית 11 : 32 (ALEP)
לב ויהיו ימי תרח חמש שנים ומאתים שנה וימת תרח בחרן פ
❮
❯